Fulaa 8 - BII BILA

¹ Mí Mɛlɛka dimul vɛlɛ Moise aa: «Dimul Aarɔn mò siɛndi baa o peela bɛndulan, o tɛyun mamɛnndon a o dalalan kpow, haliko mi ŋɔɔŋɔɔnda fula, mà tiw o lɛŋnde Esipte len kpow nin.»

² Mí Aarɔn yulu baa a kpengii mɛnndan ma co Esipte-e, mí ŋɔɔŋɔɔnda fula, má coŋ o lɛŋnde Esipte len nin vuyɛɛ.

³ Mí vanaa mangalaa Esipte bɛɛ a tosa dɛnɛ kɔndɔfili kon a kpaaya nda mangalaa. Má soli ŋɔɔŋɔɔnda, mí ŋɔɔŋɔŋaa kan hel o kɔngɔ o lɛŋnde Esipte len coo.

⁴ Mí Faraɔnnɔɔ veelu Moise nda Aarɔn, mó dimul nda aa: «La tɛɛlun Mɛlɛka haliko mi ŋɔɔŋɔɔnda ha fula naa coo naa vanaa co o lɛŋnde nilen nin-nda. O kon, mì mal vanaa niaa, mà kɔ solul Mɛlɛka sálàá.»

⁵ Mí Moise dimul ndu aa: «Bala tiɔn, fallo. Kɛ mɛɛ n co vana bɛndoo yɛ, nɔm pila yom lɔ́ɔ́ ya bɛnda mì tɛɛlun Mɛlɛka le nɔm pila, le vanaa nɔmaa baalaa a le vanaa tɔ̀a kpow-vo, haliko mi ɲuna Mɛlɛka mò diw ŋɔɔŋɔɔnda, mà faŋan o nɔm ndo a o cɛila nɔmndan nin, mà lo o pee bɛndoo Nil kínɛí.»

⁶ Mí masaa yam lɔ́ɔ́ aa: «Siɔdii.» O kon, mí Moise mulul ndu aa: «I sɔɔ laba. I tosannin siɔdii lende, haliko ma sina pɛngu maa vana-vana sulan a Mɛlɛka le, Hala naa pɛɛn.

⁷ Ŋɔɔŋɔɔnda co nɔm faŋan coo o cɛila nɔmndan nin, o cɛila vanaa nɔmaa baalaa nin a o cɛila vanaa tɔ̀a kpede nin, mà lo o pee bɛndoo Nil kɔllo kínɛí.»

⁸ Mí Moise nda Aarɔn a fula o Faraɔnnɔɔ lo cɛinin, mí Moise kɔ tɛɛlun Mɛlɛka le ŋɔɔŋɔŋaa o cuiŋi kan ndu Faraɔnnɔɔ coo-a diwvo.

⁹ Mí Mɛlɛka muli piɛile Moise len, mí ŋɔɔŋɔɔnda vu cɛilan nin, o bɛ́ɛ̀lan a o ciɛɔn nin.

¹⁰ Mɛɛ nda vi, má diw nda bémbéla bɛndulan yilin-yilin, mí lɛŋnden le fula cun kuí-kuí.

¹¹ Mɛɛ Faraɔnnɔɔ ce maa kpundɛ kon faŋan nda coo, mó kindi vɛlɛ nilan maa mɛɛ Mɛlɛka ndóò dimi yɛ, mó kɛɛ le sɔɛi Moise nda Aarɔn-nde biyɔɔ.

Kpundɛ yàándɔɔ: muiya

¹² Mí Mɛlɛka dimul Moise aa: «Dimul Aarɔn mò heelu tinda ndɔɔ, mò lɔɔ cundoo lɛŋ, haliko mi cundu kon mangalan muiya o lɛŋnde Esipte len nin kpow.»

¹³ Má tosa mɛɛ Mɛlɛka dimul nda yɛ. Mí Aarɔn bii tinda ndɔɔ o ba, mó heelu ndu, mó lɔaa cundoo lɛŋ. Mɛɛ o lɔɔ ndu, mí cundu kon siŋnun muiya, mí muiyaa kan toal vanndacieea a visia coo. Mí cundoo siŋnun muiya o lɛŋnde Esipte len nin kpow.

¹⁴ Mí vanaa mangalaa Esipte kindikindin o kpaaya nda mangalaa nin le muiya tovɔɔ, kɛ a nɔla le. Mí muiya va vanndacieea a visia kisio tuŋ-tuŋ.

