O Kandɔɔ 14 - BII BILA

Abram baŋa Lɔt yaamɔaa ndɔa o ba

¹ Telen Amrafɛl va masalen tosaa Sinear-o, Ariɔk va masalen tosaa Ellasar, Kedɔrlaomɛr va masalen tosaa Elam, Tideal ndu va masalen tosaa Koyim.

² Mí masaa hiɔɔlua kan kɔ del Bera masaa Sodɔm, Birsa masaa Komɔr, Sineab masaa Adma, Semɛebɛr masaa Seboyim a masaa Bela (kon co dimio ni aa «Soar») coo a cɔwvo.

³ Mí masaa nda kuel kan a cɔwvo-a bɛɛ cuungiaa vanaa ndaa cɔwva o dɛɛla bɛndoo Sidim nin, nɛɛ mɛmma hɛlii bɛnduan ma co nin hau-va.

⁴ O vɔsilan tɔ́ a latiɔn bɛngu, a va o biyɔɔ nin Kedɔrlaomɛr o ba, kɛ o vɔsi tɔ́ a o yàándɔɔ nin, má can má simul ndu.

⁵ O vɔsi tɔ́ a hiɔɔlundɔɔ nin, mí Kedɔrlaomɛr cua masaa ndaa cɛlan diom-nda, má kɔ del Refaimnda coo a cɔwvo Asterɔt-Karnaim. Má nɔla nda. Má kɔ toal vɛlɛ Susimnda coo Ham, má tiw nda ba. Má hiaw laci, má kɔ nɔla Emimnda Save-Kiriataim ciee.

⁶ Mɛɛ nda cɛn ndon, má kɔ tisa Horiia coo o pembei Seir coo. Má lo nda tovɔɔ háá má tiiya Paran, o lɛŋnde veselɛilen ikɛi.

⁷ Tuma nda va muungoo-o, má kei Ɛin-Mispat, Kadɛs pɛɛn. Lon bɛɛ, má tisa Amalɛkea a Amoriaa va icali Hasasɔn-Tamar-a coo, má tɛɛmbuu cieon ndan.

⁸ O kon, mí masaa Sodɔm, masaa Komɔr, masaa Adma, masaa Seboyim a masaa Bela (kon co dimio ni aa «Soar») bɛɛ kɔ cuungian o dɛɛla bɛndoo Sidim nin le nda simullo a cɔwvo.

⁹ Lon nda va Kedɔrlaomɛr masaa Elam, Tideal masaa Koyim, Amrafɛl masaa Sinear a Ariɔk masaa Ellasar cumullo a cɔwvo ni. Nda va a ŋuɛɛnu, masaa nda va cumullo-a va a hiɔɔlu.

¹⁰ Kɛ mí masaa Sodɔm a hoo Komɔr a ɲaanun. A lo ɲaanɔnndo, má kɔ deli o soonnda yingilaala va o dɛɛla bɛndoo Sidim nin-ndan nin. Mí vanaa hɛlun-nda nda ɲaanun, má kɔ vionnun o pembei coo.

¹¹ Mí masaa tow nda-a koma yunga cieon Sodɔm a Komɔr, má cua ɲɛm va lon-ndon, má cua ɲɛm vanaa kan ndáà manda le dioo-on, má kɔannun a mun.

¹² Má bii vɛlɛ Lɔt, po pɔmbɔɔ Abram-ndo, má kɔa a ndu a bolofaa ndɔɔ kpow. Kani Sodɔm lon Lɔt va telen kon icali ni.

¹³ Mí vana ɲaanun-ndo pum kɔ dimul Abram Hebreenɔ sɔɛi ken. Abram va icali o yálán Mamre Amoriinɔ-o ikɛi, Mamre kon va puapilɛ Ɛskɔl nda Anɛr-o ni. Langbaa yaa kan kpede, kpemaa va nda tɛɛn nda Abram-aa.

¹⁴ Mɛɛ Abram tuei maa a bii po pɔmbɔ ndɔ-o má kɔannun a ndu, mó bɛɛndiaa vanaa cɔvaa velun o ndu lo cɛinin-nda kɛmɛ leyáá a tɔ́ a à ŋɔmaa. Mó diam masaa bii Lɔt-a háá Dan.

¹⁵ Mɛɛ o bendal nda, mó piɔw vanaa ndɔa cɔwva kundalan, má del yaamɔaa ndaa kan coo o ɲumndan nin, má tiw nda ba. Má lo nda kɔlan a soŋɔɔ háá Hoba, Damas a ba luaŋ-ndo.

¹⁶ Mó puu nda ɲɛm nda sɔla o cɔwvo nin-ndon o laba. Mó puu vɛlɛ Lɔt, po pɔmbɔ ndɔ-o a ɲɛm ndɔn nda o ba, a vanlaandua a vanaa va o biyɔɔ nin nda o ba-a kpow.

Mɛlkisedɛk dɔw Abram duaa

¹⁷ Mɛɛ Abram nɔla Kedɔrlaomɛr a masaa nda va latulu-a, mó can muungoo. Mí masaa Sodɔm hun ndu bɔŋaa o dɛɛla bɛndoo Save nin (o ndáà veelu vɛlɛ aa dɛɛlaa bɛndu lemasaa-o pɛɛn).

¹⁸ Mí Mɛlkisedɛk, masaa Salɛm, ó va vana-solia-lasálà Hala-Hiow-Ɲɔɔn-Kpow-vo-o hun a buloo a á mɔiyan.

¹⁹ Mó dɔaw Abram duaa, mó dimi aa: «Màá Hala-Hiow-Ɲɔɔn-Kpow-vo, o cɔw halataala a lɛŋnden-ndo dɔw nɔm Abram duaa!

²⁰ Biiloo co le Hala-Hiow-Ɲɔɔn-Kpow-vo-o, o yɔngu nɔm kpaayaa má tiw yaamɔaa nɔmnda ba-o.» O ɲɛm Abram puu yaamɔaa ndɔa kan o ba-on nin, mó cua ipilɛ o tɔ́ oo tɔ́ coo, mó yɔngu Mɛlkisedɛk.

²¹ O kon mí masaa Sodɔm dimul Abram aa: «A yandi, mingul-la vanndacieea mì nɔm loo ɲɛ-sɔlaa le nɔm pila.»

²² Mí Abram mulul ndu aa: «I heelu baa mí mɛnan o Mɛlɛka lo, Hala-Hiow-Ɲɔɔn-Kpow-vo, o cɔw halataalaa a lɛŋnden-ndo,

²³ maa i co ɲɛ-ɲɛ nɔm loo le, hali kɛi nɔmndo co lo ya o ba le, o co vɔ le yoei lasamtɛi le, yɔŋii n dimi aa: ‹Abram sul a ɲɛm nun.›

²⁴ I yeema ɲɛ-ɲɛ nɔm te, fɔ ò langbaa felengia de-o. Langbaa liila ya-a yɛ, Anɛr, Ɛskɔl a Mamre pɛɛn, nda co o ndaa cua.»