O Kandɔɔ 31 - BII BILA

Yakɔb faŋan o Laban-ndo mó kɔannun

¹ Tumaa pum, mí Yakɔb tuɛi sɔɔn poaa Laban-nda va dimio-on aa: «Yakɔb cal o ɲɛ-sɔlaa fuɲa naa kpow coo, a ɲɛ-sɔlaa fuɲa naa o pɛlnun ladio nuaa ni.»

² Mó ca vɛlɛ Laban o hɔl maa ndu Laban mangala yiyanndo a ndu, o ve lɛ a ndu maa paandu le.

³ O kon mí Mɛlɛka dimul ndu Yakɔb aa: «Muungu vanaa nɔmnda o ibuŋ, o lɛŋnde fuɲaa nɔmnda nin, i vanin nɔm ikɛi.»

⁴ Le hee, mí Yakɔb yoongu laandaa ndɔa, Rasɛl nda Lea pɛɛn, nɛɛ o va cɔlua mandaa yondoo nin-nda,

⁵ mó dimul nda aa: «I ce maa fuɲa niaa nɔ lɛ kɔl ni kɛndɛ maa paandu le. Kɛ Hala fuɲa nuu co ya ikɛi.

⁶ Niaa pila bɛɛ la sina maa a yoomuma nian kpow ya tosal fuɲa niaa vallo ni.

⁷ Kɛ mí ndu hui ya, mó yɛlɛmiaa sala nuu bɛmbɔɔ tɔ́. Kɛ Hala cɛl ndu mò tɛɛmbuu ya le.

⁸ Telen oo telen fuɲa niaa ndóò dimi pɛ maa cɔlua pooɲɛiya vanin sala nuu ni, cɔlua kpow ndáà muungu cuavaa pooɲɛiya komɔɔ. Te ndóò dimi yɛ pɛ maa cɔlua nɔ pongan lekɔɔ-a vanin sala nuu ni, cɔlua ndáà muungu vɛlɛ cuawva komɔɔ a pongan.

⁹ Mɛɛ lende Hala cua cɔlua fuɲa niaa-a ni mó yɔngu ya.

¹⁰ Kani telen cɔlua va helɔɔ-o, mí ca o lɔma sɔlaan nin maa saa kóndóa va saa laandua helɔɔ-a a pooɲɛiya nda va ni, ndáà nɔ pongan a bungan.

¹¹ Mí mɛlɛkanɔ Hala-o veelu ya o lɔma sɔlaama man nin aa: ‹Yakɔb.› Mí cɛl aa ‹Yoo.›

¹² Mó dimul-la aa heelu hɔlla mà tofa. Saa kóndóa co saa laandua helɔɔ-a kpow a nɔ pongan a bungan, a pooɲɛiya nda co ni, kani i ce ɲɛ-ɲɛ Laban co nɔm tosallo.

¹³ Ya co Hala nɔ fonda n ke diolan aa Betɛl-lo ni, nɛɛ n tala cuɛiyan o pow sálà n simi-o coo-a pɛɛn, fonda n lo kon má yii kpemaa o ya lo-o kpeekpei. Lelan sisa, cɔn mà faŋan o lɛŋnden nden nin, mà muungu o lɛŋnde n velun nin-nden nin.»

¹⁴ Mí Rasɛl nda Lea a mulul ndu aa: «A laalan maa n nɔ lɛ pá kɛ́ o fuɲa naa lo? A nɔ o kɔl maa n cua lɛ kɛ́ɔ lon?

¹⁵ Maa n'mial o bii naa ni, kani pisio o pisi naa ni mó dia vɔngu naa.

¹⁶ Lelan, ɲɛ-ɲɛ Hala soli fuɲa naa o ba mó hialun ndu, le naa pila a le cuavaa naa kon co ni. Le hee, tosa mɛɛ Hala dimul nɔm le tosaa yɛ kpow.»

¹⁷ O kon, mí Yakɔb can muungoo o ndu lo, mó heelu cuavaa ndɔa a laandaa ndɔa o ɲɔɔmɛɛa coo.

¹⁸ Mó kɔandu cɔlua ndɔa kpow a ɲɛm ndóò sɔla-on kpede, kɛ taama-taama cɔlua ndóò kɛsi le ndu pila telen o va Padan-Aram-ndo-a. Mó bii nɛiyo le muungoo Isaak fuɲa ndɔ o ibuŋ o lɛŋnde Kanaan-nden nin.

¹⁹ Telen kon, Laban ndu ndóò kɔɛ saa ndɔa yiinde kilio. Mɛɛ nda cɛn kɔnndan, mí Rasɛl ciimbuu piɔmaa tongoniŋaa fuɲa ndɔa.

²⁰ Nuaa Yakɔb vennun Laban Aramiinɔ ni mó can kɔnndan, o congun ndu le.

