Fulaa 40 - BII BILA

Le cɛi-kola-toandaa diandaa tondɔɔ a le ndu sɔɔ Mɛlɛka o ba

¹ Mí Mɛlɛka soaa o Moise lo, mó dimul ndu aa:

² «Te paangii tasei cɔm pɛ, paale tasele paangii ken, a tondu Calta Mɛlɛka lan, cɛi-kola-toandaa-labɔɔŋianndo pɛɛn.

³ A cii pɛ ndu tondɔɔ, a luei kesu kpemaa lenin, a ven ndu o kola-landaa kɔɔli.

⁴ Ma hin vɛlɛ a tabalio, ma kɛsi bulu co le kɛsio ya Mɛlɛka o hɔl-lo lecoo. Ma hin a ɲɛ kɛsiaa lafitinaa, ma kɛsi fitinalan lecoo.

⁵ Ma hin a fonda loamaa cuɛima cun kɛndɛ nda cɔw a sianion le ansan lomɔɔ lecoo-o, ma kɛsi ndu o kesu kpemaa hɔl-ndɔ, ma baa kola-landaa o dio Calta Mɛlɛka la lan.

⁶ Ma kɛsi fonda nda loam sálàla loamaalan coo-o o Calta Mɛlɛka la lan sondoo, cɛi-kola-toandaa-labɔɔŋianndo pɛɛn.

⁷ Ma kɛsi fɛngɛ bɛndu mamɛnndo o cɛi-kola-toandaa diandaa a fonda-loamaa-lasálà kon tɛɛn, ma vow mɛnndan lenin.

⁸ Ma balu kunga bɛ́ɛ̀ cɛi-kola-toandaa diandaa kon tondɔɔ sɔ́, ma landu kola-landaa o dio kunga bɛɛ kon.

⁹ Ma cua cuɛima co le pɔlaa-an, ma pɔla Calta Mɛlɛka lan a ɲɛm co lenin-ndon kpede. Ma dindi ndu Mɛlɛka o hɔl a ɲɛm ndɔn vallon kpow, mò va le vali ndɔɔ.

¹⁰ Ma pɔla vɛlɛ fonda nda loam sálàla loamaalan coo-o a ɲɛm ndɔn laandon kpow, ma dindi ndu Mɛlɛka o hɔl, mó siŋnun ɲɛ diandaa-diandaa.

¹¹ Ma pɔla fɛngɛ bɛndu mamɛnndo a fonda o kɛsi tumndo nin-ndo, ma dindi ndu Mɛlɛka o hɔl.

¹² Ma sɔɔnguu vɛlɛ Aarɔn nda poaa ndɔa o cɛi-kola-toandaa-labɔɔŋianndo sondoo, ma pulu nda a mɛnndan,

¹³ ma vow Aarɔn volɔɔla solia lasálàlan, ma pɔla ndu le ndu sɔɔ Mɛlɛka o ba, haliko mo siŋnun vana-solia-lasálà nuu.

¹⁴ Ma sɔɔnguu vɛlɛ poaa ndɔa, ma vow nda domala lebɛngulan,

¹⁵ ma pɔla nda mɛɛ n pɔlanin fuɲa nda yɛ, mì nda bɛɛ siŋnun vanaa-solia-lasálàà nia. Pɔla n pɔlanin nda kon-ndo tosanin ni mì vali solia lasálàá siŋnun vali nda le fɛɛn a fɛɛn, kandɔɔ a nda pila, kɔ bii a cuavaa ndaa imamaa.»

Moise tondu cɛi-kola-toandaa diandaa

¹⁶ Mí Moise tosa ɲɛ-ɲɛ Mɛlɛka dimul ndu le tosaa.

¹⁷ Mɛɛ paangii tasei vɔsi diinndɔɛi cɔm, paale tasele paangii ken, mó toandu Calta Mɛlɛka lan.

¹⁸ Nuaa Moise tondu Calta Mɛlɛka la lan ni: mɛɛ o toosiaa ɲɛla sungbuan ma kɛsì tumndan nin-ndan, mó simi pɛngɛn bii cɛiyo-on, mó baŋ kandolan, mó tɔal sungbuan.

¹⁹ Má toandu kolaa o Calta Mɛlɛka la kalalan coo, má kuumbuu kola va le cɛi kon vuɔɔ-o lecoo, má tosa mɛɛ Mɛlɛka cɔm Moise le tosaa yɛ kpafii.

²⁰ Mí Moise cua powta yɛ́ndɛ́la tiɔnnda sɔɔn kpeman va n'sɛvaa coo lan, mó kɛsi lan o kesoo nin. Mó luei yɔmii va le kesu kon cuaa-e o kelan nda lɛɛnduu lon-ndon nin, mó handu kumbu kesu kon o kesoo coo.

