Fulaa 36 - BII BILA

Vanaa Mɛlɛka hɛli-a kandu baalaa

¹ Mí Bɛtsalɛl, Oholiab a vanaa Mɛlɛka yɔngu kɔlkaloo, dɛnɛ sinaa a taasio le baalala cɛi-kola-toandaa diandaa kpow tosaa-a kandu baala kon kpede tosaa mɛɛ Mɛlɛka pila cɔm nda yɛ.

² Mí Moise veelu Bɛtsalɛl nda Oholiab, a vanaa Mɛlɛka yɔngu kɔlkaloo a dɛnɛ sinaa-a, a yeemɛi va o kɔl le baala kon tosaa-a, mó dimul nda le baalaa kandɔɔ.

³ Mó yɔngu nda cuungiaala Israɛlla cuungiaa le baalala cɛi-kola-toandaa diandaa tosaa lan. Idii oo idii, vanaa yeemɛi va o kɔl-la va hunɔɔ a cuungiaala lan o Moise lo tuŋ.

⁴ O kon mí vanaa kɔlkalua va baala cɛi-kola-toandaa kon tosaa-a mal baala nda va tosaa-o,

⁵ má kɔ dimul Moise aa: «Vannda co bɔɔ hunɔɔ a cuungiaalan. Cuungiaala nda yɔngu nin-ndan la hiow baala Mɛlɛka ke naa le tosaa-o.»

⁶ Mɛɛ Moise tuei lende, mó yɔngu yondaa o dɔ́ɔ́ngɔ́ɔ̀ nin kpow aa: «Vana-vana tosa lɛ ɲɛ le hunɔɔ a cuungiaa le baala cɛi-kola-toandaa diandaa le, o va vanapɔnɔ o va vanalanɔ.» O kon, mí vannda pɛngi hunɔɔ a cuungiaalan.

⁷ Kani ɲɛm tangulan mun va nin taw, mun tiw nin le baalala va le tosa lan kpede. Mun nɔla bɛɛ mì mun lo n'tɔ̀.

Kolala tangulaala Calta Mɛlɛka lan

⁸ Mí vanaa kɔlkalua caa baalaa taw-va tangul Calta Mɛlɛka lan a kolala keesela kɛndɛ-kɛndɛlan tɔ́, a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo. Mí vanaa caa sɔɔluuo-a tuuliaa mɛlɛkaa kanda ɲɛm Hala-on-nda lecoo.

⁹ Kola oo kola va bandei dunndo bidiin a leŋɔmaa, buo dunndo lehiɔɔlu. Bandii pilɛi a bu pilɔɔ kpé kolalan kpede láà nɔ ni.

¹⁰ Má bɔɔŋiaa kolalan laŋuɛɛnu nɛɛ pilɛ, má sɔandu lan, má bɔɔŋiaa vɛlɛ laŋuɛɛnula tɔ̀lan nɛɛ pilɛ, má sɔandu.

¹¹ O kpengun miuŋun nda bɔɔŋiaa lan-ndon, má baa yoei lakolɛi nda yin a kaan-nde o kola mɛɛlaa o ikpengu oo ikpengu.

¹² Yoei lakolɛi va beleŋuɛɛnu o mɛɛlula ikpengu oo ikpengu. Mí i kɔ bɔŋa tumndan nɛɛ pilɛ.

¹³ Má tosa bawlan beleŋuɛɛnu a sianion, má bɔŋa kpengun miuŋun mun nɛɛ pilɛ a bawla n'sianila lan. O kon, mí Calta Mɛlɛka lan la siŋnun ɲɔɔ ndu pilɛ.

¹⁴ Má tosa vɛlɛ kolalan tɔ́ a ò pilɛ a yiiŋii cuinnda le Calta Mɛlɛka lan vuɔɔ a lan.

¹⁵ Kolala nda toosiaa lan a yiiŋii cuinnda lan, o kɛ́-kɛ̀ va bandei dunndo beleyaa, buo dunndo lehiɔɔlu. Kolala tɔ́ a ò pilɛla lan kpow, bandii pilɛi a bu pilɔɔ láà nɔ ni.

¹⁶ O kolala lan nin, má ciiŋiaa laŋuɛɛnulan nɛɛ pilɛ, má ciiŋiaa vɛlɛ laŋɔmpumnda lo lan nɛɛ pilɛ.

¹⁷ Mà baa yoei lakolɛi beleŋuɛɛnu o kola mɛɛlaa o kpengii tasei, má baa vɛlɛ hee beleŋuɛɛnu o kola mɛɛlaa o kpengii diinndɔɛi.

¹⁸ Má tosa bawlan beleŋuɛɛnu a daɲan le cɛi-kola-toandaa kon tombolaa mò siŋnun ɲɔɔ ndu pilɛ.