¹⁵ O kon, mí vanaa mangalaa kan dimul Faraɔnnɔɔ aa: «Kpaaya Hala-o kposon co mɔnɛ soli nuaa ni.» Kɛ a kon kpow, mí Faraɔnnɔ kon kindi nilan kpoke maa mɛɛ Mɛlɛka ndóò dimi yɛ, o bii sɔɛi Moise nda Aarɔn-nde le.

Kpundɛ hiɔɔlundɔɔ: sunbungaa

¹⁶ Mí Mɛlɛka dimul Moise aa: «Cɔn idiiyo púŋ mà kɔɛ o Faraɔnnɔɔ lo telen o vanin kɔlan o pee bɛndoo Nil-lo, mà dimul ndu aa Mɛlɛka dimul nɔm le cuavaa ndɔa malɔɔ mà kɔ biilu ndu.

¹⁷ Kɛ taa kɛɛ pɛ le nda malɔɔ, o co niaa sunbungaa tuisi coo niaa vanaa nɔmaa baalaa a vanaa tɔ̀a kpow, mà pɛ o cɛila nɔmndan nin ca. A co piɔ o cɛilan nin mà kumbu lɛŋnden kpow.

¹⁸ Kɛ sunbungaa kalaa tiiyanin o tàndàá Kosɛn nin te, kani lon cuavaa ndɔa co icali ni. Hali sunbungaa ndu pilɛ tiiyanin ndon te, haliko ma sina maa ndu Mɛlɛka co o lɛŋnden nden tɛɛn.

¹⁹ O co tosa mì kpundɛ co kon niaa tolɔɔ coo-o kpakpala cuavaa ndɔa. Nduyɛ siɔdii kpundɛ kalaa tosannin ni.»

²⁰ Mí Mɛlɛka tosa mɛɛ o dimi yɛ kangalan. Mí sunbungaa luɛi kundala bɛndulan o Faraɔnnɔɔ lo cɛinin, o vanaa ndɔa baalaa lo cɛilan nin a o cɛila Esiptea nin kpow. Mí ɲɛ-ɲɛ hiilun o lɛŋnde Esipte len nin a mɔnɛ sunbungaa kan va solio-o.

²¹ O kon, mí Faraɔnnɔɔ veelu Moise nda Aarɔn, mó dimul nda aa: «La kɔ mì la kɔ solul Hala niaa sálàá. Kɛ la kɔa inɛɛ le, la solul ndu sálà kalaa o lɛŋnde nilen nin nanu.»

²² Mí Moise mulul ndu aa: «Ɛ-ɛ, n bɛnda mì n tosa lende le, kani ɲɛ naa n solulnin Mɛlɛka naa sálàá-o vanin bɔɔ ɲɛ nɔɔlɛi bɛndu le Esiptea. Nduyɛ te n soli pɛ sálà súú vaa lende nda o hɔl, vɛ̀ɛ̀ a viinin naa a powtan te?

²³ N bɛnda mì n kɔɛ kɔla palɛi yaa o lɛŋnde veselɛilen nin, mì n kɔ solul Mɛlɛka Hala naa sálàá lon mɛɛ ndu pila cɔmnin naa falenndon yɛ.»

²⁴ O kon, mí Faraɔnnɔɔ dimi aa: «Mɛɛ i sɔɔ laba. I co niaa malɔɔ mì la kɔ solul Mɛlɛka sálàá o lɛŋnde veselɛilen nin, Hala niaa pɛɛn. Kɛ la kɔa levil te dɛ! La kɔɛ pɛ, la piɛi Mɛlɛka le ya.»

²⁵ Mí Moise mulul ndu aa: «Te i fula dɔ́ɔ́ pɛ nanu, i kɔ piɛi Mɛlɛka. O Kon, siɔdii sunbungaa co fondaa malɔɔ, mà faŋan nɔm Faraɔnnɔɔ, vanaa nɔmaa baalaa a vanaa co o lɛŋnde nɔmnden nin-nda kpow kɔɔli. Kɛ nduyɛ, hui lɛ naa mà kuuna Israɛlla kɔlan Mɛlɛka ndaa sálàá solullo le dɛ!»

²⁶ O kon, mí Moise fula o Faraɔnnɔɔ lo, mó kɔ piɛi Mɛlɛka.

²⁷ Mí Mɛlɛka tuɛi piɛile ndɔlen, mó tosa mɛɛ o piɛi ndu yɛ. Mí sunbungaa kɔannun, má faŋan Faraɔnnɔɔ, vanaa ndɔa baalaa a vanaa tɔ̀a kpow kɔɔli. Hali o pilɛ lo lon te.

²⁸ A kon kpow, mí Faraɔnnɔɔ kindi vɛlɛ nilan, o cɛl le Israɛlla malɔɔ kɔlan te.