O Kandɔɔ 34 - BII BILA

Simeɔn nda Levii mingi màá le bɛ̀ɛ̀la Sikɛm tɛɛmbuu Dina yema nda lan

¹ Paale pilɛ, mí Dina, cua Lea vilul Yakɔb-o fula le kɔlan cuavaa laandua va o lɛŋnde len nin-nda tofaa.

² Mí Sikɛm, po Hamɔr Heviinɔ va masalen tosaa o tàndà kon coo-o ca ndu. Mó kpuva ndu, mó hini a ndu, mó tɛɛmbuu ndu labɛɛ.

³ Mó holnun niko Dina, cua Yakɔb kon. Mó yeema ndu taw. Mó kindin le cuaambɔɔ kɔllo nanɔɔ o ndu lo a sondo yeelaa.

⁴ Mó dimul Hamɔr fuɲa ndɔ aa: «I yeema mà dow ya cuaambɔɔ ho fulu mò siŋnun laa ni.»

⁵ Nduyɛ, mí Yakɔb tuɛi maa a kpuva cua ndɔɔ má hini a ndu. Kɛ mɛɛ poaa ndɔa va vɔ yondoo nin a cɔlua ndɔa yɛ, o kuŋ te o soli le, háá mí poaa ndɔa hun.

⁶ Mí Hamɔr, fuɲaa Sikɛm kɔa o Yakɔb lo le sɔɛi o ndu lo.

⁷ Poaa Yakɔb-a ndáà muungu nin ciee, má tuɛi sɔɛi he. Mɛɛ nda tuei ndi, mí mɔnɛi bii nda taw. Má tuulu kɔltan taw-taw, kani Sikɛm tosa dɛnɛ lamàà bɛndoo Israɛl le kpuva o kpuva cua Yakɔb-o mó hini a ndu-o. O co dɛnɛ bɛnda le tosan te o co le.

⁸ Mí Hamɔr dimul nda aa: «Sikɛm po ni yom yomndo pila le cua niaa, aa niaa kɛsi ndu o nɔ̀u ndu o ba, o yeema ndu taw. Lelan, a yandi, la ke ndu ndu mò siŋnun laa ndɔ.

⁹ O kon, mì nɔ̀ kon siŋnun kpemaa naa tɛɛn naa niaa. Mì la va cuavaa niaa kɛsio naa o ba o nɔ̀lan, mì niaa bɛɛ va cuavaa naa cuaa.

¹⁰ La cɛl pɛ, la cal o naa lo nanu, lɛŋnden le va o ba niaa bɛngu. La cal lenin, la dindi kpekula niaalan, la sɔla vɛlɛ lɛŋnde a yondolan.»

¹¹ O kon kɔɔli, mí Sikɛm soaa o fuɲaa cuaambɔɔ a o yemaa ndɔa lo, mó dimul nda aa: «La cɛl sɔɛi he yandi. Ɲɛ-ɲɛ niaa piɛi ya pɛ, i yɔngu niaa.

¹² La ɲuna fuloo a ɲɛm sɔvɛɔn taw. Ɲɛ-ɲɛ niaa ɲuna ya pɛ, i yɔngu niaa ndu. Kɛ la ke ya cuaambɔɔ ho mò va laa ni yandi.»

¹³ Le mɛɛ nda tɛɛmbuu Dina yema nda labɛɛ yɛ, mí poaa Yakɔb-a mulul Sikɛm nda Hamɔr fuɲa ndɔ a kɔlkalu vɔɔndo.

¹⁴ Má dimul nda aa: «N tíwba mì n kɛsi yema naa o nɔ̀u vanapɔnɔ dii tooma loo o ba le. Te n tosa pɛ lende, siɛmbulan i và le naa ni.

¹⁵ Te la yeema pɛ mì n cɛl sɔɛi he, mɛɛ fɔ mì la dii fɔlɔn vanpiaandua niaa tɛɛn kpow tooma, mà siŋnun falennda maa naa.