²¹ Mó dimul vannda, má kɔa a kesu kalaa o Calta Mɛlɛka lan nin, mó landu kola-landaa sɛi Fonda-Diandaa a Fonda Diandaa-Diandaa-o, yɔŋii vanáà cɔ kesoo. Mó tosa mɛɛ Mɛlɛka dimul ndu yɛ kpafii.

²² Mó luei vɛlɛ tabalio o Calta Mɛlɛka lan nin, mó kɛsi ndu o cɛi-kola-toandaa-labɔɔŋian kon a maluaŋ o kola-landaa hɔl-ndɔ.

²³ Mó kɛsi buloo lecoo polalen lepilɛ Mɛlɛka o hɔl, mɛɛ Mɛlɛka pila cɔm ndu yɛ.

²⁴ Mó luei vɛlɛ ɲɛ kɛsiaa lafitinaa o cɛi-kola-toandaa-labɔɔŋianndo nin, mó kɛsi ndu o Calta Mɛlɛka la lan a ba too o tabalio hɔl-ndɔ.

²⁵ Mó bɛɛndiaa fitinalan kɛsi Mɛlɛka o hɔl mɛɛ ndu pila cɔm ndu le tosaa yɛ.

²⁶ Mó luei vɛlɛ fonda nda loam cuɛima cun kɛndɛan coo-o o cɛi-kola-toandaa diandaa kon nin, mó kɛsi ndu o kola-landaa hɔl-ndɔ.

²⁷ Má loam lasikɔlɔ cun kɛndɔɔ lecoo mɛɛ Mɛlɛka pila dimi le tosaa yɛ.

²⁸ Mó landu kola-landaa o dio Calta Mɛlɛka lan.

²⁹ Mó kɛsi fonda-loamaa-lasálàá o Calta Mɛlɛka lan sondoo, cɛi-kola-toandaa-labɔɔŋianndo pɛɛn. Mó solul Mɛlɛka sálà loamaa a sálà ɲɛm vaa mɛɛ ndu pila cɔm le tosaa yɛ.

³⁰ Mó kɛsi fɛngɛ bɛndu mamɛnndo o cɛi-kola-toandaa-labɔɔŋian kon a fonda-loamaa-lasálàá tɛɛn, mó vow mɛnndan lenin le dindinndo.

³¹ Mí Moise, Aarɔn a poaa ndɔa pulu balan a pelon a mɛmma man.

³² Lɔ́ɔ́-lɔ́ɔ̀ ndáà va pɛ luɛyɔɔ o cɛi-kola-toandaa-labɔɔŋianndo nin, te kon te mì ndáà va sɔɔnguuo o fonda-loamaa-lasálàá ikɛi le sálàá solio, lende ndáà kei balan a pelon pulɔɔ a mɛmma man ni, lende Mɛlɛka pila dimul nda le tosaa ni.

³³ Mí Moise lɛɛnduu kolalan o kunga bɛɛ Calta Mɛlɛka la lan kpow, kunga balu kon cɛi kalaa a fonda-loamaa-lasálàá-o, mó baa kola-landaa o dio kunga kon. Mɛɛ nuaa Moise cii vali Calta Mɛlɛka lan kpow tosa ni.

Biilu Mɛlɛka-o pɛ o cɛi-kola-toandaa diandaa nin

³⁴ O kon mí kumnde kumbu cɛi-kola-toandaa-labɔɔŋianndo mɔku-mɔku, mí biilu Mɛlɛka-o pia o Calta Mɛlɛka la lan nin ca.

³⁵ Moise nɔla luɛyɔɔ lenin te, kani kumnde va lecoo mó va o piaa cá a biilu Mɛlɛka-o.

³⁶ Kandɔɔ paale len, háá telen nda tiiya-o, te Israɛlla ndáà ce nin dɔ́ɔ́ pɛ kumnde cɔnɔnndo o Calta Mɛlɛka lan coo, ndáà faŋan nɛɛ nda va icali-a le hiovɔɔ laci.

³⁷ Kɛ te ndáà ci vɔ kumnde cɔnɔn te, ndáà hiw laci le. Paale ndáà ca ndi cɔnɔnndo len ndáà cum ni.

³⁸ Kani Israɛlla kpow va kumnde cɔu ipala o Calta Mɛlɛka lan coo, yinnden le va fulaa o kumii ken nin icɔl. Háá má tiiya nɛɛ nda va kɔlan-nda, nɛɛ-nɛɛ ndáà kila pɛ dɔ́ɔ́ngɔ́ɔ̀, lende ɲɔɔ va tosanndo ni. Kon va cɔmndo ni maa Mɛlɛka co nda tɛɛn.