O Kandɔɔ 33 - BII BILA

Yakɔb bɔŋan nda Esau bɛ ndɔ

¹ Mɛɛ Yakɔb heelu hɔlla, mó ca Esau bɛ ndɔ hunɔɔ a vanpiaandua kɛmɛ lehiɔɔlu. O kon, mí Yakɔb piɔw cuavaa ndɔa Lea, Rasɛl a buɛyaa ndaa laandua ŋiɔnda tɛɛn.

² Mó simi buɛyaa laandua a cuavaa ndaa laci, mó simi Lea nda cuavaa ndɔa tɛɛn, mó simi niko Rasɛl nda Yosɛf kɔɔli.

³ Mí ndu pila hiaw nda laci. O tundun lɛŋ bɛmbɛ leŋɔmmɛw malan o tiiya Esau bɛ ndɔ ikɛi.

⁴ Mí Esau hun ndu demullo a kiltan, mó cua ndu o balan coo, mó kafalan ndu o labolo, mó kɔman ndu. Mí nda ŋiɔn kpow a saan caŋndo.

⁵ O kon kɔɔli, mí Esau cua hɔlla, mó ca laandaa Yakɔb-a a cuavaa ndɔa. Mó ɲuna ndu aa: «Vanndacieaa kuɛɛ co yɛ haa nɔm kɔɔli?» Mí Yakɔb muli aa: «Kɛndɛi Hala tosal ya vana nɔm baalaa-e n ca nuaa ni. Cuawva ha o dɔw ya o ipulu ni.»

⁶ Mí buɛyaa laandua sɔɔnguu vɛlɛ a cuavaa ndaa, má tundun.

⁷ Mí Lea bɛɛ hun tundun nda cuavaa ndɔa. O mɛɛlulan niko, mí Yosɛf nda Rasɛl a hun tundun.

⁸ Mí Esau ɲuna ndu aa: «Yɛɛ n yeema yɛ le tosaa a cɔlua ya bɔŋan haa-a kpow?» Mí Yakɔb muli aa: «Ɲɛ ya cuu nɔm vana ni bɛndoo-o co kon ni, haliko ma ce ya ɲia.»

⁹ Mí Esau dimul ndu aa: «Pɔmbɔnndo, bolofaa co ya o ba taw. Lelan, manda ɲɛm nɔmndon le nɔm pila.»

¹⁰ Mí Yakɔb muli aa: «Kɛì-kɛì bɛɛ! I tɛɛlun nɔm, taa naŋ pɛ kɔl a ya lekɛ́ndɛi, mɛɛ bii ɲɛ ya cuu nɔm hoo-o. Kani ciikanndo ho naa nɔm, o co ko kpen a mɛɛ vana ciikan a Hala nuaa yɛ. Nduyɛ, a demul-la bɔɔ a kɔlkɛndɔɔ.

¹¹ Lelan, bii ɲɛ ya cuu nɔm hoo-o ya o ba. Kani Hala ce ya ɲia taw, ɲɛ-ɲɛ ka co ya o ba.» O lo Esau baŋnɔnndo kɔɔli háá mí Esau bii yɔŋɔɔ kon.

¹² O kon mí Esau dimi aa: «N faŋan nanu mì n kɔɛ latulu, i co va nɔm laci.»

¹³ Kɛ mí Yakɔb mulul ndu aa: «Vana ni bɛndoo, a sina maa cuaambɔa kindu n'dial te. O kon kɔɔli, cɔlua co ya o ba: saa, cuinnda a nawva, nda kpow komsaa nda co ni. Te n kɔɛ pɛ a nda kɔla paale pilɛ, cɔlua kan co cuvɔɔ vu.

¹⁴ Lelan vana ni bɛndoo, hiow ya pɔɔ laci yandi, i co va kɔlan nɔm kɔɔli o pɔm-pɔmbɔ a cɔlua mɛɛ nda nɔla kɔlan yɛ a mɛɛ cuaambɔa nɔla kɔlan yɛ, mì kɔ komal nɔm Seir.»

¹⁵ Mí Esau tuu aa: «Te lende ni, mɛɛ i co nɔm vanaa ya hin-nda mel a tiŋ.» Mí Yakɔb muli aa: «Hali ma mɛi vana le, o ya haw ba-o tuŋ co ni mì vana nɔm ni bɛndoo naŋ kɔl a ya.»

¹⁶ Paale len, mí Esau bii nɛiyo le muungoo Seir,

¹⁷ mí Yakɔb ndu kɔa Sukɔt. Mó tangul cɛiyo lon, mó tangul vɛlɛ kùùlan le cɔlua ndɔa. Lelan nda ke fonda kon diolan ni aa Sukɔt (kon co dimio ni aa «Kùùlan»).

Yakɔb kɔ cal Sikɛm

¹⁸ Mɛɛ Yakɔb faŋan Padan-Aram, mó tiiya a kɔlɲuloo o kobio Sikɛm nin, o lɛŋnde Kanaan-nden nin. Mó kɔ kila dɔ́ɔ́ngɔ́ ndɔɔ o kobio hɔl-ndɔ.

¹⁹ Mó piandu lɛŋnden cuavaa-imamaa Hamɔr-a o ba volin latámán kɛmɛ, Hamɔr kon kelu Sikɛm ni. Lon Yakɔb simi cɛila-kolala-toandaala ndɔlan ni.

²⁰ Mó cɔaw fonda-loamaa-lasálàá lon, mó ke ndu diolan aa Ɛl-Elohe-Israɛl (kon co dimio ni aa «Hala co Hala Israɛl-lo ni»).