O Kandɔɔ 17 - BII BILA

Tɔɔmasele cɔm maa Hala yii kpemaa-o: diola Abram-ndan la mangalan

¹ Vɔsi Abram suili vɔsilan belaŋɔmahiɔɔlu a laŋɔmahiɔɔlu-o, mí Mɛlɛka cɔmnun ndu, mó dimul ndu aa: «Ya co Hala Vana-Kpaayaa-Kpow ni. Kela kela kɛndɔɔ ya o hɔl, mà tosa ɲɛ hɛnan ya-o.

² I yiinin kpemaa a nɔm mì kuilul nɔm polale nɔmnden taw-taw.»

³ O kon mí Abram baŋ vulan, mó tundu hɔlla lɛŋ. Mí Hala hiaw laci a ndu dimullo aa:

⁴ «Kpema ya co nɔm yiilu-o co hoo ni: a siŋnunnin fuɲa-mamaa le vanaa-mangalaa-isɔɔa súúlan taw.

⁵ Kandɔɔ hau, diola nɔmndan la co lɛ aa Abram te, kɛ Abraham (kon co dimio ni aa ‹Fuɲaa fàngà-kundaa›). Kani i siinguunin nɔm fuɲa-mamaa le vanaa-mangalaa-isɔaa bɔɔ-bɔɔ.

⁶ I co nɔm cuavaa-imamaa kuilul taw, mì vanaa-mangalaa-isɔɔa súúlan taw a fula o polale nɔmnden nin. Masaa bɛɛ a fulanin o polale nɔmnden nin.

⁷ Kpema ya yii hoo-o co va naa tɛɛn naa nɔm, a naa tɛɛn naa cuavaa nɔmaa imamaa le fɛɛn a fɛɛn, haliko mi va Hala nɔmndo a Hala cuavaa nɔmaa imamaa nɔm kɔɔli.

⁸ Lɛŋnde n co len icali nin o sumialle len, lɛŋnde Kanaan-nden pɛɛn, i co nɔm len yɔngu niaa cuavaa nɔmaa imamaa mì le va lɛŋnde niaa le fɛɛn a fɛɛn. I vanin vɛlɛ Hala cuavaa nɔmaa imamaa.»

⁹ Mí Hala dimi vɛlɛ aa: «Lelan, la bii kpema nuu ho balan latiɔn niaa cuavaa nɔmaa imamaa, mì la manda ndu le fɛɛn a fɛɛn.

¹⁰ Kpema niaa bɛnda kon le biyɔɔ a mandaa niaa cuavaa nɔmaa imamaa-o co hoo ni: ɲɛ-ɲɛ co vanpiaandua o nɔm ndo cɛinin kpede, a bɛnda mà dii toomaa.

¹¹ Kon vanin tɔɔmasele kpemaa naa tɛɛn naa niaa ni.

¹² Le fɛɛn a fɛɛn, te la velu pɛ hɔ́ɔ́ piaandoo, la dii ndu tooma o paale ŋɔmaandɔlen coo. Hɔ́aa piaandua vialunnin o polale nɔmnden coo-a bɛnda mà dii toomaa, cɛa niaa co piondɔɔ mialla o ba a volion-nda bɛɛ, hali a co bɛɛ polale nɔm kɛsɛ-kɛsɛ le, a bɛnda mà dii toomaa.

¹³ Vanpiaandua kpow a bɛnda mà dii toomaa, o va poaa vialunnin o polale nɔmnden coo-a, o va vɛlɛ cɛa niaa piandunin a volion-nda, a bɛnda mà sɔla tuisio. Tɔɔmasele kpema ni vanin o dialii niɛi coo-o co kon ni. La bɛnda mì la va tosaa lende le fɛɛn a fɛɛn.

¹⁴ Vana dii tooma kon te, a faŋa ndu vanaa ndɔa tɛɛn, le tùú o kɛɛ tɔɔmasele kpema nuu cɛlɔɔ-o.»

Vana bɛnda mò cua kɛ Abraham-ndo-o

¹⁵ Mí Hala dimul vɛlɛ Abraham aa: «Le Sarai laa nɔm yɛ, a bɛnda lɛ ma veelu ndu aa Sarai le, kɛ diola ndɔlan nin aa Sara.

¹⁶ I co ndu duaa dɔvɔɔ mò vilul nɔm hɔ́ɔ́ piaandoo. I co ndu duaa dɔvɔɔ mo siŋnun kala-mama vanaa-mangalaa-isɔɔa súúlan taw. Masaa súúlan taw a fulanin ndu o ipulu.»

¹⁷ Mɛɛ Abraham tuei sɔɛi ken, mó baŋ vɛlɛ vulan, mó tundu hɔlla lɛŋ, mó mam ciki-ciki. Mó dimi o kɔl ndɔɔ nin aa: «Vanapɔnɔ yuuvɛi cii nin vɔsilan kɛmɛ-o nɔla pá mo velu hɔ́ɔ́? Yee Sara cii nin hoo vɔsilan belaŋɔmahiɔɔlu-o nɔla vɛlɛ mò cua folio, mo velu hɔ́ɔ́?»

¹⁸ Mó dimul Hala aa: «Ya ya, ɲɛ ya yeema nɔm o ba-o co ni, nɔ́ hɔlten Ismaɛl coo mà dɔw ndu duaa.»

¹⁹ Mí Hala dimul ndu aa: «Ɛ-ɛ, Sara laa nɔm kpeekpei co nɔm poo vilul ni. O velu ndu pɛ, a ke ndu diolan aa Isaak» (kon co dimio ni aa «O mam»). I yiinin kpemaa a ndu a á cuavaa ndɔa imamaa le fɛɛn a fɛɛn.

²⁰ Le Ismaɛl-lɛ, i tuei piɛile n piɛi le ndu len. I co ndu duaa dɔvɔɔ mì yɔngu ndu cuavaa-imamaa taw. O kuinin ipulu, polale ndɔlen le vanin sɛ́lɛ́. I vangalanin cuavaa ndɔa imamaa. Langbaa kɛsun kálàá tɔ́ a à ŋiɔn a fulanin ndu nin. I siinguunin ndu fuɲa-mamaa le vanaa-mangalaa-isɔɔa sɛ́lɛ́ bɛndoo.

²¹ Kɛ a Isaak ya co hunɔɔ kpema nuu yii ni, po Sara laa nɔm vilulnin nɔm a boondei he ɲinasiaŋ-ndo pɛɛn.

Abraham a vanaa ndɔa dii toomaa

²² Mɛɛ Hala cii sɔɛi o Abraham-ndo, mó faŋan ndu ikɛi.

²³ Paale len, mí Abraham dii Ismaɛl po ndɔ tooma, mó tuisi vɛlɛ vanpiaandua velun o ndu lo cɛinin-nda a cɛa piaandua o pendu-a. Mí vanpiaandua va Abraham o ba bɛngu-a kpow a dii toomaa mɛɛ Hala dimul ndu le tosaa yɛ.

²⁴ Abraham pila ndóò nɔ vɔsilan belaŋɔmahiɔɔlu a laŋɔmahiɔɔlu, mó dii toomaa,

²⁵ Ismaɛl po ndɔ ndu, ndóò nɔ vɔsilan tɔ́ a layàá, mó dii toomaa.

²⁶ Paale pilɛlen kpé Abraham nda Ismaɛl po ndɔ a dii toomaa ni.

²⁷ Paale len koni vanpiaandua velun o ndu lo cɛinin-nda a cɛa nda pendu mialla o ba a volion-nda bɛɛ a dii toomaa ni.