Fulaa 35 - BII BILA

LE CALTA MƐLƐKA LAN BAŊƆƆ (35—40) Paale pɛngiaalen

¹ Mí Moise cuungiaa Israɛlla kpow, mó dimul nda aa: «Ɲɛ Mɛlɛka dimul naa le tosaa-o co hoo ni:

² N bɛnda mì n tosa baalala naalan kpow o palɛi ndii ŋɔmpum bɛngu, kɛ paale ŋɔmmɛwndɔlen, paale pɛngiaalen le co len le naa ni, paale Mɛlɛka dindi le pɛngio len le co len ni. Vana-vana tosa pɛ baalaa o paale len coo, o bɛnda mò sɔla piɔ́mndo.

³ Vana-vana bɛnda mò mɛndul yinnden nɛɛ o co icali-a o paale pɛngiaalen coo le.»

Cuungiaalan le cɛi-kola-toandaa diandaa tangullo

⁴ Mí Moise dimul sɛ́lɛ́ Israɛlla kpow aa: «Ɲɛ Mɛlɛka dimul naa le tosaa-o co hoo ni.

⁵ O niaa tɛɛn, la bii cuungiaa le vali Mɛlɛka-o. Vanaa yeemanin le yɔngoo a kɔlta kɛndɛlan-nda kpow, a nɔla mà yɔngu daɲan, volin humbon, te kon te sianion.

⁶ A nɔla vɛlɛ mà yɔngu kola báà kala nda yin a kaan-ndo, kola báà kala siaŋa sɔɔtɔtɔɔ, kola báà kala siaŋa vólotótoo, kola keesoo, yiiŋii cuinnda,

⁷ yáwla saa kóndóla nda yin yinɔɔ siaŋaa lan, yáwla kálà-kálàlan a pɛngɛn akasia.

⁸ A nɔla vɛlɛ mà yɔngu cuɛiyan le ɲɛ kɛsiaa lafitinaa, ɲɛm cun kɛndɔn le cuɛima pɔlan, lasikɔlɔ cun kɛndɔɔ le lomɔɔ,

⁹ pow onikse a powta báà kàlàla nda tosa le ɲɔɔn ciiŋiaa a lan-ndan, le doma ifalen bolle vanaa-solia-lasálàá a le doma-lapow-iyama o handùn o takpa-o.

¹⁰ Vanaa nɔ kɔlkaloo mà caa baalaa niaa tɛɛn-nda hun mà tosa baalala Mɛlɛka yɔngu naa le tosaa lan:

¹¹ Calta Mɛlɛka lan, kola-toandaa ndɔɔ, kola nda kuumbuu lecoo-o, ɲɛla nda baa ɲɔɔn-ndan, pɛngɛn ndɔn, kandola ndɔlan, sungbuma ndɔan a ɲɛla ma kɛsi tumndan nin-ndan.

¹² Mà sɛl vɛlɛ kesu kpemaa a yɔmnde le ndu cuaa, a kumbu kesu kon, a kola-landaa sɛi Fonda-Diandaa a Fonda Diandaa-Diandaa-o.

¹³ Mà toosiaa vɛlɛ tabalio a yɔmnde le ndu cuaa, ɲɛm ndɔn laandon kpow a bulula sálàla vanin lakɛsiaalan Mɛlɛka o hɔl o cɛi-kola-toandaa diandaa nin-ndan.

¹⁴ Mà cɔw ɲɛ kɛsiaa lafitinaa, ɲɛm ndɔn laandon, fitinala ndɔlan, cuɛiyan le vowvo o fitinala lan nin,

¹⁵ fonda nda loam cuɛima cun kɛndɛan coo-o a yɔmii nda cua ndu-e, cuɛiyan le pɔlaa, lasikɔlɔ cun kɛndɔɔ a kola-landaa le dio Calta Mɛlɛka lan.

¹⁶ Mà cɔw fonda-loamaa-lasálàá, ɲɛ ndɔ nda lɔfanin a daɲan maa kpangbàà-o, yɔmii nda cuà ndu-e, ɲɛm ndɔn laandon kpow, fɛngɛ bɛndu mamɛnndo a fonda o kɛsinin tumndo coo-o.

¹⁷ Mà toosiaa vɛlɛ kolalan le bɛ́ɛ̀ cɛi-kola-toandaa diandaa, sungbuma bɛɛ kon a fondala ma kɛsinin tumndan nin-ndan, kola-landaa le dio bɛɛ kon,

¹⁸ pikion le Calta Mɛlɛka lan tondɔɔ, pikion le kolala kunganin bɛɔ lan tondɔɔ a yoei le baa o pikin mun.