¹⁶ O kon, n va cuavaa naa kɛsio o nɔ̀lan niaa o ba, naa bɛɛ n va laandua yilɔɔ o cuavaa niaa tɛɛn. Kon tosan pɛ, n cal o lɛŋnde niaalen nin, n siŋnun vanaa pilla.

¹⁷ Kɛ te la kɛɛ pɛ le toomaa diyɔɔ, n hɛli cua naa, n kɔɛnnun.»

¹⁸ Mí Hamɔr nda Sikɛm po ndɔ cɛl tùù kon.

¹⁹ Mí poombɔɔ tosa dɔ́ɔ́ ɲɛ ndáà dimul ndu le tosaa-o, kani ndóò yeema bɔɔ cua Yakɔb-o. Nduyɛ, vana tɔ́ɔ́ o va o yungu fuɲa ndɔ-o nin ni.

²⁰ Mí Hamɔr kɔa nda po ndɔ kon o dio kobi ndaa sondoo, má dimul pilacieaa ndaa aa:

²¹ «Vannda ha a nɔ yiyan naa kɛndɔɔ, a yeema mà cal o lɛŋnde naalen nin nanu, mà tosa kpekula ndalan. Niaa pila ce maa lɛŋnden le co le kɔannan kɛ́-kɛ̀ le nda. Naa n vanin cuavaa ndaa yilɔɔ o nɔ̀lan, mì nda bɛɛ va cuavaa naa yilɔɔ.

²² Kɛ nduyɛ, le vannda ha cɛlɔɔ mà cal naa tɛɛn, mì n siŋnun vanaa pilla naa ndaa, fɔ mì vanpiaandua naa tɛɛn kpow a dii toomaa maa nda.

²³ O kon saa ndaa, cuinaa ndaa, ɲɛm ndan sɔlan a cɔlua ndaa tɔ̀a kpow a siŋnun sumialii naa. Lelan, n cɛlnun sɔɛi nda dimi-e haliko ma cal naa tɛɛn.»

²⁴ Mí vanaa va o dio kobio sondoo-a kpede a cɛl sɔɛi Hamɔr nda Sikɛm po ndɔ a dimi ken-nde, mí vanpiaandua va ciee lon-nda kpow a dii toomaa.

²⁵ O paale yàándɔlen, telen ɲɛ nɛyaa va nda o n'dial le tooma ndáà dii kon-ndo, mí poaa Yakɔb-a nda ŋiɔn, Simeɔn nda Levii, yemaa Dina-a, vana-vana cua mɔɛi ndɔɛi cɔwve, má toal vanaa vannun kan o kɔlɲuloo nin-nda coo o kobi kon nin. Má diw langbaa a poambɔa piaandua kpow.

²⁶ Má dii vɛlɛ Hamɔr nda Sikɛm po ndɔ. Má soli Dina yema nda o Sikɛm-ndo cɛinin, má kɔannun.

²⁷ Mí poaa tɔ̀a Yakɔb-a hun siow vanaa va piɔ́mndo-a tɛ̀i, má yunga cieo le bɛ̀ɛ̀la ndáà cii yema nda lan.

²⁸ Má cua cɔlua bɛndua, a pɔmbɔa, sofɛlɛa, má cua ɲɛ-ɲɛ va ciee a o va yondolan nin-ndo.

²⁹ Má cua ɲɛm vanaa kan, cuavaa ndaa a laandaa ndaa kpow, má sooluu ɲɛm va cɛilan nin-ndon kpede.

³⁰ Mí Yakɔb dimul Simeɔn nda Levii aa: «La pìndul-la cɔwvo fɔ́! La siinguu ya vana vɔɔn bɛndoo pilacieaa lelɛŋnda o hɔl, Kanannda a Perisiia pɛɛn. Nduyɛ, vanpiaandua bɔɔ co ya o ba le. Te vannda ha mɔsɔŋan pɛ le ya tolɔɔ coo, a co ya nɔla, mà dii ya a yungu nuu kpede.»

³¹ Mí Simeɔn nda Levii a mulul ndu aa: «Vɛ̀ɛ̀ ndáà bɛnda pá mì ndáà tosa a yema naa maa vanalanɔ suundɛi?»