²¹ Mó ɲaanun a ɲɛm va ndu o ba-on kpow, mó kɔ taŋ pee bɛndoo Efrate, mó kɔa a ba pembon Kalaad.

Laban dem Yakɔb

²² O paale yàándɔlen, má dimul Laban aa Yakɔb ɲaanun mó kɔannun.

²³ Mí Laban cua puapilɛa ndɔa, mó can Yakɔb diomɔɔ. Mó diam ndu palɛi ndii ŋɔmmɛw, mó kɔ bendal ndu o pembon Kalaad.

²⁴ Kɛ icɔllo, mí Hala hun soaa o Laban Aramiinɔ lo o lɔma sɔlaan nin, mó dimul ndu aa: «Caa dɛ! Dimul Yakɔb ɲɛ-ɲɛ le, o va sɔɛi kɛndɛ o va sɔɛi vɔɔn.»

²⁵ Tuma Laban kɔ bendal Yakɔb-o, Yakɔb ndóò cii nin cɛi-kola-toandaa ndɔɔ simi o pembei coo. Mí Laban nda puapilɛa ndɔa ndóò hin nda bɛɛ a kila dɔ́ɔ́ngɔ́ɔ̀ o pembon Kalaad tɛɛn.

²⁶ Mí Laban ɲuna Yakɔb aa: «Dɛnɛ yɛɛ n tosa yɛ hoo? A yii ya dúmbú, ma cua cuavaa nia ma hunnun a nda maa vanaa nda bii o cɔw.

²⁷ Le yɛɛ n vennun yɛ ya má ɲaanun? A congun ya le, má yii ya dúmbú. Te nɔm óò congun ya pɛ, i va nɔm malɔɔ kɔlan a kɔlkɛndɔɔ, mì yáà liila nɔm a condon, a dundulan a á bondomalan lɔɔ.

²⁸ A congun ya mí yáà kɔɔmian cuavaa nia imamaa a cuavaa nia laandua le nda congɔnndo le. A tosa bɔɔ dɛnɔɔ ho maa diɔm.

²⁹ Yáà nɔla mì yáà tosal niaa dɛnɛ vɔɔndo, kɛ Hala fuɲa nɔmndo soo ciɛi icɔl o ya lo, mó dimul-la aa ya caa, ya dimul nɔm ɲɛ-ɲɛ le, o va sɔɛi kɛndɛ o va sɔɛi vɔɔn.

³⁰ Mɛɛ n kɔɛnnun nihau yɛ, kani yeemɛi va nɔm taw le muungoo o fuɲa nɔm ndo, kɛ le yɛɛ n ciimbuu yɛ piɔmaa nia?»

³¹ Mí Yakɔb mulul ndu aa: «Siòònde i va ya ni, i va ko yiyanndo maa a va ya cuavaa nɔmnda poonda o ba a paa-kala.

³² Le piɔmaa nɔmnda yɛ, vana-vana n saalun pɛ nda o ba, vana kon sɔla piɔ́mndo. Yaasiaa ɲɛm nun kpow vanaa naa o hɔl. Ɲɛ-ɲɛ nɔm n ce pɛ, a puu ndu.» Kani Yakɔb ve sina maa Rasɛl ndóò ciimbuu piɔmaa tongoniŋaa kan te.

³³ Mí Laban kɔ yaasiaa cɛi-kola-toandaa Yakɔb-o, cɛi-kola-toandaa Lea-o a cɛi-kola-toandaa buɛyaa laandua ŋiɔŋaa Lea nda Rasɛl-la, o ci ɲɛ-ɲɛ le. Mɛɛ o fula o cɛi-kola-toandaa Lea-o nin, mó luɛi o cɛi-kola-toandaa Rasɛl-lo nin.

³⁴ Nduyɛ, mɛɛ Rasɛl cua piɔmaa kan, mó vian nda o ɲɛ-calaa nda kɛsi ɲɔɔmɛɔ o kɔɔ le calle-o bɛngu, mó cal lecoo. Mí Laban nuwviaa o cɛi-kola-toandaa Rasɛl-lo nin kpow, kɛ o ci ɲɛ-ɲɛ le.

³⁵ Mí Rasɛl dimul fuɲa ndɔ aa: «Vana ni bɛndoo, te i cen nɔm o hɔl mì sim te, tambu kɔl te, kani o paangei nin ya co ni.» Mó cɔɔlu vɛlɛ yaasiaa, kɛ o seelun nda le.

³⁶ O kon mí Yakɔb tuulu kɔl, mó ɲuna ndu aa: «Dɛnɛ vɔɔn yɛɛ ya tosa yɛ? Sɔɛi yɛɛ ya tɛɛmbuu yɛ mà va hiilaa ho a ya?

³⁷ A cii ɲɛla nilan kpow yaasiaa, yɛɛ nɔm n saalun yɛ lenin? Cɔm ndu vanaa nɔmnda a vanaa nia o hɔl mì nda kelu yamɛi naa tɛɛn naa ŋiɔn.

