O Kandɔɔ 15 - BII BILA

Kpema Mɛlɛka yiilu Abram-ndo

¹ Mí Mɛlɛka cɔmnun Abram o vundulen nin, mó dimul ndu aa: «Yɔŋ isiòòn te Abram. Ya co vana kanda nɔm-ndo ni, vɔ̀ngɔ̀ nɔmndo vanin o bɔɔ.»

² Mí Abram ɲuna ndu aa: «Maalii Hala, yɛɛ n co yɛ ya yɔngu? Má cè ya kɔnndan! Kɛ i co hɔ́ɔ́ mɛi le, Eliesɛr fula Damas-o loonin ɲɛm nun kpow kɛ́ɔ ni.»

³ Mí Abram dimi vɛlɛ aa: «A ke ya cua le, buɛi nuu le cuanin kɛ́ nuu le?»

⁴ Mí Mɛlɛka dimul ndu aa: «Ɛ-ɛ, langbanɔ kon cuenin kɛ́ nɔmndo le. Hɔ́ɔ́ nɔm pila solinnin o ipulu-o cuanin kɛ́ nɔmndo ni.»

⁵ O kon mí Mɛlɛka soli ndu o cɛi-kola-toandaa ndɔɔ nin, mó dimul ndu aa: «Taa nɔla pɛ, mɛɛndan-ndɔ loeon o halataala ma cɔm mun. Nuaa cuavaa nɔmaa imamaa vanin sɛ́lɔ́ɔ́ ni.»

⁶ Mí Abram laalan sɔɛi Mɛlɛka dimul ndu-e. Le hee, mí Mɛlɛka ca ndu vana sandaa.

⁷ Mó dimul ndu aa: «Ya co Mɛlɛka ni, ya faŋa nɔm o cieo Ur nin o lɛŋnde Kaldee len nin le nɔm lɛŋnden nden yɔngoo ɲɛ nɔm ni.»

⁸ Mí Abram ɲuna ndu aa: «Maalii Hala, vɛ̀ɛ̀ ya sina yɛnin pɛɛngu maa lɛŋnden nden le vanin ɲɛ ni?»

⁹ Mí Hala muli aa: «Kɔ hun a naw laandu téndé nɔ vɔsilan layàá-o o pilɛ, cuin laandu nɔ vɔsilan layàá-o o pilɛ, saa kóndó nɔ vɔsilan layàá-o o pilɛ, piindo o pilɛ a kangboo o pilɛ.»

¹⁰ Mí Abram kɔ hun a cɔlua kan, mó tɛɛndiaa nda tɛɛn kpálá-kpálá, mó kɛsi kumbula o tɛɛndiaa lan-ndan kpengei a kpengei, kɛ o tɛɛndiaa yowva le.

¹¹ Mí yovaa biyaa hun toal o visin cɔlua kan coo, kɛ mí Abram toaw nda.

¹² Tuma paalen le va le delɔɔ-o, mí diallon vu Abram lɔ́ngùlɔn, mí siòònde bii ndu, mó hiawnun o lɔan cundun o ɲumma bɛndu-bɛnduan nin.

¹³ Mí Mɛlɛka dimul ndu aa: «Sina pɛngu maa cuavaa nɔmaa imamaa kɔ calnin fɛɛn o sumialle o lɛŋnde pilalen nin. A siinguunin nda cɛa lon ma bɛpɛla nda o vɔsilan kɛmɛ lehiɔɔlu bɛngu.

¹⁴ Kɛ i dɔawnin vanaa-mangalaa-isɔaa nda vanin o ba o cɛlen nin-nda yɛɛvɛ. O kon mì cuavaa nɔmaa imamaa faŋan o lɛŋnde len nin, mà hin a ɲɛ-sɔlaa taw.

¹⁵ Le nɔm Abram yɛ, a co yuuva a kɔlkɛndɔɔ ɲɛkɛndɛi, mà komal fuɲaa nɔmnda a kɔlɲuloo ciee-piɔ́m.

¹⁶ Kɛ nduyɛ, fɔ mí vanndacieea hiow lambilan lahiɔɔlu malan cuavaa nɔmaa imamaa muungu nanu. Kani Amoriia va vɔ nin kɔlvesɛiyo tosaa háá telen kon.»

¹⁷ Mɛɛ paalen le del, mí ɲumndan ma toal kpingbi, mí felenfelen ikumndo a yinnde biyaalen le kei o visin Abram ndóò dii kundalan-ndon tɛɛn.

¹⁸ Paale len Mɛlɛka yiilu Abram kpemaa ni, mó dimul ndu aa: «I yii kpemaa maa i yɔngunin cuavaa nɔmaa imamaa lɛŋnden nden. Kandɔnndo a pee pɔmbɔɔ Esipte, kɔ bii a pee bɛndoo Efrate,

¹⁹ tàndá Keniia, Kenisiia, Kadmoniia,

²⁰ Hitiia, Perisiia, Refaimnda,

²¹ Amoriia, Kanannda, Kirkasiia a Yebusiia, i yɔngunin nda lɛŋii ken kpow.»