O Kandɔɔ 35 - BII BILA

Yakɔb faŋan Sikɛm mó kɔ cal Betɛl

¹ Mí Hala dimul Yakɔb aa: «Faŋan nanu. Kɔnnun Betɛl mà kɔ cal lon, mà cow ya fonda-loamaa-lasálàá, ya Hala cɔmnun nɔm telen n va Esau bɛ nɔm ɲaanɔnndo-o pɛɛn.»

² O kon, mí Yakɔb dimul yungu ndɔɔ a vanaa va ndu o ba bɛngu-a kpede aa: «La faŋa piɔmaa co naa tɛɛn-nda naa tɛɛn few-few. La dindin, mì la mangala volɔɔla niaala cuɛinanndan.

³ N co faŋan nanu mì n kɔɛ Betɛl. N tiiya pɛ lon, i cɔw fonda-loamaa-lasálàá le Hala mulul-la piɛilen lɔ́ɔ́ ya va o dɛnɛ palaa nin-ndo-o, ó lo ya ikɛi o kela nuu nin-ndo pɛɛn.»

⁴ Má yɔngu Yakɔb piɔmaa va nda o ba-a a kelan sálàn va nda o lani-on kpede. Mí Yakɔb kumbu piɔmaa kan a kelan sálàn mun lɛŋ o yɔm bɛndu va Sikɛm ikɛi-yo bɛngu.

⁵ O kon kɔɔli, má puusiaa dɔ́ɔ́ngɔ́ ndaa le kɔnndan. Mí Hala luei kobila balu lon-ndan siòònde taw háá vana-vana dim poaa Yakɔb-a le.

⁶ Mí Yakɔb tiiya Lus nda vanaa va ndu kɔɔli-a kpow, Lus kon va Betɛl ni, o lɛŋnde Kanaan-nden nin.

⁷ Mó cɔaw fonda-loamaa-lasálàá lon, mó ke fonda kon diolan aa Ɛl-Betɛl (kon co dimio ni aa «Hala Betɛl-lo»). Kani o fonda kon Hala cɔmnun ndu telen o va Esau bɛ ndɔ ɲaanɔnndo-o ni.

⁸ Lon Debora, vana biyaa n'cuaw Rebeka-o vi ni, má kumbu ndu Betɛl ciee-lekɔɔ o yálánndo pum bɛngu. Kandɔɔ ɲinkon, má ke yɔm bɛndu kon diolan aa «Yɔm caŋndo.»

⁹ Mí Hala ndóò cɔmnun vɛlɛ Yakɔb telen o va fulaa Padan-Aram-ndo, mó dɔaw ndu duaa.

¹⁰ Mó dimul ndu aa: «Diola nɔmndan aa Yakɔb. Kɛ a nɔ lɛnin ladio lende le, diola nɔmndan nin aa Israɛl»

¹¹ Mí Hala dimul ndu vɛlɛ aa: «Ya co Hala Vana-Kpaayaa-Kpow ni. Lelan, naŋ ipúlú mà sɔla cuavaa-imamaa taw. Yungulan a vanaa-mangalaa-isɔɔa súúlan taw a fulanin o polale nɔmnden nin. Masaa fulanin o cuavaa-imamaa nɔmnda tɛɛn.

¹² Lɛŋnde ya yɔngu Abraham nda Isaak len, i co nɔm nden yɔngu niaa cuavaa-imamaa nɔmnda nɔm kɔɔli.»

¹³ O kon mí Hala faŋan ndu ikɛi nɛɛ o va sɔɛi o ndu lo-a.

¹⁴ Mí Yakɔb baŋ pow sálàá o fonda Hala soo kon o ndu lo-o kpeekpei. Mó soli sálà mamɔiyo lon, mó cuiŋi mɔima man o pow sálà kon coo, mó tala cuɛiyan lecoo.

¹⁵ Mí Yakɔb ke fonda Hala soo kon o ndu lo-o diolan aa Betɛl.

Violɔn Bɛnyamɛn-ndo a piɔ́m Rasɛl-lo

¹⁶ Mí Yakɔb faŋan Betɛl a yungu ndɔɔ. Tiŋndo ndóò lo vɔ lándán le tiiyaa Efrata, mí Rasɛl vialu hɔ́ɔ́ piaandoo. Kɛ mó sanga taw o violɔɔ.

¹⁷ Tuma nda sɔɔnguu ndu lekɔɔ mó va sanga vialaa kon-ndo, mí sokonɔ-vialaa dimul ndu aa: «Kindikindin, vanapɔnɔɔ n co vɛlɛ violɔɔ ho nuaa ni.»

¹⁸ Kɛ mí Rasɛl can piɔ́mndo. Tuma o va le kɔllo malnɔnndo-o, mó ke hɔ́ɔ́ piaandu o velu kon-ndo diolan aa Bɛn-Oni (kon co dimio ni aa «Po dɛnɛ ni palaa»). Kɛ mí Yakɔb fuɲa ndɔ ke ndu diolan aa Bɛnyamɛn (kon co dimio ni aa «Po ba kɛndɔɔ»).

¹⁹ Mí Rasɛl vu, má kumbu ndu o nɛi Efrata-o coo, Bɛtlɛhɛm pɛɛn.

²⁰ Mí Yakɔb baŋ pow sálàá o sɛi ndɔɔ coo, pow sálà biisi Rasɛl kon co vɔ háá paalen nden.

²¹ O kon kɔɔli, mí Israɛl puusiaa dɔ́ɔ́ngɔ́ ndɔɔ o fonda kon, mó kɔ simi cɛi-kola-toandaa ndɔɔ Mikdal-Edɛr lekɔɔli.

²² Tuma o va icali o tàndà kon nin-ndo, mí Rubɛn po ndɔ suunda a buɛi laandu Rasɛl-lo, Bilha pɛɛn, ó va nin hinilan fuɲa ndɔ kɔɔli-o. Mí Israɛl fuɲa ndɔ tuɛi sɔɛi ken. Yakɔb ndóò velu poaa tɔ́ a à ŋiɔn.

Poaa Yakɔb velu-a

²³ Poaa Lea-a yɔŋnun haa ni: po tase Yakɔb-o yɔŋnun Rubɛn ni, a tɔ̀a va Simeɔn, Levii, Yuda, Isakar a Sabulɔn ni.

²⁴ Poaa Rasɛl-la yɔŋnun haa ni: Yosɛf nda Bɛnyamɛn.

²⁵ Poaa Bilha-a, buɛi laandu Rasɛl-lo yɔŋnun Dan nda Nɛftali ni.

²⁶ Poaa Silpa, buɛi laandu Lea-o-a yɔŋnun Kad nda Asɛr ni. Poaa Yakɔb velu telen o va Padan-Aram-ndo-a yɔŋnun kan ni.

Piɔ́m Isaak-o

²⁷ Mí Yakɔb muungu Isaak fuɲa ndɔ ikɛi Mamre, Kiriat-Arba ciee, ciee kon nɔ hau diolan ni aa Hebrɔn, lon Abraham nda Isaak kei calle ni.

²⁸ Isaak ciiyo vɔsilan kɛmɛ a belaŋɔmaa,

²⁹ mó vu. O yuuva fɔlɔn taw malan o diam fuɲaa ndɔa ciee-piɔ́m. Mɛɛ o vi, mí poaa ndɔa Esau nda Yakɔb a kumbu ndu.