O Kandɔɔ 39 - BII BILA

Yosɛf tiiya o Potifar lo

¹ Mɛɛ nda tiiya a Yosɛf o lɛŋnde Esipte len nin, mí Ismaɛlaa pendu ndu kan-nda pisi ndu vana bɛndu pilɛ o ba diolan Potifar, langbanɔ kon va bolle vanaa kándà masaa-a Esipte ni.

² Mɛlɛka va Yosɛf ikɛi, ɲɛ-ɲɛ o va tosaa va ndu bɛndaa o ba. O va Esipte lon o vana ndɔ bɛndu pendu ndu-o lo.

³ Mí Potifar sina maa Mɛlɛka va Yosɛf ikɛi, ɲɛ-ɲɛ Yosɛf va tosaa, mí Mɛlɛka va ndu nɛŋio.

⁴ O kon mó ca Yosɛf ɲia taw, mó sɔaa ɲɛm ndɔn ndu o ba. Mó siinguu ndu vana nɔ hɔlten cɛi ndɔɔ coo-o, mó sɔaa ɲɛm ndɔn sɔlan ndu o ba le mun mandaa.

⁵ Kandɔɔ telen kon, mí Mɛlɛka dɔaw cɛi Potifar Esiptenɔ-o duaa le va Yosɛf va lon-ndo. Ɲɛm va ndu o ba cɛinin-ndon a ɲɛm va ndu o ba yondoo nin-ndon kpow, mí Mɛlɛka dɔaw mun duaa.

⁶ O kon, mí Potifar sɔaa Yosɛf ɲɛm ndóò nɔ-on kpede o ba. Potifar ve lɛ ɲɛ-ɲɛ celen tosa le, fɔ ɲɛdiaa o va dioo-o. Yosɛf ndóò naŋ hɔlla taw, sálámaa lekɛ́ndɛi o va ni.

Yosɛf nda lanɔɔ Potifar

⁷ Mí lanɔɔ vana ndɔ bɛndoo fula ndu lehɔl, mó dimul ndu aa: «Hun ma vá a ya.»

⁸ Kɛ mí Yosɛf kɛɛ, mó dimul ndu aa: «Vana ni bɛndoo cua cɛi ndɔɔ kpow mó sɔaa ya o ba, o ɲuna ya kona le ɲɛ-ɲɛ co nanu le, ɲɛm ndɔn sɔlan kpede ya n co o ba ni.

⁹ O hiw lɛ ya ivanabɛnduya cɛinin nanu le, o tuŋ ya ɲɛ-ɲɛ celen te, fɔ nɔm, kani laa ndɔ n co ni. Le yɛɛ nɛ ya tosa yɛnin dɛnɛ kɔlvesɛi bɛndu vaa lende mì cua hakio a Hala?»

¹⁰ Lepalaa-lepala, o va Yosɛf fɛlafɛlaa, kɛ Yosɛf ve lani yaŋɔɔ o sɔɛi ndɔɛi le. O cɛl le dɛnɛ tɛɛmbuu nda ndu le few.

¹¹ Paale pum niko, mí Yosɛf luɛi cɛinin le vali ndɔɔ tosaa, vanaa va nda o ba bɛngu-a ve cɛinin te.

¹² Mí lanɔɔ Potifar kon bii dɔ́ɔ́ Yosɛf domaa, mó dimul ndu aa: «Vá a ya!» Kɛ mí Yosɛf hulu domaa, mó mɛi ndu ndu o ba, mó ɲaanun, mo fulan o bɛ́ɛ̀.

¹³ Mɛɛ o ce maa Yosɛf mɛi ndu domaa o ba mó fulan o bɛ́ɛ̀,

¹⁴ mó yonda coocoo, mó veelu vanaa va nda o ba cɛinin-nda, mó dimul nda aa: «La ce dɛnɛ nɛ vannda! A cuu naa Hebreenɔɔ le naa bɛ̀ɛ̀lan tɛɛmbuuo. Kpuvaa o hun kpuva ya ni le hinilan a ya, kɛ mí yonda coocoo.

¹⁵ Mɛɛ o ce maa i co yondaa coocoo le vannda veeloo mà hun mala ya, mó ɲaanun o bɛ́ɛ̀, mó mɛi doma ndɔɔ ya o ba.»

¹⁶ Mí cua kon manda doma Yosɛf kon háá mí pɔnɔ ndɔ muungu cɛinin.

¹⁷ Mó downun ndu kona, mó dimi aa: «Cɛ Hebreenɔ n pendu hoo má cuu naa ndu-o hin ma hunaa le naa bɛ̀ɛ̀lan tɛɛmbuuo. O hun kpuva ya le hinilan a ya.

¹⁸ Kɛ mɛɛ ya kandu yondaa le vannda veeloo, mó mɛi doma ndɔɔ ya o ba, mó fulan o bɛ́ɛ̀ a kiltan.»

¹⁹ Vana bɛndu Yosɛf-o tueyɔɔ sɔɛi he laa ndɔ o sondo, mó tuulu kɔl taw-taw.

²⁰ Mó bii Yosɛf, mó mal ndu o kaasoo nɛɛ vanaa masaa mal o kaasoo-a va-a. Nuaa Yosɛf luɛi o kaasoo ni.

Dɛnɛ Yosɛf-o o cɛi kaasoo nin

²¹ Kɛ Mɛlɛka va Yosɛf ikɛi mó va ndu dɛnɛ kɛndɔɔ tosallo, mí vana va vanaa kaasoa bollen-ndo ca Yosɛf ɲia taw.

²² Mó yɔngu ndu vallo le vanaa kaasoa kpow hɔlten nɔu coo a le ɲɛ-ɲɛ nda va tosaa lon simndan laci.

²³ O ve lɛ Yosɛf lehɔl kɔɔli le, kani Mɛlɛka va Yosɛf ikɛi, ɲɛ-ɲɛ o va tosaa, mí Mɛlɛka va ndu nɛŋio.