Fulaa 9 - BII BILA

Kpundɛ ŋuɛɛnundɔɔ: nàà halimaa cɔlua

¹ Mí Mɛlɛka dimul Moise aa: «Kɔ ma kɔ komal Faraɔnnɔɔ, mà dimul ndu aa: ‹Mɛlɛka, Hala Hebreea dimul nɔm aa nɔm mal cuavaa ndɔa mà kɔ biilu ndu.

² Taa kɛɛ pɛ le nda malɔɔ, mà kungulan nda coo,

³ o co cɔlua nɔmaa co yondoo nin-nda soŋɔ̀ɔ̀. Nàà halimaa vɔɔndoo toalnin soa, sofɛlɛa, ɲɔɔmɛɛa, nawva, saa a cuinnda coo.

⁴ Mɛlɛka co cɔlua Esiptea a cɔlua Israɛlla sɛi, mì nàà halimaa kon kpakpala cɔlua Israɛlla. O cɔlua ndaa tɛɛn, o pilɛ bɛɛ vinin te.›»

⁵ Mí Mɛlɛka yam lɔ́ɔ́ o tuisinin kpundɛ kon nda coo-o, mó dimi aa: «Siɔdii ya tuisinin kpundɛ kon o lɛŋnde Esipte len coo ni.»

⁶ Diimandɔ kon tiiyaa, mí Mɛlɛka tosa mɛɛ o dimi yɛ. Mí cɔlua Esiptea cuu vu kpow, kɛ hali cɔloo ndu pilɛ o vi o cɔlua Israɛlla tɛɛn te.

⁷ Mí Faraɔnnɔɔ viam vanndo le kɔlan sɔɛi ken kpɛngbɛlaa o Israɛlla lo, kɛ mó tuɛi maa hali cɔloo ndu pilɛ vi o cɔlua ndaa tɛɛn te. Hali a ken kpede, mí Faraɔnnɔɔ kindi nilan, o mel Israɛlla kɔlan te.

Kpundɛ ŋɔmpumndɔɔ: piɔŋndan

⁸ Mí Mɛlɛka dimul Moise nda Aarɔn aa: «La kɔndu pulta cal o tóndó bɛndu leyinndo nin-ndan bala tiɔn sakpo, mì Moise saŋ ndan coocoo fásàn Faraɔnnɔɔ o hɔl.

⁹ Pulta lan la siŋnunnin cundoo o lɛŋnde Esipte len kpow coo, mì la soli vanndacieea a cɔlua piɔŋndan Mì piɔŋnda lan la siŋnun pavii vɔɔnde.»

¹⁰ Mí Moise nda Aarɔn a kɔandu pultan, má kɔa o Faraɔnnɔɔ lo, mí Moise saŋ ndan coocoo fásàn. Mí la soli vanndacieea a cɔlua piɔŋndan háá mí piɔŋnda lan la siŋnun pavii vɔɔnde.

¹¹ Vanaa mangalaa Esipte a nɔla lɛ le hunɔɔ simndan Moise o hɔl o kon te, kani nda bɛɛ mí piɔŋndan la fula nda mɛɛ la fula Esiptea tɔ̀a yɛ.

¹² Kɛ maa mɛɛ Mɛlɛka ndóò dimul Moise yɛ, mí ndu Mɛlɛka kindi Faraɔnnɔɔ nilan, o cɛl le sɔɛi Moise nda Aarɔn-nde biyɔɔ le.

Kpundɛ ŋɔmmɛwndɔɔ: loeon delian

¹³ Mí Mɛlɛka dimul Moise aa: «Pena fula púŋ ma kɔɛ o Faraɔnnɔɔ lo, ma dimul ndu aa: ‹Mɛlɛka, o co Hala Hebreea-o dimul nɔm aa nɔm mel ndu vanaa ndɔa mà kɔ biilu ndu.

¹⁴ Kani sisa nin, o cii kiolɔɔ le nɔm kpundɛla súú-súù ka tuisio coo niaa vanaa nɔmaa baalaa a Esiptea tɔ̀a kpow, haliko ma sina maa vana-vana siiman a ndu Mɛlɛka o ceendo coo le.

¹⁵ Te ndóò siɛndi pɛ baa mì ndóò tuisi nɔm nàà halimaa coo, la va cuu niaa lɛŋnde nɔmnden mí niáà faŋan o ceendo coo.

¹⁶ Kɛ o mɛi nɔm yoomu le nɔm kpaaya ndɔɔ cɔmndo a le tɔ́ɔ́ ndɔɔ sɛŋio o lɛŋnden coo kpow.

