O Kandɔɔ 41 - BII BILA

Lɔma Faraɔnnɔɔ sɔl-lan

¹ O sɔɔn mun kɔɔli, mí vɔsila tiɔn la hiaw. Paale pilɛ, mí Faraɔnnɔɔ sɔl lɔan. Mó cannun isisi o pee bɛndoo Nil kɔngɔ.

² Mó ca navaa kɛndɛ-kɛndɛa celulaa fulaa o peelo nda ŋɔmmɛw, má va diólan o kɔngɔɔ demullo.

³ O kon kɔɔli, mí navaa celen a fula vɛlɛ o peelo nda ŋɔmmɛw, a va a vɔɔn-vɔɔn, a ɲavɛi sɛ́ɛ́n. Má hun sim navaa tasea celulaa fula-a ikɛi o peo kɔngɔ.

⁴ Mí navaa ŋɔmmɛvaa ɲavɛyaa vɔɔŋaa kan a tisa navaa ŋɔmmɛvaa kɛndɛ-kɛndɛa celulaa coo, má dia nda kpow. O kon, mí Faraɔnnɔɔ yinga o lɔan.

⁵ Mó muungu vɛlɛ o lɔan cundun. Mó sɔl lɔma diinndɔan, man ma yɔŋnun man ni: yasalan n'maltan la va cuuloo tan ŋɔmmɛw o tum pilɔɔ coo, yasala lan láà luɛi kúlú taw, láà naŋ vɛlɛ o tofaa taw.

⁶ O kon kɔɔli, mí yasala celen la cuulu o lataselan kɔɔli tan ŋɔmmɛw, lan la va lafoofiɛilan. Mí hoeyii tuvii fula a ba paalen le can-ndo-e veesiaa lan kékélé.

⁷ Kɛ mí yasala foofiɛila lan la misimisi yasala kɛndɛla ŋɔmmɛwla luɛi lan kúlú lan. O kon, mí Faraɔnnɔɔ yinga, mó tiandu, mó sina maa lɔan o va sɔl kon ni.

⁸ Idiiyo, mó va buulanndo taw, mó veelu vanaa viamaa yavaa a vanaa kɔlkalua Esipte kpow, mó tombolal nda lɔma sala tiɔmma o sɔl man-ndan. Kɛ vana pilɛ bɛɛ nɔ́lá ndu kɔlɔ lɔma sɔlaama man tɛɛsiallo le.

⁹ O kon mí bolle vanaa yɔngù masaa mɔiyan-nda cua sɔɛi, mó dimul Faraɔnnɔɔ aa: «I sɔlɔlan-ndɔ hau tɛɛmbuu nuu.

¹⁰ Telen pilɛ, mí nɔm óò tuulu kɔl a naa vanaa nɔmaa baalaa, má bii ya, má mal-la o kaasoo naa bolle vanaa loamaa bulua nɔmnda latulu o cɛi kaaso bolle vanaa màndà nɔm-nda nin.

¹¹ Icɔllo pum, mí n sɔl lɔan naa bolle vanaa loamaa bulua, ma kɛ́-kɛ̀ máà nɔ kɔlɔ ndɔ.

¹² Nduyɛ poombɔ Hebreenɔɔ pum va naa ikɛi o kaasoo lon. Vana baala bolle kpalilaa kàndà nɔm-nda o va ni. Mí n cɔm ndu lɔma naa n sɔl man-ndan, mó tɛɛsial naa kɔlɔ lɔma sɔlaama sala tiɔmma man.

¹³ Mí sɔɔn tosan mɛɛ o tɛɛsial naa yɛ kpafii. Mí ya i muungu o fonda ni ya va baalaa-o, má landu bolle vanaa loamaa bulua o yɔmndo.»

Yosɛf tɛɛsiaa lɔma Faraɔnnɔɔ sɔl-lan

¹⁴ O kon mí Faraɔnnɔɔ viam vannda le kɔlan hunɔɔ a Yosɛf. Má kɔa cɔ́-cɔ́, má kɔ soli ndu o kaasoo, má sendi ndu, má soli ndu volɔɔla va ndu lekɔɔlan, má vow ndu volɔɔla celen. Má kɔa a ndu o Faraɔnnɔɔ lo.

