O Kandɔɔ 21 - BII BILA

Violɔn Isaak-o

¹ Mí Mɛlɛka yiyan Sara coo mɛɛ ndu pila ndóò dimi yɛ, mó peelu kpema o yiilu ndu-o.

² Mí Sara cua folio. Mɛɛ telen Hala kelu-o tiiya, Abraham ndóò yuuva nin bɛɛ lende taw, kɛ mí Sara vilul ndu hɔ́ɔ́ piaandoo.

³ Mí Abraham ke po Sara vilul ndu kon-ndo diolan aa Isaak (kon co dimio ni aa «O mam»).

⁴ O paale ŋɔmaandɔlen, mó dii ndu tooma mɛɛ Hala dimul ndu le tosaa yɛ.

⁵ Abraham ndóò nɔ vɔsilan kɛmɛ, mó vialu Isaak.

⁶ O kon, mí Sara dimi aa: «Hala mɛmi ya, vanaa tuɛinin sɔɛi he-a kpow a mamnin a kɔlkɛndɔɔ le dɛnɛ yɔŋnun ya hoo-o.

⁷ Kani nɛ̀ɛ́-nɛ̀ ndóò nɔla yɛ lɛ̀ Abraham dimullo maa Sara co hunɔɔ cuawva vɔɛsi? Kɛ nduyɛ, má ce mɛɛ ya vilul ndu hɔ́ɔ́ piaandoo o yuuvɛi ndɔɛi nin yɛ.»

Abraham tow Akar nda Ismaɛl po ndɔ

⁸ Mɛɛ Isaak sul, mí Sara soli ndu mɛɛlen o sondo. Paale nda soli ndu mɛɛlen o sondo len, mí Abraham tosa kafo bɛndoo, mó toosiaa ɲɛdiaa taw.

⁹ Paale pilɛ, mí Ismaɛl, po Akar Esiptenɔ vilul Abraham-ndo va pisultan. Mɛɛ Sara ce ndu,

¹⁰ mó dimul Abraham aa: «Tow cɛɔ ho nda po ndɔɔ mà kɔɛ polon, kani po ndɔɔ bɛnda mò muulian kɛ́ɔ cuaa nda Isaak po ni le.»

¹¹ Mí sɔɛi ken tɛɛmbuu Abraham kɔllo taw. Mí mɔnɛi bii ndu le Ismaɛl po ndɔ.

¹² Kɛ mí Hala dimul ndu aa: «Tambu kɔl le poombɔɔ a le cɛ nɔm laandoo ho tovɔɔ le. Ɲɛ-ɲɛ Sara ɲuna nɔm pɛ le ndu tosallo, a tosal ndu lende. Kani cuavaa Isaak-a vanin polale nɔmnde solinin diola nɔmndan tɔ́ɔ́ len ni.

¹³ Kɛ o va bɛɛ lende, i siinguunin po cɛ laandoo ho velu-o fuɲa-mamaa le vanaa-mangalaa-isɔɔa pum. Kani hɔ́ɔ́ nɔmndo ndu bɛɛ co ni.»

¹⁴ Diimandɔɔ idiiyo púŋ, mí Abraham pena buloo cua, mó vow mɛnndan o bɔlɔ yáw cuinndo nin. Mó handu Akar ɲɛm mun o congú, mó yɔngu ndu vɛlɛ Ismaɛl po ndɔ, mó soli ndu cɛinin. Mí Akar kɔannun, mó kɔ luusian o lɛŋnde veselɛilen Bɛɛr-Seba nin.

¹⁵ Mɛɛ mɛmma va ndu o ba o bɔlɔ yáw cuinndo nin-ndan má cuu, mó kɔ yambu po ndɔɔ o bɔɔ bɛngu,

¹⁶ mó kɔ calnun lándán. Nɛɛ o mɛi po ndɔɔ-a a nɛɛ o va icali-a, ɲɔɔ va bandei maa le dunndo kɛmɛ lediin. Kani nuaa ndóò dimi ni aa: «I yeema mì ce po nuu o piɔ́mndo le.» Le hee, mó kɔ calnun kpengei pilɛi, mó va hiilaa a caŋndo coocoo.