¹⁹ O kon kɔɔli, má toosiaa kolaa a yáwla saa kóndóla nda yin yinɔɔ siaŋaa lan le cɛi-kola-toandaa kon kumbɔɔ a lan, má tosa vɛlɛ kolaa a yáwla kálà-kálàlan le handɔɔ o kola nda toosiaa a yáwla saa kóndólan-ndo coo.

Yɔmii tangulaa cɛi-kola-toandaa diandaa

²⁰ Má tosa vɛlɛ pɛngɛn akasia, má tɔal mun lɛŋ le Calta Mɛlɛka lan biyɔɔ kpáŋ.

²¹ Pɛngɛi kɛ́-kɛ̀ va bandei dunndo tɔ́, buo dunndo lepilɛ a tálá.

²² Pɛngɛi kɛ́-kɛ̀ ndíì nɔ fondala vana sɔɔŋa yɔmndo le ndu tombolaa a o pilɔɔ lan tan tiɔn o kpengun miunndon.

²³ Má tosa pɛngɔn bidiin le Calta Mɛlɛka la lan a ba too.

²⁴ Mà tosa fondala pɛngɛn mun kɛsi tumndan nin-ndan tan tiɔn a volin humbon le pɛngɛi pilɛ: o pilɛ le fonda sɔɔŋaa yɔmndo o pilɛ. Mí fondala pɛngɔn kɛsi tumndan nin-ndan la bɛnda belehiɔɔlu le pɛngɛn bidiin mun.

²⁵ Má tosa vɛlɛ lende le Calta Mɛlɛka lan a ba luaŋ-ndo: pɛngɔn bidiin,

²⁶ a fondala kɛsiaa tumnda nda toosiaa a volin humbon-ndan. Latiɔn le pɛngɛi ipilɛ.

²⁷ Má tosa pɛngɔn mún ŋɔmpum le Calta Mɛlɛka lan a makɔɔ, kpengii paalen le del-le.

²⁸ Má tosa pɛngɔn mún miun le sungbuma co o sɔngilan-ndan yoomuan lueiyo.

²⁹ Pɛngɛn mun va n'baalanndon lebɛngu, mí n kɔ luei bolle o kelɛi pilɛi nin a ba luaŋ-ndo. Lende nda toosiaa mún mún miun kpow le sɔngila tiɔnndan ni.

³⁰ Kpow-kpow, pɛngɔn va mún ŋɔmaa a fondala kɛsiaa latumndan tɔ́ a laŋɔmpum, la va latoosiaa a volin humbon, latiɔn le pɛngɛi pilɛ.

³¹ Má tosa kandolan laŋuɛɛnu a yɔm akasia le pɛngɛn va o Calta Mɛlɛka lan kpengei pilɛ-on biyɔɔ kpáŋ.

³² Má tosa vɛlɛ kandolan laŋuɛɛnu a yɔm akasia le pɛngɛn va o kpengei pilɛi-yon biyɔɔ kpáŋ, má tosa vɛlɛ laŋuɛɛnu le a makɔɔ, ba paalen le del-lo.

³³ Má tosa kando tɛɛndo, mó kei o pɛngɔn tɛɛn déŋ, cɔn o cɛi-kola-toandaa diandaa kpengeí, kɔ tiiya a kpengei pilɛi, mó va tɛɛn kpafii.

³⁴ Má yikpa pɛngɛn mun a sianion, má toosiaa kelan a sianion le kandolan keiyo lenin, má yikpa vɛlɛ kandola lan a sianion.

Kola-landaa o Cɛi-Diandaa nin

³⁵ Má tosa kola-landaa a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keesoo. Mí vanaa caa sɔɔluuo taw-va tuuliaa mɛlɛkaa kanda ɲɛm Hala-on-nda lecoo.

³⁶ Má sial sungbuan man hiɔɔlu a pɛngɛn akasia le kola-landaa kon tondɔɔ, má yikpa mun a sianion, má hol bawla nda toosiaa a sianion-ndan o sungbuma man, má simi man o fondala kɛsiaa latumnda toosian a sianion-ndan tan hiɔɔlu coo.

³⁷ Má tosa kola-landaa celen le dio cɛi-kola-toandaa kon a kola nda yin a kaan-ndo, a kola siaŋa sɔɔtɔtɔɔ, a kola siaŋa vólotótoo a á kola keesoo, má sɔɔluu ndu ɲɛkɛndɛi.

³⁸ Má tosa sungbuan maŋuɛɛnu a bawlan le ndu landɔɔ lon. Bolii sungbuma man a kpɔlɔnnda ndalan la va layikpaalan a sianion, fondala kɛsiaa latumnda ŋuɛɛnulan la va latoosiaalan a daɲan.