Fulaa 39 - BII BILA

Volɔɔla vanaa-solia-lasálàá

¹ Má tosa volɔɔla vanaa-solia-lasálàá le vallo tosaa a lan lekɔɔ o cɛi-kola-toandaa diandaa nin a volɔɔla bolle vanaa-solia-lasálàá Aarɔn-ndan a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo. Má tosa lan mɛɛ Mɛlɛka pila cɔm Moise le tosaa yɛ kpafii.

² Má tosa doma ifalenndo a kɛila n'sianilan, a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo, a kola keese kɛndɛ-kɛndɔɔ.

³ Má tala sianin nda teengiaa-on, má kilikili mun maa lakɛi, má bingulan mun a kola nda lɔ a kɛila nda yin a kaan-ndan-ndo, a kola siaŋa sɔɔtɔtɔɔ, a kola siaŋa vólotótoo a á kola keese kɛndɛ-kɛndɔɔ. Vanaa caa sɔɔluuo-a tosa baala kon ni.

⁴ Má baa yoei lacongúi nda sɔndu-e o kpengun miunndon.

⁵ A kola pilɛ nda sɔndu doma ifalenndo-o koni nda sɔndu vɛlɛ yáwle vana kandan o doma kon coo len ni. Má tosa yáwle len a kola nda lɔ a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan, a kola keese kɛndɛ-kɛndɔɔ a á kɛila n'sianila lan maa mɛɛ Mɛlɛka ndóò dimul Moise yɛ.

⁶ Mó tala pow onikse o ɲɛla nda cɔw a sianion-ndan nin, má sial diola poaa Yakɔb-a lecoo mɛɛ vana sɛva o tampɔnndo coo nuaa yɛ.

⁷ Má baa lan o yoei lacongúi doma ifalen vana-solia-lasálàá coo, le loonɔnndo a poaa Yakɔb-a. Má tosa mɛɛ Mɛlɛka cɔm Moise le tosaa yɛ.

Doma-lapow-iyamaa

⁸ Mí Bɛtsalɛl dimul vanaa caa baala kon-nda le doma-lapow-iyamaa toosiaa mɛɛ nda toosiaa doma ifalenndo yɛ. Má toosiaa ndu a kɛila n'sianilan, a kola nda lɔ a kɛila nda yin a kaan-ndan-ndo, a kɛila siaŋala sɔɔtɔtɔlan, a kɛila siaŋala vólotótolan a á kɛila kɛndɛ-kɛndɛlan.

⁹ Maa kpakpa doma-lapow-iyama kalaa va ni. Bandii ndɔɛi va baa piasaa lepilɛ, buo baa piasaa lepilɛ.

¹⁰ Má hol powta báà kàlàlan polan man hiɔɔlu lecoo, o polale taselen coo, má hol sarduan, topas a emerɔd.

¹¹ O polale diinndɔlen coo, má hol rubis, safir a diamannde.

¹² O polale yàándɔlen coo, má hol opal, akate a ametiste.

¹³ O polale hiɔɔlundɔlen coo, má hol krisolite, onikse a yaspe. Powta lan la va laholiaa o ɲɛla nda cɔw a sianion-ndan nin.

¹⁴ Diola poaa tɔ́ a à ŋiɔŋaa Yakɔb-a la va lasialaalan lecoo mɛɛ nda sial sɛvaa o tampɔnndo coo nuaa yɛ. Pow oo pow ndóò nɔ diola vana pilɛ lecoo.

¹⁵ Má cua sianin diandan, má cɔaw yɔlɔn pɔmbɔn a mun le doma-lapow-iyama kon. Má lɔfa mun mɛɛ vana lɔfa yoolen nuaa yɛ.

¹⁶ Má cɔaw kpɛɔn pum mún miun a sianion a kelan n'sianion mún miun, má bayiaa mun o kpengun doma-lapow-iyama kon,

¹⁷ le yoei ŋiiŋii nda tosa a sianion-nde lueiyo o kelan n'sianin miuŋun mun nin o kpengun doma-lapow-iyamaa.

¹⁸ Má bayiaa yoeì ken tumndan o ɲɛla bayiaa iyoola tiɔnnda va o yoei lacongúi doma ifalenndo lan, haliko mi doma-lapow-iyamaa va laci.

¹⁹ Má cɔaw vɛlɛ kelan n'sianin celen mún miun, má baa mun o sɔngila lebɛngula doma-lapow-iyamaa, o hɔlaa vɔɔŋaa doma kalaa, hɔlaa ciŋan a doma ifalenndo-a pɛɛn.

²⁰ Má cɔaw vɛlɛ kelan n'sianin celen mún miun, má bayiaa mun o yoei lacongúi doma ifalenndo, i co lebɛngu-e, laci nda bayiaa mun ni. O fonda n va n'sɔandaa-o, nɛɛ ndáà bayiaa mun o yáwle kandannde doma ifalenndo-a.

²¹ Má vul yoole kola nda yin a kaan-ndo o kelan lebɛngun doma-lapow-iyama kon nin, má yii len o kelan lebɛngun doma ifalenndo, haliko mi doma-lapow-iyamaa va o baa o yáwle kandannde doma ifalenndo coo, o hiilùn te, mɛɛ Mɛlɛka cɔm Moise le tosaa yɛ kpafii.

Volɔɔla cuɛinannda tɔ̀la vanaa-solia-lasálàá

²² Mí vanaa kan sɔandu doma bɛndu co o doma ifalenndo bɛngu-o a kola nda tɔnda a kɛila yinnun a kaan-ndan-ndo.

²³ Má buli ndu bololan tɛɛn mɛɛ bolola doma icilin kanda vana takpaa-o la va nuaa yɛ. Má sɔɔluu bolola lan ɲɛkɛndɛi yɔŋii láà sɛɛsa.