¹⁷ Mí Hala tuɛi poombɔɔ caŋndo, mí mɛlɛkanɔ Hala-o lo coocoo, mó veelu Akar, mó ɲuna ndu aa: «Akar, yɛɛ yɔŋnun yɛ nɔm? Buulan te, kani Hala tuei poombɔɔ caŋndo nɛɛ n mɛi ndu-a.

¹⁸ Cɔn ma cua ndu, kani i siinguunin ndu fuɲa-mamaa le vanaa-mangalaa-isɔaa sɛ́lɛ́ bɛndua pum.»

¹⁹ Mí Hala kumbi ndu hɔltan, mó ca dɔ́ɔ́ soon kólaa. Mó kɔ kɔandu mɛnndan ndon, mó vow man o bɔlɔ yáw cuin va ndu o ba-o nin, mó koesi poombɔɔ.

²⁰ Hala va poombɔ kalaa ikɛi, mí poombɔɔ sul, mó cal o lɛŋnde veselɛilen nin. Mó siŋnun vana caa kpaasiaa vuuo taw-vo.

²¹ Mó kɔ cal o lɛŋnde veselɛilen Paran nin. Mí kala ndɔ yil ndu lanɔɔ fulaa o lɛŋnde Esipte len nin.

Abraham yii kpemaa nda Abimelɛk

²² O telen pilɛ kon bɛngu, mí Abimelɛk cua Pikɔl, bolle vanaa ndɔa cɔwva, má kɔa o Abraham ndo, mó dimul ndu aa: «Hala co nɔm ikɛi o dɛnnda n co tosaa lan kpow nin.

²³ Lelan sunsun, mɛnan le Hala maa a yiinin ya dúmbú naa cuavaa nia a cuavaa nia imamaa le. Mɛnan taa tòsalnin ya pila a lɛŋnde nile n co len icali nin-nden dɛnɛ kɛndɔɔ mɛɛ ya bɛɛ co nɔm dɛnɛ kɛndɔɔ tosallo yɛ.»

²⁴ Mí Abraham mulul ndu aa: «I mɛnan po!»

²⁵ Mí Abraham tɛɛlun Abimelɛk le soon kólaa ndɔ buɛyaa Abimelɛk-a ndáà puu a paa-kala-o.

²⁶ Mí Abimelɛk mulul ndu aa: «I sina vana puu soon kólaa kon-ndo le. Nduyɛ, nɔm Abraham pila bɛɛ, a dow ya bali vaa lende le. Hau ko ya co ndi tueyɔɔ nuaa ni.»

²⁷ Mí Abraham bii saa, cuinnda a nawva, mó fanda Abimelɛk. O kon, má yii kpemaa nda ŋiɔn.

²⁸ Mí Abraham bii vɛlɛ saa téndéa laandua nda ŋɔmmɛw, mó baa nda ikɛi.

²⁹ Mí Abimelɛk ɲuna ndu aa: «Le yɛɛ n bii yɛ saa téndéa ŋɔmmɛwva ha má baa nda ikɛi?»

³⁰ Mó mulul ndu aa: «Bíí ya saa téndéa ha o ba, mí kon va seilen maa ya tow soon kólaa kon ni.»

³¹ Lelan nda ke fonda kon diolan ni aa Bɛɛr-Seba, kani lon nda mɛnan nda ŋiɔn kpow ni.

³² Nuaa nda yii kpemaa Bɛɛr-Seba lon ni. Mɛɛ nda cii kpema ndaa yii, mí Abimelɛk can nda Pikɔl, bolle vanaa ndɔa cɔwva, má muungun o lɛŋnde Filistia nin.

³³ O kon kɔɔli, mí Abraham tɔal yɔmndo, tamariio, Bɛɛr-Seba lon. Mó biilu Mɛlɛka, Hala co le fɛɛn a fɛɛn-ndo pɛɛn.

³⁴ Mí Abraham viaw vɛlɛ o lɛŋnde Filistia nin taw.