¹⁵ Mí Faraɔnnɔɔ dimul ndu aa: «I sɔl lɔan, kɛ vana-vana tiwba le ya kɔlɔ ndɔɔ tɛɛsiallo le. Nduyɛ, i tuei maa nɔm, te vana cɔm nɔm pɛ lɔma sɔlaan, á tɛɛsial vana kon kɔlɔ ndɔɔ.»

¹⁶ Mí Yosɛf dimul Faraɔnnɔɔ aa: «O co ya le co tɛɛsiaa le, kɛ Hala co nɔm masaa kɔlɔ lɔma sɔlaama nɔmndan tɛɛsial ni.»

¹⁷ O kon mí Faraɔnnɔɔ cɔm Yosɛf lɔma o sɔl-lan aa: «O lɔma ya sɔl-lan nin, mí cannun isisi o pee bɛndoo Nil kɔngɔ.

¹⁸ Mí ca navaa kɛndɛ-kɛndɛa celulaa fulaa o peelo nda ŋɔmmɛw, má sim diólan o peo kɔngɔ.

¹⁹ Mí navaa celen a fula vɛlɛ nda ŋɔmmɛw o pee pilɛ kon nin o a tasea kan kɔɔli. Kan nda va a ɲavɛi sɛ́ɛ́n. Vɔwle ndáà vɔwlen, kabi bɛɛ i ci vɔ nawva vɔwlen lende o lɛŋnde Esipte len nin te.

²⁰ Kɛ mí navaa vɔɔŋaa ɲavɛyaa kan a tisa navaa kɛndɛa celulaa tasea coo, má misimisi nda kpow.

²¹ A misi nda misi nda kon-ndo kpow, vanáà ce pɛ aa a mil ɲɛ-ɲɛ le, má lonnun a ɲavɛi lende tuŋ maa paandu. O kon mí yinga, mí tiandu.

²² Mɛɛ ya muungu vɛlɛ o lɔan, mí sɔl lɔma diinndɔan: mí ca yasala n'malta kɛndɛ-kɛndɛlan o tum pilɔɔ tan ŋɔmmɛw, kúloo pila yasala lan láà luɛi ni.

²³ O kon kɔɔli, mí ca vɛlɛ yasala n'malta celen tan ŋɔmmɛw o lan kɔɔli, la va lafoofiɛilan. Mí hoeyii fula a ba paalen le can-ndo-e veesiaa lan kékélé.

²⁴ Kɛ mí yasala foofiɛila lan la misi yasala kɛndɛla luɛi lan kúlú lan. I cɔm vanaa viamaa yavaa a vanaa kɔlkalua lɔma sɔlaan man kpow, kɛ vana pilɛ bɛɛ tiwba le ya kɔlɔ ndɔɔ cɔmndo le.»

²⁵ O kon mí Yosɛf dimul Faraɔnnɔɔ aa: «Lɔma sɔlaama sala tiɔmma man kpede, lɔma pilɛan ma co ni, kɔlɔ pilɔɔ ma nɔ ni. Hala cɔm nɔm masaa ɲɛ o co hunɔɔ tosa-o nuaa ni.

²⁶ Navaa kɛndɛ-kɛndɛa celulaa ŋɔmmɛwva a yasala kɛndɛla ŋɔmmɛwla luɛi kúloo taw lan la co tɔɔmaseloo le vɔsilan laŋɔmmɛw ni, lɔma sɔlaama pilɛan kpé ma yɔŋnun ni.

²⁷ Navaa ŋɔmmɛvaa vɔɔŋaa ɲavɛyaa fula a tasea kɔɔli-a a yasala ŋɔmmɛwla foofiɛila hoeiye veesiaa lan, tɔɔmaseloo co kon le vɔsilan laŋɔmmɛw ni, vɔsila yima fofolan la vanin ni.

²⁸ Maa mɛɛ ya dimul nɔm Faraɔnnɔɔ yɛ, Hala cɔm nɔm ɲɛ o hun tosanin-ndo ni.

²⁹ Tofa vɔ, vɔsila ŋɔmmɛwla co hunɔɔ lan, ɲɛdiaa vanin taw-taw o lɛŋnde Esipte len nin kpede.

