Fulaa 7 - BII BILA

¹ Mí Mɛlɛka dimul Moise aa: «Tofa vɔ, i siinguu nɔm maa hala Faraɔnnɔɔ o hɔl, mí siinguu Aarɔn bɛ nɔm vana-tɛɛngaa-diom Hala-o le nɔm.

² Sɔɛi-sɔɛi ya dimul nɔm pɛ, nɔm tɛɛnguu ndi o Aarɔn bɛ nɔm ndo. O kon, ndu kɔ soo niko o Faraɔnnɔɔ lo haliko mo mal Israɛlla faŋanndo o lɛŋnde ndɔlen nin.

³ Kɛ i co ndu Faraɔnnɔɔ nilan kindi peŋ. I cɔɔlunin sɔɔn kɔndɔfillon a kaamaalan tosa o lɛŋnde ndɔlen nin.

⁴ Kɛ o yeŋnin niaa lani le. O kon, i cɔmnin Esiptea kpaaya nuu a kpundɛla bɛndula ya vanin nda tuisio coo lan. I mulinnin o kon kɔɔli mì soli vanaa nia a kundalan o lɛŋnde Esipte len nin, Israɛlla pɛɛn.

⁵ Kon tosan pɛ, Esiptea sina dɔ́ɔ́ maa ya co Mɛlɛka ni. Kani i tuisinin nda sangaa coo, mì soli Israɛlla nda tɛɛn.»

⁶ Mí Moise nda Aarɔn a tosa mɛɛ Mɛlɛka dimul nda yɛ.

⁷ Telen nda kɔ soo o Faraɔnnɔɔ lo-o, Moise ndóò nɔ vɔsilan belaŋɔmaa, Aarɔn ndóò nɔ belaŋɔmaa a layàá.

Faraɔnnɔɔ kɛɛ Moise nda Aarɔn diom

⁸ Mí Mɛlɛka dimul vɛlɛ Moise nda Aarɔn aa:

⁹ «Te Faraɔnnɔɔ ɲuna niaa pɛ le dɛnɛ kɔndɔfillo tosaa, nɔm Moise, a dimul Aarɔn o cua tinda ndɔɔ, o vuu ndu lɛŋ masa kon o hɔl, haliko mo mangalan kɛwvo.»

¹⁰ Mí Moise nda Aarɔn a kɔa o Faraɔnnɔɔ lo, má tosa mɛɛ Mɛlɛka dimul nda yɛ. Mí Aarɔn vuu tindaa lɛŋ Faraɔnnɔ kon nda vanaa ndɔa baalaa o hɔl, mí tindaa mangalan kɛwvo.

¹¹ Mɛɛ Faraɔnnɔɔ ce dɛnɛ kon, mí ndu bɛɛ veelu vanaa ndɔa mangalaa. Mɛɛ nda hin, mí nda bɛɛ tosa lende a kpaaya nda mangalaa.

¹² Mí vana-vana vuu tinda ndɔɔ lɛŋ, mí tindala lan bɛɛ la mangalan kɛwva. Kɛ mí tinda Aarɔn-ndo misi tindala ndalan.

¹³ Kɛ hali kon, mɛɛ Mɛlɛka dimi yɛ, mí Faraɔnnɔɔ kindi nilan peŋ, o cɛl sɔɛi ndɛi le.

Kpundɛ tasoo: mɛnndan ma mangalan koovan

¹⁴ Mí Mɛlɛka dimul Moise aa: Faraɔnnɔɔ kindi nilan mó kɛɛ le Israɛlla malɔɔ kɔlan.

¹⁵ Lelan, pena lakɔ púŋ o ndu lo, telen o vanin kɔlan o pee bɛndoo Nil-lo. A kɔɛ pɛ, a kɔ sim ndu o hɔl o kɔngɔ pee bɛndu kon coo. A va pɛ kɔlan, a kɔɛ a tinda mangalan kɛwvo-o o ba.

¹⁶ O kon, a dimul ndu aa: «Mɛlɛka, Hala Hebreea vem ya o nɔm ndo le nɔm dimullo aa nɔm mal cuavaa ndɔa mà kɔ biilu ndu o lɛŋnde veselɛilen nin. Kɛ háá hau, nɔm, á cɛl te.

