O Kandɔɔ 22 - BII BILA

Abraham bɛɛndian le Isaak po ndɔ sálàá solio

¹ O sɔɔn mun kɔɔli, mí Hala tɔɔndan Abraham, mó veelu ndu aa: «Abraham.» Mí Abraham cɛl aa: «Yòó!»

² Mí Hala dimul ndu aa: «Cuá po nɔmndo, po nɔm pilɛ n kaola kon taw-taw-vo, Isaak pɛɛn, mà kɔɛ a ndu o lɛŋnde Moria len nin. La tiiya pɛ lon, a soli ndu sálà loamaa le ya o pembii ya cɔmnin nɔm-nde coo.»

³ Diimandɔɔ, mí Abraham pena cɔnɔn idiiyo púŋ, mó bɛɛndiaa ɲɛ-calaa o sofɛlɛ ndɔɔ coo, mó cua buɛyaa ndɔa nda ŋiɔn a Isaak po ndɔ, mó tɛɛndiaa yɔmnde le sálà loamaa kɔlan solio. Má bii nɛiyo le kɔlan o fonda Hala cɔm ndu-o.

⁴ Paale yàándɔlen, mí Abraham heelu hɔlla, mó ca fonda Hala cɔm ndu kon-ndo lándán.

⁵ Mó dimul buɛyaa ndɔa aa: «La koma cum naa nanu a sofɛlɔɔ, n co lakɔ naa po nuu, mì n kɔ biilu Hala. N cii pɛ, n muungu nanu.»

⁶ Mó siiluu po ndɔɔ yɔmnde le kɔlan sálà loamaa solio, mí ndu pila bii yinnden a mɔɛi o ba. Má can kɔlan nda ŋiɔn.

⁷ Mí Isaak veelu Abraham fuɲa ndɔ aa: «Pua sei.» Mí Abraham cɛl aa: «Yoo, po nuu.» Mí Isaak ɲuna ndu aa: «I ce yinnden a yɔmnde. Kɛ ɔ́ɔ̀ saa téndé naa n co lakɔ sálàá soli-o?»

⁸ Mí Abraham mulul ndu aa: «Po nuu, Hala pila nuwviaanin saa téndóó le sálà loamaa kon solio.» Má kɔa nɛɛ nda va kɔlan-nda nda ŋiɔn kpow.

⁹ Mɛɛ nda tiiya o fonda Hala cɔm-ndo, mí Abraham cɔaw fonda-loamaa-lasálàá, mó ciŋa kilion lecoo. Mó bii Isaak po ndɔ, mó yii ndu peŋ, mó yambu ndu o kilin va o fonda-loamaa-lasálàá coo-on coo.

¹⁰ Mó siɛndi baa, mó cua mɔɛi le po ndɔɔ bololan kiolɔɔ.

¹¹ O kon mí mɛlɛkanɔ Hala-o veelu ndu coocoo aa: «Abraham sei. Abraham sei.» Mí Abraham cɛl aa «Yòó!»

¹² Mí mɛlɛkanɔɔ dimul ndu aa: «Hol poombɔɔ baa le. Yɔŋ ndu ɲɛ-ɲɛ vɔɔn te. I sina nihau válán maa a nɔ siòòŋii Hala-e, kani a túŋ ya pole nɔmnde pilɛlen nden te.»

¹³ Mɛɛ Abraham heelu hɔlla, mó ca saa kóndóó. Leela ndɔlan la va lakayakayanndan o bɔɔ nin. Mó bii ndu, mó solul Hala ndu sálà loamaa o fonda Isaak po ndɔ-o.

¹⁴ Mí Abraham ke fonda kon diolan aa Adonai-Yiire (kon co dimio ni aa «Maalii nuwviaanin»). Lelan vannda co vɔ dimio háá hau a pembii ken o kɔɔ ni aa: «O pembii Mɛlɛka-e coo, Mɛlɛka pila nuwviaanin.»

¹⁵ O kon kɔɔli, mí mɛlɛkanɔ Hala-o lo vɛlɛ coocoo, mó veelu Abraham veelu diinndɔɔ,

¹⁶ mó dimul ndu aa: «I mɛnan o diola nilan, ya Mɛlɛka co sɔɛi ni, kani á tuŋ ya po nɔm pilɔɔ le. Le tùú n tosa kon-ndo,

¹⁷ i co nɔm duaa dɔvɔɔ taw-taw. I kuinin cuavaa nɔmaa imamaa, mà va kunda maa loeon o halataala a sióónndon o mɛmma ihɛllan kɔngɔ. Cuavaa nɔmaa imamaa kɛsinnin yaamɔaa ndaa o labɛngunin.

¹⁸ Vanaa-mangalaa-isɔɔa súúlan kpow o ceendo coo a sɔlanin duaa cuavaa nɔmnda o ba bɛngu. Kani nɔm Abraham, a bii sɔɛi nii.»

¹⁹ Sɔɛi ken cuvɔɔ, mí Abraham muungu nɛɛ buɛyaa ndɔa va-a, má bii nɛiyo le muungoo Bɛɛr-Seba, mó kɔ cal lon.

Polale Nahɔr len

²⁰ Mɛɛ sɔɔn mun hiow, má dimul Abraham maa Milka bɛɛ vilul Nahɔr pɔmbɔ ndɔ cuavaa piaandua.

²¹ Poaa kan yɔŋnun haa ni: po tasoo diolan Ut, o diinndɔɔ Bus, a à celen: Kemuɛl fuɲaa Aram,

²² Kesɛd, Haso, Pildas, Yidlaf a Betuɛl.

²³ Betuɛl kon yɔŋnun fuɲaa Rebeka ni. Poaa ŋɔmaa Milka vilul Nahɔr, pɔmbɔɔ Abraham-nda yɔŋnun kan ni.

²⁴ Mí Reuma sámá ndɔ bɛɛ vilul ndu cuawva. Cuavaa kan yɔŋnun haa ni: Teba, Kaham, Tahas a Maaka.