O Kandɔɔ 43 - BII BILA

Yakɔb cɛl le Bɛnyamɛn malɔɔ kɔlan Esipte

¹ Yima fofolan ma va hiovɔɔ laci tuŋ o lɛŋnde Kanaan-nden nin.

² Mɛɛ yungu Yakɔb-o cii malun nda fula Esipte-on dio kpede, mí Yakɔb dimul poaa ndɔa aa: «La muungu Esipte mì la kɔ pindu naa baloo ɲɛ-pɔmbɔ.»

³ Mí Yuda mulul ndu aa: «Langbanɔ co lɛŋnde len bollen-ndo dimul naa ndi kpéŋ-kpéŋ maa te naa n kue a pɔmbɔ naa le, hali mì naa n fula lɛ ndu o hɔl te.

⁴ Lelan, taa cɛl pɛ mì n kɔɛ a Bɛnyamɛn pɔmbɔ naa, n kɔ pindul nɔm baloo.

⁵ Kɛ taa cɛl mì n kɔɛ naa ndaa le, mɛɛ n kuenin tei. Kani langbanɔ kon dimul naa ndi kpendekele maa te n kue a pɔmbɔ naa le, n fúlà lɛ ndu o hɔl te.»

⁶ Mí Israɛl fuɲa nda dimi aa: «Dɛnɛ yɛɛ niaa kondul-lɛ ya hoo? Le yɛɛ niaa dimul-lɛ langbanɔ kon maa la nɔ vɛlɛ pɔmbɔɔ?»

⁷ Kɛ má mulul ndu aa: «Ɲuuniaa langbanɔ kon ɲuuniaa naa ni tɛɛ-tɛɛ o naa pila coo a o vanayan naan coo. Mó ɲuna naa aa: Fuɲa niaa co vɔ yoomu? La nɔ vɛlɛ pɔmbɔ celen? Mí naa bɛɛ n muli ɲuuniaala lan. N ve sina maa o dimulnin naa le ndu pɔmbɔ naa yoo le.»

⁸ O kon mí Yuda dimul Israɛl fuɲa nda aa: «Pua, cɛl mà sɔɔ ya poombɔɔ o ba, mì n kɔɛ a ndu, haliko mi n baŋa yoomu naa. Te o co kon te, naa kpede n co piɔ́mndo sɔla. Kandɔɔ nɔm pila, naa, kɔ bii cuavaa naa, vuo naa kpede n co ndei!

⁹ Poombɔɔ co va o ba nuu bɛngu. Ya n bɛnda ma ɲuna le sɔɛi ndɔɛi ni. Te i mingul nɔm ndu nanu le, te i cuu nɔm ndu le, mɛɛ ya haki kon co va coo nɔm o hɔl le lɔ́ɔ́-lɔ́ɔ̀ ni.

¹⁰ Te náà n hun viw nanu a kiisanndo le, maa náà n muungu nin bɛmbɛ lediin.»

¹¹ O kon mí fuɲa nda dimul nda niko o mɛɛlulan aa: «Te mɛɛ tosaa celen co dɔ́ɔ́ le, mɛɛ i yeema mì la tosa ɲɛ pum: la cua ɲɛm vaan kɛndɛ-kɛndɛn co o lɛŋnde naalen nin-ndon, mì la vow o bɔlɔla niaalan nin, mì la yoo langbanɔ kon. La cua bom ɲɛ-pɔmbɔ a lɛan ɲɛ-pɔmbɔ, mì la cua ɲɛm cun kɛndɔn, mir, pistas a amanndeon.

¹² La cua volion taw mì la kɔ mingi volin nda sɔɔ o bɔlɔla niaalan nin o hunɔɔ-on. Bɔɔle pɔɛɛnɔnndo ndáà pɔɛɛnun ni.

¹³ La cua pɔmbɔ niaa mì la kɔɛ a ndu. La muungu langbanɔ kon o ibuŋ.

¹⁴ Màá Hala Vana-Kpaayaa-Kpow tosa mì langbanɔ kon ce niaa ɲia telen niaa tiiyanin o ndu lo-o! Màá o mingul niaa Simeɔn mò mal vɛlɛ niaa hunɔɔ a Bɛnyamɛn! Le ya yɛ, te o va pɛ maa hiɔlɔnndo koni cuawva ha hɛlun ya nuaa ni, mɛɛ o va lende.»

¹⁵ O kon, má cua ɲɛm kɛndɛn fuɲa nda dimul nda le langbanɔ kon yoo-on, má cua volin ndáà nɔ makoo-on kundalan latiɔn, má cua Bɛnyamɛn, má bii nɛiyo le kɔlan. Mɛɛ nda tiiya Esipte, má kɔ cɔmnun Yosɛf.

Yosɛf yaw ɲɛdiaa le bɛndaa ndɔa

¹⁶ Mɛɛ Yosɛf ce Bɛnyamɛn bɛndaa ndɔa tɛɛn, mó dimul vana va cɛi ndɔɔ hɔlten coo-o aa: «Kɔ yiya vannda ha o ya lo cɛinin, mà dii cɔloo, mà yaw ndu. Kani naa ndaa co hau ɲɛdiaa ipalaa dio latulu ni.»