¹⁹ Mà sɔndu volɔɔlan le sálàlan solio a lan lekɔɔ o cɛi-kola-toandaa diandaa nin, volɔɔla sálàlan le bolle vanaa-solia-lasálàá Aarɔn, a volɔɔla poaa ndɔa vownunnin le sálàlan solio lan.»

Vannda hin a cuungiaalan

²⁰ O kon, mí sɛ́lɛ́ Israɛlla kpow faŋan nɛɛ Moise va-a.

²¹ Mí vanaa nɔ yiyan kɛndɔɔ má kialu o kɔlta ndalan nin le yɔngoo-a cuu Mɛlɛka cuungiaala ndalan le cɛi-kola-toandaa-labɔɔŋianndo tangullo, le baalala tɔ̀lan kpow tosaa, a le volɔɔla solia lasálàlan sɔndɔɔ.

²² Mí vanaa kelu o kɔlta ndalan nin-nda, vanpiaandua a vanlaandua, a hun a kelan lanion, kelan n'suon, kelan laban, a ɲɛm cɔwnun a sianion-ndon kpow, má tosa faleŋii vana heelu ɲɔɔ coo le Mɛlɛka ndu cɔmndo-e.

²³ Mí vanáà nɔ kolala keesela nda yin a kaan-ndan-nda, la nda lɔ a kɛila siaŋala sɔɔtɔtɔlan-nda, la nda lɔ a kɛila siaŋala vólotótolan-nda, kolala toosian a yiiŋii cuinnda lan, yáwla saa kóndóla nda yin yinɔɔ siaŋaa lan a vanáà nɔ yáwla kálà-kálàlan o ba cɛilan nin-nda hun a lan.

²⁴ Mí vanaa kɛsi volin latámán a daɲan le cuungiaa kon-nda hun a mun o Mɛlɛka lo. Mí vanaa pɛngɛn akasia va o ba-a hun a mun le baalalan kpow tosaa a mun.

²⁵ Mí vanlaandua caa vomullo-a kpede a vomul kɛilan, má hun a yɔɔsɔla nda yin a kaan-ndan, a kolala siaŋala sɔɔtɔtɔlan, a kolala siaŋala vólotótolan, a kolala keeselan.

²⁶ Mí vanlaandua caa yiiŋii cuinnda lɔu-va kpow a lɔa ndi a kɔlkɛndɔɔ.

²⁷ Mí simlacia hun a pow onikse a powta báà kàlàla nda ciiŋiaa ɲɔɔn nin-ndan le doma ifalen bolle vanaa-solia-lasálàá a le doma-lapow-iyama o handun o takpa-o.

²⁸ Má hun a ɲɛm cun kɛndɔn, cuɛiyan le ɲɛ kɛsiaa lafitinaa, le cuɛima co le pɔlaa-an toosiaa a le ansan toosiaa.

²⁹ Mí Israɛlla kpow, vanpiaandua a vanlaandua, á kelu o kɔlta ndalan nin le hunɔɔ a ɲɛ le baala Mɛlɛka dimul Moise le tosaa-o tosaa-a hun a cuungiaala ndalan a yeemɛi ndɛi o Mɛlɛka lo.

Vanaa hɛlin le baalaa tosaa-a

³⁰ Mí Moise dimul Israɛlla aa: «La tofa vɔ, Mɛlɛka hɛli Bɛtsalɛl po Uri-o, po imama Hur-o, fulaa o polale Yuda len nin,

³¹ mó yɔngu ndu kɔl Hala-o haliko mo sɔla kɔlkaloo, dɛnɛ sinaa a taasio le baalalan kpow tosaa,

³² le ɲɛlan caa tuuvo, le baalaa caa a sianion, a volin humbon a á daɲan,

³³ le powta báà kàlàlan siɔlɔɔ le lan holio, le yɔmnde caa siɔlɔɔ a le baalalan kpede caa tosaa.

³⁴ Mó yɔngu vɛlɛ nda kɔlkaloo le vanaa celen vali labaa pɛɛkoo nda Oholiab, po Ahisamak-o, fulaa o polale Dan-nden nin.

³⁵ Mó yɔngu nda dɛnɛ sinaa le baalalan kpow tosaa, le ɲɛlan caa siɔlɔɔ a le tuuliaalan caa, le kolaa lɔu a kɛila nda yin a kaan-ndan, a kɛila siaŋala sɔɔtɔtɔlan a á kɛila siaŋala vólotótolan a le kola keesoo caa lɔu, le baalalan kpow tosaa a le ɲɛlan caa tuuvo.»