¹⁷ Kɛ háá hau, nɔm Faraɔnnɔɔ, a co vɔ cuavaa ndɔa kuunanndo coo, má kɛɛ le nda malɔɔ kɔlan.

¹⁸ Lelan, a telenndo ho siɔdii, o co piɔɔ n'loo tuisi, mì loeon deli delio pila. Kabi lɛŋnde Esipte len le cɔwnun, háá paalen nden hau, loeon vaa lende n deli vɔ le.

¹⁹ Lelan, viom vannda ma kɔ vion cɔlua nɔmnda a ɲɛ-ɲɛ co nɔm o ba yondoo nin. Kani vanndacieea a cɔlua vanin yondoo nin-nda, taa vinnun cɛilan nin te, loeon co nda deli coo ma vi.›»

²⁰ O vanaa baalaa Faraɔnnɔɔ tɛɛn, vanaa siòònde bii a sɔɛi Mɛlɛka-i ken-nda, mí nda vian buɛyaa ndaa a cɔlua ndaa cɛilan nin.

²¹ Kɛ vanaa siòòŋii bii a sɔɛi Mɛlɛka-i ken te-a, mí nda mɛi buɛyaa ndaa a cɔlua ndaa yondoo nin.

²² O kon mí Mɛlɛka dimul Moise aa: «Heelu ba nɔmndo coocoo, haliko mi loeon deli o lɛŋnde Esipte len kpow coo, mì n deli vanndacieea a cɔlua coo, mì n deli vɛlɛ o bil kiyɛiyo kpow coo o lɛŋnde Esipte len nin.»

²³ Mí Moise heelu tinda ndɔɔ coocoo, mí Mɛlɛka tuisi piɔɔ mataŋndo a loeon. Mɛɛ taŋndan má deli tei, mí Mɛlɛka tuisi loeon delian o lɛŋnde Esipte len kpow coo.

²⁴ Loeon va delio a taŋndan latulu, mí ɲɔɔ bingulan kpow. Ɲɔɔ ndóò vɔw bɔɔ mbɔ̀! Kabi lɛŋnde Esipte len le co, ɲɛ súú vaa lende tosan-ndɔ le few.

²⁵ O lɛŋnde len nin kpede, mí loeon tɛɛmbuu vanndacieea a cɔlua va yondoo nin-nda, mí n tɛɛmbuu vɛlɛ billo a yɔmnde yondoo nin kpow.

²⁶ Fɔ o tàndàá Kosɛn nin loeon mun deli le ni, kani lon Israɛlla va icali ni.

²⁷ Mí Faraɔnnɔɔ viam kilaa le kɔlan Moise nda Aarɔn veeloo, mó dimul nda aa: «O laan ndu, i cua hakio. O sandaa Mɛlɛka ndu co ni, kɛ naa n co vanaa yɔŋ vɔɔnda naa yungu nuu ni.

²⁸ La piɛi Mɛlɛka le ya yandi, haliko mi taŋndan a loeon pɛngi delio. I co niaa malɔɔ mì la kɔɛ, i bii lɛnin niaa n'pelu le.»

²⁹ Mí Moise mulul ndu aa: «Te i faŋan dɔ́ɔ́ ciee nanu pɛ, i heelu balan o Mɛlɛka lo le ndu tɛɛlɔnndo. O kon, taŋndan ma pɛngi deŋio, loeon bɛɛ n pɛngi delio, haliko ma sina maa Mɛlɛka nɔ lɛŋnden ni.

³⁰ Nduyɛ, i sina maa niaa vanaa nɔmaa baalaa, la nɔnin vɛlɛ siòòŋii Mɛlɛka-e kpeekpei le, Hala pɛɛn.»

³¹ Mí funnden a ɔrse tambu, kani ɔrse ndóò cuu nin cuulu, funnden bɛɛ léè cuu nin yandɔɔ.

³² Kɛ maalon a sɔkpɔn mun tembu le, kani mun yala cuulu le.

³³ Mí Moise fula o Faraɔnnɔɔ lo, mó faŋan o kobio nin, mó heelu balan coo, mó piɛi Mɛlɛka. O kon, mí taŋndan má pɛngi deŋio, mí loeon pɛngi delio, mí piɔɔ viangu.

³⁴ Mɛɛ Faraɔnnɔɔ ce maa piɔɔ vengu, loeon ve lɛ deli le, taŋma ve lɛ deŋi le, mó luɛinun vɛlɛ o yɔŋ vɔɔndo nin, má kindi vɛlɛ nilan nda vanaa ndɔa baalaa.

³⁵ Maa mɛɛ Mɛlɛka soo a sondo Moise-o yɛ, mó kɛɛ le Israɛlla malɔɔ kɔlan.