¹⁷ Mí vana va cɛi ndɔɔ hɔlten coo-o tosa mɛɛ o dimul ndu yɛ, mó yaa vanaa kan o yiya o vana ndɔ bɛndoo lo cɛinin.

¹⁸ Mí siòònde bii nda le yɔɔ nda yɛɛ nda o yiya o Yosɛf lo cɛinin-ndo, má dimulan aa: «Le volin naa n saalun lɔ́ɔ́ kon o bɔlɔla naalan nin-ndon nda hin a naa nanu nuaa ni. A co naa delɔɔ coo mà siinguu naa cɛa, mà puu naa sofɛlɛa naa o laba.»

¹⁹ Má sɔɔnguu vana va cɛi Yosɛf-o hɔlten coo-o ikɛi o cɛiyo sondoo,

²⁰ má dimul ndu aa: «Vana bɛndoo, mal naa haki yandi. N hin nin nanu lepilɛ le baloo piondɔɔ.

²¹ Mɛɛ naa n tiiya o fondaa pum, mí n lɔl lon. Mɛɛ naa n kumbi bɔlɔla naalan, mí vana-vana saalun volin ndɔn o bɔlɔ ndɔɔ nin mɛɛ o yɔngu le balo kon piondɔɔ yɛ kpafii. Kɛ n hin a volin kalan,

²² n hin vɛlɛ a volin celen le baloo piondɔɔ. N sínà vana mingi volin mun vow o bɔlɔla naalan nin-ndo le.»

²³ Mí langbanɔ kon dimul nda aa: «Siòòŋii bii niaa le. Hala niaa, Hala fuɲa niaa co biiloo-o vow ɲɛ-sɔlaa o bɔlɔla niaalan nin ni. Le volin niaan yɛ, mí ndáà yɔngu ya mun.» O kon kɔɔli, mó soli Simeɔn o kaasoo, mó yoo nda ndu.

²⁴ Mó luei nda niko o Yosɛf lo cɛinin. Mó yɔngu nda mɛnndan le pelon pulɔɔ, mó yɔngu sofɛlɛa ndaa billo le dioo.

²⁵ Mí bɛndaa Yosɛf-a nda toosiaa pɔɔ ɲɛm ndáà yoo ndu-on telen pá mí ɲɛdiaa ipalaa cuu toosiaa. Kani ndáà tuei nin maa lon nda co ɲɛdiaa ipala kon dio ni.

²⁶ Mɛɛ Yosɛf muungu o ndu lo cɛinin ndon, má yɔngu ndu ɲɛm ndáà yoo ndu-on, má baŋ vulan ndu o labɛngunin.

²⁷ Mó ɲuna nda la vaa kɔɔli, mó ɲuna nda aa: «Vɛ̀ɛ̀ fuɲa niaa yuuvɛi niaa dimul-la sɔɛi ndɔɛi-yo co kɛndɛ?»

²⁸ Má baŋ vulan ndu o labɛngunin, má muli aa: «Buɛi nɔmndo, o co fuɲa naa-o co vɔ yoomu. O connun kɛndɛ.»

²⁹ Mɛɛ o mɛɛndan Bɛnyamɛn pɔmbɔ ndɔ, o nda fula kala pilɔɔ-o, mó ɲuna nda aa: «Mò va maa pɔmbɔ niaa lum niaa dimul-la sɔɛi ndɔɛi-yo co hoo ni?» Mó cɔɔlu dimi aa: «Màá Hala tosal nɔm dɛnɛ kɛndɔɔ, ponndo!»

³⁰ Mí Yosɛf fula a kiltan, kani mɛɛ o ce pɔmbɔ ndɔ, mí mɔnɛi bii ndu, mó nuwviaa fondaa le kɔlan caŋndo, le mɛmɛma va ndu o hɔl-lan tuisio, mó luɛi o cɛi ndɔ lalɔllo nin, mó koŋul.

³¹ Mɛɛ o cii caŋndo, mó pulu hɔlla, mó fula. Mó saa kɔl ndɔɔ, o ceŋ ndɛ le. Mó dimi le nda ɲɛdiaa yɔngoo.

³² Má yɔngu nda ɲɛdiaa a kundalan yɛ́-yɛ́. Má yɔngu ndu Yosɛf ɲɛdiaa o ndɔɔ, má yɔngu bɛndaa ndɔa lánda, má yɔngu vɛlɛ Esiptea va dioo nda ndaa-a lánda, kani Esiptea cɛ̀l le ɲɛdiaa dioo nda Hebreea latulu le, dɛnɛ nɔɔlɛi bɛndoo pila nda ce ken ni.

³³ Mà kɛsi bɛndaa Yosɛf-a ndu Yosɛf laci sakpo a kaasonyɛi, kandɔɔ a bɛ nda tasoo, mà kɔ mɛɛlu a lumndo. Mà va nuannanndo vellaa-velle a kɔndɔfillo.

³⁴ Mí Yosɛf dimi aa a yɔngu nda ɲɛm dian ndu pila va dioo-on. Má yɔngu Bɛnyamɛn ɲɛm dian bɛmbɛ leŋuɛɛnu hiovɔɔ n nda ke bɛndaa ndɔa tɔ̀a-on coo. O kon, má kol ɲɛkɛndɛi nda ndaa.