O Kandɔɔ 25 - BII BILA

Cuavaa Ketura vilul Abraham-nda

¹ Mí Abraham ndóò yil vɛlɛ lanɔ celen diolan aa Ketura.

² Mó vilul ndu poaa, nda yɔŋnun haa ni: Simran, Yɔksan, Medan, Madian, Yisbak a Sua.

³ Yɔksan yɔŋnun fuɲaa Saba nda Dedan ni. Dedan kon yɔŋnun fuɲa-mama Asuriia, Letusiia a Leumiia ni.

⁴ Madian yɔŋnun fuɲaa Efa, Efɛr, Henɔk, Abida a Ɛldaa ni. Nda kpow, Ketura ndóò velu nda ni.

⁵ Mí Abraham yɔngu Isaak ɲɛm ndɔn kpow.

⁶ Mó yɔngu vɛlɛ poaa ndɔa o velu a laandua celennda-a ɲɛm ndɔn n'pum. Kɛ telen o va yoomu-o, mó faŋa nda Isaak po ndɔ ikɛi few-few. Mó yaa nda o lɛŋnde celen nin a ba paalen le can-ndo.

Piɔ́m Abraham-ndo

⁷ Mɛɛ Abraham cii vɔsilan kɛmɛ a belaŋɔmmɛw a laŋuɛɛnu,

⁸ mó vu. Ndóò yuuva fɔlɔn kudɛɛ-kudɛɛ o kɔlɲuloo nin, malan o diam vanaa ndɔa ciee-piɔ́m.

⁹ Mí poaa ndɔa, Isaak nda Ismaɛl a kumbu ndu o buululan nin Mak-pela, o lɛŋnde Efrɔn-nden, po Sohar Hitiinɔ-o pɛɛn. Lɛŋnde va len Mamre ikɛi len.

¹⁰ Abraham ndóò cii nin lɛŋnde len piondɔɔ Hitiia o ba. Lon nda kumbu Abraham kon Sara laa ndɔ ikɛi ni.

¹¹ Mɛɛ Abraham vi, mí Hala koma dɔaw Isaak po ndɔ duaa taw-taw. Mí Isaak kɔ kila calta ndɔlan o soon kólaa Lakai-Royi ikɛi.

Polale Ismaɛl-ten

¹² Diola cuavaa-imamaa Ismaɛl-la la co lan ni, po Abraham velu nda Akar-o, buɛi laandu Esiptenɔ va Sara o ba-o pɛɛn.

¹³ Diola poaa ndɔa o polale vialaalen la co lan ni: Nebayɔt, Kedar, Adbeɛl, Mibsam,

¹⁴ Misma, Duma, Masa,

¹⁵ Hadad, Tema, Yetur, Nafis a Kɛdma.

¹⁶ Diola poaa tɔ́ a à ŋiɔŋaa Ismaɛl-la la co lan ni. Má siŋnun bolii lapangɛi o yungula ndalan coo. Má yɔngu cieon a sɔndɔkɔlta nda va calle nin-ndan diola nda pila lan.

¹⁷ Ismaɛl ciiyo vɔsilan kɛmɛ a beleyaa a laŋɔmmɛw, mó vu, mó diam vanaa ndɔa ciee-piɔ́m.

¹⁸ Mí cuavaa ndɔa a cuavaa ndɔa imamaa cal o lɛŋnde cɛn Havila le kɔlan Sur len nin, o lɛŋnde Esipte len ikɛi, le kɔlan a ba Asiri-o. Lende nda cal polama cuavaa tɔ̀a Abraham-nda levil ni.

DƐNƐ YAKƆB-O (25—36) Violɔn Esau nda Yakɔb-o

¹⁹ Polale Isaak len le yɔŋnun nden ni. Abraham velu Isaak kon ni.

²⁰ Isaak ndóò nɔ vɔsilan belehiɔɔlu, mó yil Rebeka o nɔ̀u. Cua Betuɛl Aramiinɔ fula Padan-Aram-ndo a yemaa Laban Aramiinɔ Rebeka kon va ni.