³⁸ O co nihau vɔsilan bidiin, i co nɔm o bɛngu coo, saa nɔmnda a cuinaa nɔmnda ve viiku le. I di vɛlɛ n'saa o cɔlua nɔmnda tɛɛn te.

³⁹ Te visi biyaa ndóò bii pɛ cɔlu nɔmndo, ya pila va cɔloo mingio sɔngɔ kon ni. A va ya kindilaa le ɲɛ nɔm nda ciimbuu ya o ba ipala-o a ɲɛ nɔm nda ciimbuu ya o ba icɔl-lo salaa.

⁴⁰ Ipala, hangullo va ya palaa, icɔl hoeiye va ya yɛɛvɔɔ. Hali lɔan, mí ma kɛɛ ya.

⁴¹ Lende ya cii nɔm vɔsila bidiinndan o bɛngu coo ni, i tosal nɔm vallo vɔsilan tɔ́ a lahiɔɔlu le cuavaa nɔmaa ŋiɔnda, mí manda vɛlɛ cɔlua nɔmnda vɔsilan laŋɔmpum. Ma yɛlɛmiaa sala nuu bɛmbɔɔ tɔ́.

⁴² Te ndóò ve mí Hala Abraham-ndo, Hala Isaak fuɲa ni ndóò ɲiiya o hɔl-lo ndóò ve ya ikɛi le, a va ya hau tovɔɔ mì yáà muungu bala fondo. Kɛ Hala ce mɔnɛi luɛi ya-e a yɔkpa ya yɔkpa o vallo nin-ndo. Lelan, mí ndu pila kialu ciɛi icɔl yamɛi.»

⁴³ Mí Laban mulul Yakɔb aa: «Cuavaa laandua ha, cuavaa nia ya velu-a nda co ni, poaa ndaa piaandua ha bɛɛ ya velu nda ni, ya nɔ cɔlua ha ni, ɲɛ-ɲɛ n co hoo cɔu ya nɔ ni. Yɛɛ nɛ ya nɔla yɛ niko mì tosa hau le cuavaa nia laandua a le cuavaa nda velu-a?

⁴⁴ Lelan sisa, hun mì n yii kpemaa naa ŋiɔn, mì n mɛi tɔɔmasele vanin seilen naa tɛɛn-ndo.»

⁴⁵ O kon mí Yakɔb cua powvo, mó siinguu ndu pow sálàá, mó tɔal ndu lɛŋ.

⁴⁶ Mó dimul vanaa ndɔa aa: «La cɔwviaa powtan.» Má cɔwviaa powtan, má dii lan kundaa. Mí nda kpow a dia ɲɛdiaa o powta kunda la lan coo.

⁴⁷ Mí Laban ke fonda kon diolan aa: Yekar-Sahaduta (kon co dimio o aramei nin ni aa «Kunda lapow leseiyo»). Mí Yakɔb ndu ke ndu diolan aa: Kalɛd (kon co dimio o hebrei nin ni aa kunda lapow leseiyo).

⁴⁸ Mí Laban dimi aa: «Kunda lapowvo ho co hau seiyo naa tɛɛn naa nɔm ni.» Lelan nda ke fonda kon diolan ni aa Kalɛd (kon co dimio ni aa «Seilen»).

⁴⁹ À veelu ndu vɛlɛ aa Mispa (kon co dimio ni aa «Fonda lekpalillo»). Kani mí Laban dimi aa: «Màá Mɛlɛka va naa kpalillo telen naa n sɛyannin mì n lonnan o lahɔl vellaa-velle-o!

⁵⁰ Taa luei pɛ cuavaa niaa laandua mɔnɛi, mà cua laandua celen o nda kɔɔli, o co vanaciee le kialunin naa yamɛi tɛɛn te, kɛ Hala pila vanin seiyo naa tɛɛn naa nɔm ni. Le hee, mandan dɛ!

⁵¹ Lelan, tofa vɔ powta kundalan ndan a pow sálà naa n simi hoo naa ŋiɔn-ndo.

⁵² Kunda lapow kon a pow sálà kon vanin seilen naa tɛɛn ni. I bɛnda mì hiow kunda lapowvo ho a pow sálàá ho coo mì kuel nɔm a yiyan vɔɔndo le. Nɔm bɛnda vɛlɛ mà hiow lan coo mà hinul-la a yiyan vɔɔndo le.

⁵³ Hala Abraham-ndo a Hala Nahɔr-o co yamanɔɔ naa tɛɛn ni.» O kon, mí Yakɔb mɛnan o diola Hala fuɲa ndɔ ndóò ɲiiya o hɔl-lo.

⁵⁴ O kon kɔɔli, mó soli sálàá o pembei coo lon, mó veelu vanaa ndɔa le ɲɛdiaa sálà kon dioo. Má dia ɲɛdiaa kon latulu lon, má lɔl ɲinkon o pembii ken coo.