O Kandɔɔ 6 - BII BILA

Hala kɔngɔlan le vanndacieea ciiyo

¹ Mɛɛ vanndacieea kandu kuiyo o ceendo coo, má va cuavaa laandua violɔɔ,

² mí poaa Hala-a ca maa cuavaa laandua vanndacieea va violɔɔ-a naŋ taw, má hɛli a pum, má cua nda o nɔ̀lan.

³ O kon, mí Mɛlɛka dimi aa: «Yoomu nuu lo lɛnin vanndacieea nin le lɔ́ɔ́-lɔ́ɔ̀ le. Kani ɲaa yoomaa bɛnda le piɔ́mndo sɔlaa-a nda co ni. Lelan, yoomu ndaa hiw lɛnin bandei o vɔsilan kɛmɛ a bidiin coo le.»

⁴ Boondii ken vanaa vilɛi-vilɛiya va o lɛŋnden coo ni. Mí ndáà va vɔ vɛlɛ o kon kɔɔli. Nda yɔŋnun kuubaa cɔvaa masindɛa ni, tɔ́ɔ́ pila ndáà nɔ ni. Tuma poaa Hala-a hun cua cuavaa laandua vanndacieea o nɔ̀lan-ndo nda velu vanaa vilɛyaa kan ni.

⁵ Mí Mɛlɛka ca maa kɔlvesɛi vanndacieea va hiovɔɔ laci o ceendo coo tuŋ, mó ca maa lepalaa-lepala, yiyannda vɔɔnnda va nda o lakɔl-tan la va nda lueiyo o dɛnɛ vɔɔndo nin.

⁶ Le hee, mí mɔnɛi bii ndu, mí ndu pila ɲunan ɲɛ vem ndu vanacieo cɔvɔɔ mó soli ndu o ceendo coo-o.

⁷ Mó dimi aa: «Fɔ mì tɛɛmbuu vanndacieaa ya cɔw haa mí soli nda o ceendo coo-a. I co vɛlɛ visia bɛndua, visia pɔm-pɔmbɔa kela lɛŋ-nda a yowva kpow tɛɛmbuu. I sina ɲɛ-ɲɛ vem ya nda cɔvɔɔ le.»

⁸ Kɛ mí Mɛlɛka ca Noe ɲia taw.

Mɛlɛka tuu le Noe kpakpalaa a kɔltuw ndɔɔ

^9-10 Polale Noe len le yɔŋnun nden ni, ndóò velu poaa nda yáá: Sɛm, Ham a Yafɛt. Vana sandaa a vana diandaa Noe yɔŋnun vanndacieea tɛɛn o paale ndɔlen ni, o va kelaa o nɛi Hala-o coo.

¹¹ Kɛ vanndacieea telen kon a va a laasiannda Hala o hɔl, yɔŋ vɔɔndo va tosanndo nɛɛ-nɛɛ ka.

¹² Mɛɛ Hala tofa vanndacieea o ceendo coo, mó ca nda a laasiannda kpow, kani vana-vana va kelaa o yɔŋ vɔɔndo nin.

¹³ O kon, mó dimul Noe aa: «I cii kiolɔɔ o kɔl nuu nin le vanndacieea ciiyo o ceendo coo. Kani a cii ceendo tɛɛmbuu a kɔlvesɛiyo. I co nda cii mì faŋa nda o ceendo coo.

¹⁴ Lelan, siɔl dɛ̀ndɛ̀ bɛndu-bɛndoo a pɛngɛn yɔm siprɛs, mà tosa kungulan lenin taw, mà yikpa ndu lenin a lekɔɔli.

¹⁵ Mɛɛ n bɛnda le ndu siɔlɔɔ yɛ co hoo ni: bandei dunndo kɛmɛ leyáá, buo dunndo beleŋuɛɛnu, simndan dunndo beleyaa.

¹⁶ Mà cua yindɔɔ o dɛ̀ndɛ̀ kalaa coo, mà mɛi fondaa bandei dunndo lepilɛ o yindɔɔ a nɛɛ kpengon mɛɛlu coo-a tɛɛn, mà soli dioo o kpengei ipilɛ. Mà tosa dɛ̀ndɛ̀ kalaa helɔɔ leyàá.

¹⁷ Kani i co hunɔɔ mɛmma bɛnduan soli o lɛŋnden coo, mì tɛɛmbuu ɲɛ-ɲɛ co yoomu. Ɲɛ-ɲɛ co o lɛŋnden coo co hunɔɔ yɛɛvɛ dɔwnɔn.

¹⁸ Kɛ i yii kpemaa le nɔm ciindiaa. A co hunɔɔ luɛyɔɔ o dɛ̀ndɔ̀ɔ́ nin niaa laa nɔm, poaa nɔmnda a laandaa poaa nɔmnda.

¹⁹ A bɛnda ma lueinun visia a cɔlua súúlan kpow ikɛi o dɛ̀ndɔ̀ɔ́ nin. Visia súú-súù n va pɛ lueiyo, a luei o piaandoo a o laandoo, haliko mi kan lo yoomu.

²⁰ Ɲaa yoomaa súúlan kpow a hunnin nɔm ikɛi o dɛ̀ndɔ̀ɔ́, haliko ma cinda: visia pɔm-pɔmbɔa kela lɛŋ-nda, a bɛndua a yowva.

²¹ Cua ɲɛm dian súúlan kpow mà mandan ikɛi le dioo niaa vanndacieea a cɔlua vanin nɔm ikɛi-ya.»

²² Mí Noe tosa lende, ɲɛ-ɲɛ Hala dimul ndu le tosaa, mó tosa kpafii.