³⁰ Kɛ vɔsila lan la cuu pɛ, vɔsila ŋɔmmɛwla co hunɔɔ o lan kɔɔli lan, yima fofolan ma vanin taw. Fofola kon tosanin mì vannda pɔɛɛnun sɔɛi ɲɛdiaa bɛndu-bɛndu kei nda o ba-o. Kani fofola kon co hunɔɔ ɲɛ-ɲɛ cii o lɛŋnde Esipte len kpow nin.

³¹ Vannda pɔɛɛnunnin a ɲɛ nda sɔlanin o vɔsila taselan bɛngu-o pɔ́lì. Kani fofola luɛinin o lɛŋnden nden nin-ndo vanin o bɔɔ.

³² Taa ce pɛ má sɔl lɔan man sala tiɔn, kon co cɔmndo ni maa Hala cii dɛnɛ kon kiolɔɔ kpali, fɔ mò yɔŋnun kangalan. O viw lɛnin le ɲɛ o kelu kon-ndo tosaa le.

³³ Lelan masaa, hɛli vana nɔ kɔlkaloo a taasio-o, mà kɛsi ndu bollen o lɛŋnde Esipte len kpow coo.

³⁴ Mà hɛli vanaa cuungiaa ɲɛ-sɔlaa o kobila bɛndulan kpow nin, mì nda va ɲɔɔn keiyo cuaa o ɲɛm nda vanin kovɔɔ o vɔsila ŋɔmmɛwla kɛndɛlan nin-ndon coo o lɛŋnde Esipte len nin kpow. Ipilɛ nda bɛnda le faŋaa o ŋuɛɛnu oo ŋuɛɛnu coo ni.

³⁵ Mà cuungiaa ɲɛdiaa vanin fulaa o vɔsila ŋɔmmɛwla kɛndɛlan nin-ndo, mà luei maalon o cɛila mandaa ɲɛlan nin o ba nɔmndo bɛngu. Mà manda mun le vɔsila fofolalaa co hunɔɔ lan.

³⁶ Ɲɛdiaa nda cuungiaanin kon-ndo vanin o mandaa le lɛŋnden kpow o vɔsila ŋɔmmɛwla yima fofolan ma toalnin Esipte coo lan bɛngu ni. O kon, vanndacieea vi lɛnin a yiaan te.»

A kɛsi Yosɛf bollen o lɛŋnde Esipte len coo

³⁷ Mí tuu Yosɛf tuu kon-ndo hɛnan Faraɔnnɔɔ nda vanaa bɛndua kpow.

³⁸ O kon mí Faraɔnnɔɔ ɲuna vanaa bɛndua kan aa: «N sɔlanin pá vanndo o tiwnin ba le vali kon tosaa-o maa poo ho, o kɔl Hala-o co hoo nin-ndo?»

³⁹ Mó dimul Yosɛf aa: «Le tùú Hala cɔm nɔm sɔɔn mun kpow-vo, vana celen co mò nɔ kɔlkaloo a taasio maa nɔm te.

⁴⁰ Lelan, nɔm co va bollen o masale nilen coo ni, mì vanaa co o ba nuu bɛngu-a kpede a va nɔm o labɛngunin. Ya pila Faraɔnnɔɔ bɛɛ, ɲɛ ya hiawnin nɔm-ndo koni co le co ya co icali o kpɛŋɛ lemasaa nin-ndo ni.

⁴¹ Le hee, i suili nɔm, nɔm co nin lɛŋnde Esipte len kpow bollen ni.»

⁴² Mí Faraɔnnɔɔ solin kelɛi o isu, mó vow Yosɛf, mó vow ndu volɔɔla kolala keesela kɛndɛ-kɛndɛlan, mó vow ndu yɔlɔn n'sianion o labolo.

⁴³ Mó heelu ndu o ɲɛ ɲaanan ndɔ diinndɔ soa nan-ndo coo. Mí vannda va yondaa aa: «La mal nɛiyo.» Nuaa Faraɔnnɔɔ kɛsi Yosɛf vana bɛndoo o lɛŋnde Esipte len kpow coo ni.