²⁴ Má cua kɛila nda yin a kaan-ndan, kɛila siaŋala sɔɔtɔtɔlan, kɛila siaŋala vólotótolan a kola keese kɛndɛ-kɛndɔɔ, má tuuliaa krenadeon a lan.

²⁵ Má cua sianin diandan, má cɔaw bamban pɔmbɔn a mun, má bingulan bamban mun bayiaa a ɲɛla nda toosiaa maa n'krenade lan latulu o cɔcɔɛi lebɛngui doma bɛndu kon.

²⁶ A baa pɛ bambɛi pɔmbɔɛi pilɛ, a baa tuula krenadeo o pilɛ. Lende nda bayiaa mun o cɔcɔɛi lebɛngui doma bɛndu kon ni pindo, le baalaa tosaa o cɛi-kola-toandaa diandaa nin maa mɛɛ Mɛlɛka cɔm Moise le tosaa yɛ.

²⁷ Má sɔandu vɛlɛ domala lebɛngulan a kola keesoo le Aarɔn nda poaa ndɔa,

²⁸ má tosa vɛlɛ mɔsil vilɛi solia lasálàá a kola keesoo. Má tosa vɛlɛ mɔsilta vanaa-solia-lasálà a lɛmbɛla lebɛngulan a kola pilɛ kon.

²⁹ Má sɔandu yáwle kandannden, má toosiaa len a kola keese kɛndɛ-kɛndɔɔ, a kola nda lɔ a kɛila nda yin a kaan-ndan, a kɛila siaŋala sɔɔtɔtɔlan a á kɛila siaŋala vólotótolan-ndo mɛɛ Mɛlɛka cɔm Moise le tosaa yɛ.

³⁰ Má cɔaw vɛlɛ pɛngɛi bolle vanaa-solia-lasálàá handun o tendei coo-e a sianin diandan, tɔɔmasele diandaa va kon ni. Má sial sɛvaa lecoo mɛɛ vana sial sɛvaa o tampɔnndo nuaa yɛ aa: «O kɛsin teengen le baala Mɛlɛka-o-o.»

³¹ Má baa yoole kola nda yin a kaan-ndo len o pɛngɛi kalɛi le ndi baa o mɔsil vilɛi solia lasálàá. Má tosa lende mɛɛ Mɛlɛka pila cɔm Moise le tosaa yɛ.

Vanaa hɛlin-nda cii baala nda yɔngu nda-o tosa má hun downun Moise kona

³² Mɛɛ nuaa nda cii baalala Calta Mɛlɛka lan kpow tosa ni, cɛi-kola-toandaa-labɔɔŋianndo pɛɛn. Mɛɛ Mɛlɛka pila cɔm Moise le tosaa yɛ kpafii Israɛlla tosa baalaa ni.

³³ Má yoo Moise Calta Mɛlɛka la lan: kola-toandaa a ɲɛm tangulan ndɔn, ɲɛla vana tombola kolalan-ndan, pɛngɛn va le ndu biyɔɔ kpáŋ-ndon, kandola ndɔlan, sungbuma ndɔan, fondala ma kɛsi tumndan nin-ndan,

³⁴ kola nda toosiaa a yáwla saa kóndóla nda yin yinɔɔ siaŋaa lan-ndo, kola nda toosiaa a yáwla kálà-kálàlan-ndo, kola-landaa sɛi Fonda-Diandaa a Fonda Diandaa-Diandaa-o,

³⁵ kesu kpemaa, yɔmii va le ndu cuaa-e a kumbu kesu kon,

³⁶ tabalio, ɲɛm ndɔn laandon kpow, bulu sálà co le kɛsio Mɛlɛka o hɔl-lo,

³⁷ ɲɛ kɛsiaa lafitina cɔwnun a sianin diandan-ndo, fitinala ndɔlan, ɲɛm ndɔn vallon kpow, cuɛiyan le vowvo o fitinala ndɔla lan nin,

³⁸ fonda-loamaa-lasálà cɔwnun a sianion-ndo, cuɛiyan le pɔlaa, lasikɔlɔ cun kɛndɔɔ, kola-landaa le dio cɛi-kola-toandaa-labɔɔŋian kon,

³⁹ fonda-loamaa-lasálà cɔwnun a daɲan-ndo, kpangbàà bɛndu n'daɲa ndɔɔ, yɔmii co le ndu cuaa-e, ɲɛm ndɔn laandon kpede, fɛngɛ bɛndu mamɛnndo a fonda ndɔ o kɛsi tumndo nin-ndo,

⁴⁰ kolalan le kunga bɛɛ Calta Mɛlɛka la lan, sungbuma kunga bɛɛ kon, fondala ma kɛsi tumndan nin-ndan, kola-landaa le dio kunga bɛɛ kon, yoei ndɔɛi, pikin ndɔn a ɲɛm-laandon le baalaa tosaa o cɛi-kola-toandaa-labɔɔŋian kon nin-ndon kpow,

⁴¹ volɔɔla cuɛinanndan le vallo tosaa o Cɛi-Diandaa kon nin, volɔɔla cuɛinannda diandaala Aarɔn-ndan, a volɔɔla cuɛinannda poaa ndɔa le vali solia lasálàá tosaa.

⁴² Mí Israɛlla tosa baalala lan kpow mɛɛ Mɛlɛka pila cɔm Moise le tosaa yɛ kpafii.

⁴³ Mí Moise mɛɛndan vali tosan-ndo, mó ca maa o tosan ɲɛkɛndɛi mɛɛ Mɛlɛka cɔm ndu yɛ. O kon, mó dɔaw vanaa tosa baala kon-nda kpede duaa.