O Kandɔɔ 40 - BII BILA

¹ Dɛnɛ kon hiovɔɔ, mí vanaa bɛndua va masaa Esipte o ba bɛngu-a, bolle vanaa va masaa mɔiyan yɔngoo-a a bolle vanaa loamaa bulua, a del kasi a masa ndaa.

² Mí ndu Faraɔnnɔɔ tuulu kɔl a nda taw,

³ mó mal nda o kaasoo, o bolle vanaa kándà masaa-a lo cɛinin. Lon koni Yosɛf bɛɛ o kaasoo ni.

⁴ Mí bolle vanaa kándà masaa-a sɔaa nda Yosɛf o ba le nda hɔlten nɔu coo. Má cii telen pum o kaasoo lon.

Yosɛf tɛɛsiaa lɔma sɔlaama vanaa bɛndua va o kaasoo-a nda ŋiɔn

⁵ Icɔllo pum, mí bolle vanaa va masaa mɔiyan yɔngoo-a a bolle vanaa loamaa bulua masaa Esipte a sɔl lɔan nda ŋiɔn kpow o kaaso kon. Lɔma vana-vana sɔl-lan maa nɔ kɔlɔ ndɔ.

⁶ Diimandɔɔ idiiyo, mɛɛ Yosɛf kɔɛ o nda lo, mó ca nda kɔɔyɔlɔɔ a buulanndo.

⁷ Mó ɲuna vanaa baalaa Faraɔnnɔ-aa kan, a va kan o kaasoo o cɛi kaaso vana ndɔ bɛndoo nin-nda aa: «La vɛ hau calle nuaa kɔɔyɔlɔɔ a buulanndo?»

⁸ Má mulul ndu aa: «Lɔan naa n sɔl ni, kɛ vana co nanu le naa kɔlɔ ndɔɔ cɔmndo le.» Mí Yosɛf dimi aa: «O co macoaa Hala le tɛɛsiaa kɔlɔ lɔma sɔlaan te? La cɔm-ndɔ ya lɔma niaa sɔl-lan.»

⁹ O kon mí bolle vanaa va masaa mɔiyan yɔngoo-a tombola lɔma o sɔl-lan, mó dimi aa: «O lɔma ya sɔl-lan nin, mí cannun rɛsɛn tumndo ya laci,

¹⁰ lɛwvon va o rɛsɛn kon coo mún yáá. Mó kandu dɔ́ɔ́ kuumiaa, mó yandu, mí rɛsɛŋun va o kpɔ̀nyɔ̀lan-ndon diw.

¹¹ Taala kólaa Faraɔnnɔɔ va ya o ba, mí kiandu rɛsɛŋun mun, mí vayia mun, mí mɔiyan ma fula, mí haw man o taala kólaa ndɔ kon nin, mí yɔngu vana ni bɛndoo taala kólaa kon.»

¹² Mí Yosɛf dimul ndu aa: «Yaŋ nilan o kɔlɔ lɔma sɔlaan man: lɛvun yaa-on co palɛi ndii yáá ni.

¹³ Nanu a palɛi ndii yáá, Faraɔnnɔɔ co nɔm yiyan coo. O co nɔm mingi o vali nɔmndo nin, ma múúngu ndu mɔiyan yɔngoo mɛɛ nɔm óò tosa paandu telen n va baala kon tosaa ndu o ba bɛngu-o yɛ.

¹⁴ Kɛ a yandi fallo, te sɔɛi nɔmnde cuu pɛ toosian, mà muungu o vali nɔmndo nin, yiyan ya coo ma tuinun ya iɲíí, ma soo o Faraɔnnɔɔ lo, mò soli ya o kaasoo ho.

¹⁵ Kani o lɛŋnde Hebreea nin nda bii ya a paa-kala ni, má hun a ya nanu. Nduyɛ, nanu bɛɛ i tosa dɛnɛ vana mal vana o kaaso le.»

¹⁶ Mɛɛ bolle vanaa loamaa bulua ce maa Yosɛf caa lɔma caan ndɔ sɔl-lan tɛɛsiaa, mó dimul ndu aa: «Ya bɛɛ mí sɔl lɔan, man ma co man ni: kambɛila bululan la va ya o lebol tan yáá.

¹⁷ O kambɛi va lecoo-o nin, ɲɛm dian kɛndɛ-kɛndɛn ndáà toosiaa le Faraɔnnɔɔ-on va lenin. Kɛ yowva va hunɔɔ ɲɛm dian mun dioo o kambɛi kon nin ya o lebol.»

¹⁸ Mí Yosɛf dimul ndu aa: «Lɔma n sɔl-lan kɔlɔ ndɔɔ co hoo ni: kambɛila yàálan la co palɛi ndii yáá ni.

¹⁹ Nanu a palɛi ndii yáá, Faraɔnnɔɔ co nɔm bollen faŋa o kɛsei coo, o co nɔm landɔɔ o yɔm bɛndoo mì yowva hun dio visin nɔmndon.»

²⁰ Mɛɛ palɛi yaa hiow, mí Faraɔnnɔɔ tuisi kafoo le paale o velun-nden yelelaa. Mó toosiaa ɲɛdiaa kafoo le vanaa bɛndua kpow.

²¹ Mó mingi ɲinkon bolle vanaa yɔngù ndu masaa mɔiyan-nda o baala ndɔɔ nin, mí ndu muungu vɛlɛ ndu mɔiyan yɔngoo.

²² Mó landu ɲinkon bolle vanaa loamaa bulua masaa. Mí sɔɔn tosan mɛɛ Yosɛf cɔm nda kɔlɔ lɔma sɔlaama ndan yɛ kpafii.

²³ Kɛ bolle vanaa va masaa mɔiyan yɔngoo-a loonun a Yosɛf le, mó pɔɛɛnun a sɔɛi ndɔɛi.