O Kandɔɔ 5 - BII BILA

Diola vanaa masindɛa: cɔnɔnndo a Adam kɔ tiiyaa a Noe

¹ Sɛbɛ diola cuavaa Adam-nda a cuavaa ndɔa imamaa co hoo ni: paale Hala cɔw vanndacieea len, mó toosiaa nda a velan ndɔɔ.

² Vanapɔnɔɔ a vanalanɔɔ o cɔw ni, mó dɔaw nda duaa. Paale o cɔw nda len, mó ke nda diolan aa vanndacieea.

³ Mɛɛ Adam sɔla vɔsilan kɛmɛ a beleyaa, mó vialu hɔ́ɔ́ piaandoo, mí hɔ́ɔ́ kon vial ndu taw. Mó ke ndu diolan aa Sɛt.

⁴ Mɛɛ Adam velu Sɛt, mó cii yoomu vɔsilan kɛmɛ leŋɔmaa, mó vialu vɛlɛ cuavaa celen: a piaandua a à laandua.

⁵ Adam cii yoomu o ceendo coo vɔsilan kɛmɛ leŋɔmahiɔɔlu a beleyaa malan o vu.

⁶ Mɛɛ Sɛt cii vɔsilan kɛmɛ a laŋuɛɛnu, mó vialu Enɔs.

⁷ Mɛɛ o velu Enɔs, mó tosa vɛlɛ vɔsilan kɛmɛ leŋɔmaa a laŋɔmmɛw, mó vialu cuavaa celen: a piaandua a à laandua.

⁸ O cii vɔsilan kɛmɛ leŋɔmahiɔɔlu a tɔ́ a latiɔn malan o vu.

⁹ Enɔs ndóò nɔ vɔsilan belaŋɔmahiɔɔlu, mó vialu Kenan.

¹⁰ Mɛɛ o velu Kenan, mó tosa vɛlɛ vɔsilan kɛmɛ leŋɔmaa a tɔ́ a laŋuɛɛnu, vialu cuavaa celen: a piaandua a à laandua.

¹¹ O cii vɔsilan kɛmɛ leŋɔmahiɔɔlu a laŋuɛɛnu malan o vu.

¹² Kenan ciiyo vɔsilan belaŋɔmmɛw, mó vialu Mahalaleɛl.

¹³ Mɛɛ o velu ndu, mó tosa vɛlɛ vɔsilan kɛmɛ leŋɔmaa a belehiɔɔlu, mó vialu cuavaa celen: a piaandua a à laandua.

¹⁴ O cii vɔsilan kɛmɛ leŋɔmahiɔɔlu a tɔ́ malan o vu.

¹⁵ Mahalaleɛl ndóò ciiyo vɔsilan belaŋɔmpum a laŋuɛɛnu, mó vialu Yerɛd.

¹⁶ Mɛɛ o velu ndu, mó cii vɛlɛ vɔsilan kɛmɛ leŋɔmaa a beleyaa, mó vialu cuavaa celen: a piaandua a à laandua.

¹⁷ Mahalaleɛl cii vɔsilan kɛmɛ leŋɔmaa a belaŋɔmahiɔɔlu a laŋuɛɛnu malan o vu.

¹⁸ Yerɛd ndóò ciiyo vɔsilan kɛmɛ a belaŋɔmpum a latiɔn, mó vialu Henɔk.

¹⁹ Mɛɛ o velu Henɔk, mó tosa vɛlɛ vɔsilan kɛmɛ leŋɔmaa, mó vialu cuavaa celen: a piaandua a à laandua.

²⁰ Kpow-kpow, Yerɛd cii vɔsilan kɛmɛ leŋɔmahiɔɔlu a belaŋɔmpum a latiɔn malan o vu.

²¹ Henɔk ndóò ciiyo vɔsilan belaŋɔmpum a laŋuɛɛnu, mó vialu Matusalɛm.

²² Mɛɛ o velu Matusalɛm, mó tosa vɛlɛ vɔsilan kɛmɛ leyáá o diom pilɔɔ nin nda Hala, mó vialu cuavaa celen: a piaandua a à laandua.

²³ O cii o lɛŋnden coo vɔsilan kɛmɛ leyáá a belaŋɔmpum a laŋuɛɛnu.

²⁴ Mɛɛ o vili ceen ndɔɔ o diom pilɔɔ nin nda Hala yɛ, mó lo vannda o hɔl, kani mí Hala heelun ndu ikɛi.

²⁵ Matusalɛm ndóò ciiyo vɔsilan kɛmɛ a belaŋɔmaa a laŋɔmmɛw, mó vialu Lemɛk.

²⁶ Mɛɛ o velu Lemɛk, mó tosa vɛlɛ vɔsilan kɛmɛ leŋɔmmɛw a belaŋɔmaa a latiɔn, mó vialu cuavaa celen: a piaandua a à laandua.

²⁷ O cii vɔsilan kɛmɛ leŋɔmahiɔɔlu a belaŋɔmpum a laŋɔmahiɔɔlu malan o vu.

²⁸ Lemɛk ndóò ciiyo vɔsilan kɛmɛ a belaŋɔmaa a latiɔn, mó vialu poo,

²⁹ mó ke ndu diolan aa Noe. Mó dimi aa: «Hoo yɔngunin naa kɔlɲuloo le valta naalan a le bɛpɛla naa n co hoo o lɛŋnde Mɛlɛka dɔw len danga len coo-o ni.»

³⁰ Mɛɛ Lemɛk velu Noe, mó tosa vɛlɛ vɔsilan kɛmɛ leŋuɛɛnu a belaŋɔmahiɔɔlu a laŋuɛɛnu, mó vialu cuavaa celen: a piaandua a à laandua.

³¹ O cii vɔsilan kɛmɛ leŋɔmmɛw a belaŋɔmmɛw a laŋɔmmɛw malan o vu.

³² Mɛɛ Noe cii vɔsilan kɛmɛ leŋuɛɛnu, mó vialu poaa nda yáá: Sɛm, Ham a Yafɛt.