²¹ Mí Isaak piɛi Mɛlɛka le Rebeka laa ndɔ pulei timbio, kani Rebeka ve vana vialaa le. Mí Mɛlɛka muli piɛile ndɔlen, mí Rebeka laa ndɔ cua folio.

²² Mɛɛ pɛndua va kuindianndo ndu o dembe, mó koŋul aa: «Kpòkóó! Te nuaa i co ni, le yɛɛ niko mí cua folio?» Mó kɔ ɲuna Mɛlɛka.

²³ Mí Mɛlɛka dimul ndu aa: «Vannda súúlan tan tiɔn a co nɔm o dembe ni. Vanaa-mangalaa-isɔɔa súúlan tan tiɔn n co violɔɔ ni. O pilɛ hiawnin o pilɔɔ kpaayaa. Po tasoo calnin pɔmbɔ ndɔ o labɛngunin.»

²⁴ Telen ndɔ vialaa tiiyaa, mó vialu pɛndua.

²⁵ O tase o velu-o, kɔɔlen le va ndu lediuvaa, yiinde va ndu lekɔɔ maa yiiŋii yáw visi. Lelan nda ke ndu diolan ni aa Esau (kon co dimio ni aa «Vana nɔ yiinde lekɔɔ-o»).

²⁶ Mɛɛ ndu velun, mí pɔmbɔ ndɔ fula vɛlɛ, ba ndɔɔ va o kafalanndo o bɛngu tííndíí Esau-vo. Má ke ndu diolan aa Yakɔb (kon co dimio ni aa «Bɛngu tííndííyo»). Isaak ndóò nɔ vɔsilan belaŋɔmpum, mó vialu pɛndua kan.

Esau pisi fonda ndɔ ikaasonyaa Yakɔb pɔmbɔ ndɔ o ba

²⁷ Mɛɛ poambɔa pɛndua kan sul, mí Esau siŋnun doosunɔ-málà bɛndoo, yondo tuŋ o vannun ni. Yakɔb ndu yɛngɛlɛn o va ni. O cɛila-kolala-toandaalan nin tuŋ o vannun ni.

²⁸ Esau Isaak ndóò hiow kaola, kani ɲɛmahilu ledoosoo Isaak ndóò yeema ni. Kɛ Yakɔb Rebeka ndóò hiow kaola.

²⁹ Paale pilɛ, Yakɔb lo kpɔɔndɔɔ yawvo, mí Esau bɛ ndɔ fula doosulen yondoo nin, mó hun. O va o sangaa yɔkɔɔ.

³⁰ Mó dimul Yakɔb aa: «Poo ke ya kpɔɔndɔ nɔm siaŋaa ho mì de, kani i sanga nihau bɔɔ a yiaan.» Lelan nda ke Esau diolan ni aa Edɔm (kon co dimio ni aa «Kpɔɔndɔ siaŋaa»).

³¹ Kɛ mí Yakɔb mulul ndu aa: «Taa yeema pɛ mì ke nɔm ndu, mɛɛ singa ya ndu o ba a fonda nɔm ikaasonyaa.»

³² Mí Esau muli aa: «Yiaan ma co ya diyɔɔ nuaa ni. Kpeku yɛɛ fonda ikaasonyaa ho solul-lɛnin ya?»

³³ Mí Yakɔb dimul ndu aa: «Mɛɛ yii kpemaa mà mɛnan sunsun.» Mí Esau yii dɔ́ɔ́ kpemaa, mó mɛnan po. Mó vɔngul fonda ndɔ ikaasonyaa Yakɔb pɔmbɔ ndɔ o ba.

³⁴ O kon mí Yakɔb ke ndu buloo a kpɔɔndɔ n'cabueendo. Mó cal, mó dia, mó kol. Mó can mó kɔannun. Nuaa Esau pɛɛsa fonda ndɔ ikaasonyaa ni.