⁴⁴ Mí masa kon dimul vɛlɛ Yosɛf aa: «Ya Faraɔnnɔɔ co masa lelɛŋndo ni. Kɛ nduyɛ, te nɔm Yosɛf cɛl te, o lɛŋnde Esipte len nin kpow, vana-vana hiiluu suei le, o co vɔ bɛɛ le pelei kpeŋaa le.»

⁴⁵ Mó ke Yosɛf diolan aa Safnat-Panea, mó ke ndu lanɔɔ, diolan Asnat, cua Poti-Fera va vana-solia-lasálàá Ɔn-ndo. Mí Yosɛf can, mó kɔa lɛŋnde Esipte len mɛɛndanndo.

⁴⁶ Ndóò nɔ vɔsilan beleyaa telen nda hin a ndu o Faraɔnnɔɔ lo-o, masaa Esipte pɛɛn. Mó faŋan o bɛ́ɛ̀ lemasaa nin, mó kɔa lɛŋnde Esipte len kpow balɔɔ.

⁴⁷ O vɔsila ŋɔmmɛwla kɛndɛlan bɛngu, mí ciɛɔn a tɔlɔɔlan la naŋ taw-taw o lɛŋnden coo.

⁴⁸ O vɔsila ŋɔmmɛwla lan nin, mí Yosɛf cuungiaa ɲɛdiaa o lɛŋnde Esipte len nin kpow. Mó kɛsi ɲɛdiaa kon o kobilan nin. O kobi oo kobi nin, mó manda ɲɛdiaa va fulaa o valta va tosanndo o tàndà kon nin-ndan nin-ndo.

⁴⁹ Mó manda maalon taw-taw, mí malun kalan kui mɛ̀ɛ́-mɛ̀ɛ́ sióónndon va o mɛmma ihɛllan kɔngɔ nuaa yɛ. A lo mun cuungiaa tei, ma sanga a cɔmndo. Vanáà nɔla lɛ mun tuu le.

Poaa Yosɛf velu-a

⁵⁰ Tuma pá mí yima fofolama man ma luɛi, mí Asnat, cua Poti-Fera va vana-solia-lasálàá Ɔn-ndo vilul Yosɛf poaa nda ŋiɔn.

⁵¹ Mó ke po ndɔ tasoo diolan aa Manase (kon co dimio ni aa «Vana yɔngu pɔɛɛnndan-ndo»), kani mó dimi aa: «Hala tosa mí pɔɛɛnun sangala kei ya coo lan kpow a sɛyan ya sɛyan a yungu fuɲa nuu-o.»

⁵² Mó ke po ndɔ diinndɔɔ diolan aa Efraim (kon co dimio ni aa «Vana kuiyàá»), kani mó dimi aa: «Hala nɛŋi ya ipulu o lɛŋnde ya va o mɔnɛi nin-nden nin.»

Yima fofolan ma luɛi

⁵³ Mɛɛ vɔsila ŋɔmmɛwla kɛndɛla ɲɔɔn va kuiyo lan la cuu,

⁵⁴ mí vɔsila ŋɔmmɛwla fofolalan la kandun mɛɛ Yosɛf ndóò dimi yɛ. Mí yima man má tiw o lɛŋnde kpow nin. Kɛ ɲɛdiaa va o lɛŋnde Esipte len nin taw.

⁵⁵ Mɛɛ ɲɛdiaa cuu Esiptea o ba, má kuel Faraɔnnɔɔ a cɛɛŋɔnndo. Mí Faraɔnnɔɔ dimul nda kpede aa: «La kɔ cɔm Yosɛf bahavɛi niaa mì la tosa ɲɛ o dimulnin niaa-o.»

⁵⁶ Mí yiaan má luɛi o tàndà kon nin kpow. O kon mí Yosɛf kumbi cɛila mandaa ɲɛla va o lɛŋnden nin-ndan kpede, mó va Esiptea baloo pisio o ba. Kɛ mí yiaan ma cɔɔlu vɛlɛ luɛyɔɔ o lɛŋnde Esipte len nin.

⁵⁷ Vannda va fulaa o lɛŋii balu tàndà kon-nde nin le kɔlan baloo piondɔɔ Yosɛf o ba Esipte lon, kani yima fofolan ma va ma bɔɔ o lɛŋnde kpow nin.