¹⁷ Lelan, Mɛlɛka dimi maa o laan ndu, a co sina válán maa ndu co Mɛlɛka ni. I co mɛmma co o pee bɛndoo Nil-lan lɔɔ a tinda co hoo ya o ba-o mì ma mangalan koovan.

¹⁸ Suvaa co lenin-nda co vu mì mɛmma kalan ma tambu. Ma hɛnan ndɛnin Esiptea kolɔɔ le.»

¹⁹ Mí Mɛlɛka dimul vɛlɛ Moise aa: «Dimul Aarɔn mò cua tinda ndɔɔ, mò yulu baa nɛɛ-nɛɛ mɛnndan ma co o lɛŋnde Esipte len nin. Kandɔɔ a peela bɛndulan, tɛyun mamɛnndon, dalalan, kɔ bii a peela pɔmbɔlan, haliko mi mɛnndan kpow ma siŋnun koovan o lɛŋnde Esipte len nin kpede. O kon, koovan ma luɛinin o ɲɛm-laandun cɔwnun a yɔmnde-on a o ɲɛm-laandun cɔwnun a powtan-ndon nin.»

²⁰ Mí Moise nda Aarɔn a tosa mɛɛ Mɛlɛka dimul nda yɛ. Mí Aarɔn heelu tindaa, mó lɔaa mɛmma pee bɛndoo Nil Faraɔnnɔɔ a vanaa ndɔa baalaa o hɔl. Mí mɛmma man ma mangalan koovan.

²¹ Mí suvaa va o peelo-a vu kpow, mí mɛmma pee bɛndu kon ma tambu. Esiptea nɔla lɛ man kolɔɔ le. Mí koovan ma tiw vɛlɛ o lɛŋnde Esipte len nin kpede.

²² Mí vanaa mangalaa Esipte bɛɛ tosa dɛnɛ kɔndɔfili pilɛ kon a kpaaya nda mangalaa. Mí Faraɔnnɔɔ cɔɔlu vɛlɛ nilan kindi, mó kɛɛ le sɔɛi Moise nda Aarɔn-nde biyɔɔ maa mɛɛ Mɛlɛka ndóò dimi yɛ.

²³ Mó mulin, mó luɛinun o ndu lo cɛinin, o ci bɛɛ sɔɛi ken maa isɔɔ le.

²⁴ Mí Esiptea kpow a toaw soonnda kólaalan o pee bɛndoo Nil dangalaa le mɛmma kolan sɔlaa. Kani ndáà nɔla lɛ mɛmma pee bɛndoo Nil kolɔɔ le.

²⁵ Mɛɛ Mɛlɛka tuisi kpundɛ mɛnndan Nil ma mangalan kon koovan-ndo, má lo o sanga kon nin háá palɛi ndii ŋɔmmɛw.

Kpundɛ diinndɔɔ: ŋɔɔŋɔɔnda luɛi cɛilan nin

²⁶ Mí Mɛlɛka dimul vɛlɛ Moise aa: «Kɔ komal Faraɔnnɔɔ, mà dimul ndu aa Mɛlɛka dimi aa nɔm mal cuavaa ndɔa ma kɔ biilu ndu.

²⁷ Taa kɛɛ pɛ le nda malɔɔ, o co niaa ŋɔɔŋɔɔnda cucɔɔ coo mà tiw o lɛŋnde niaalen nin kpow.

²⁸ Ŋɔɔŋɔŋaa kan a fulanin o pee bɛndoo Nil, mà hel o kɔngɔ, mà luɛi o nɔm ndo cɛinin, mà tiiya o cɛi nɔm lɔlaa nin di, mà hel o kpele nɔmndo coo. A luɛinin vɛlɛ o cɛila vanaa nɔmaa baalaa nin a o cɛila vanaa tɔ̀a kpow nin, o cɛila nɔmnda loamaa bululan nin a o ciliŋun nda linda kpeyanndo nin le buloo lomɔɔ-on nin.

²⁹ A co nɔm helɔɔ coo, mà hel vanaa nɔmaa baalaa a vanaa tɔ̀a kpede coo.»