Biblia Todo Logo
Bìoball air-loidhne

- Sanasan -

Fulaa 33 - BII BILA


Mɛlɛka dimul Moise le kɔlan

1 Mí Mɛlɛka dimul Moise aa: «Cɔn ma faŋan o fondaa ho. Cua vanaa n soli haa o lɛŋnde Esipte len nin-nda, mì la kɔɛ o lɛŋnde ya yiilu Abraham, Isaak a Yakɔb kpemaa, mí mɛnalan nda le cuavaa ndaa imamaa len yɔngoo len nin.

2 I co mɛlɛkanɔɔ vomɔɔ le kɔlan nɔm laci. I co Kanannda, Amoriia, Hitiia, Perisiia, Heviia a Yebusiia tovɔɔ niaa laci.

3 Mɛlɛkanɔɔ co lakɔ a niaa o lɛŋnde cɔlua a tɔlɔɔlan la naŋ nin taw-taw len nin. Kɛ ya pila Mɛlɛka, i kuenin niaa tɛɛn te, kani la co bɔɔ vanaa lanila kalu. Te i kɔɛ pɛ niaa tɛɛn, i kei niaa diw nɛi-tɛɛn kpow.»

4 Mɛɛ vannda tuei sáálé Mɛlɛka dimul nda kon-ndo, mí mɔnɛi bii nda. Vana-vana cueinun cuɛinɔn kɛɛsuan o palɛi ken bɛngu le.

5 Kani mí Mɛlɛka soaa o Moise lo aa: «Dimul Israɛlla aa: ‹Vanaa lanila kalua niaa co ni, te i kɔɛ pɛ niaa tɛɛn, hali le telen pɔmbɔ, i diw niaa kpede. Lelan, la sooluu volɔɔla niaala kɛɛsuanndan, mì la mɛɛndan mɔnɛ ya co soli a niaa-o.›»

6 Ndáà faŋanndo dɔ́ɔ́ o pembei Horɛb ikɛi, má sooluu volɔɔla ndala kɛɛsuanndan.


Cɛi-kola-toandaa-labɔɔŋianndo

7 Te ndáà kila pɛ dɔ́ɔ́ngɔ́ɔ̀, Moise ndóò tondu cɛi-kola-toandaa o dɔ́ɔ́ngɔ́ kon kɔɔli lándán. Mó ke cɛi-kola-toandaa kon diolan aa cɛi-kola-toandaa-labɔɔŋianndo. Vana-vana óò yeema pɛ le sɔɛi o Mɛlɛka lo, ndóò faŋan o dɔ́ɔ́ngɔ́ɔ̀ nin, ndóò kɔɛ nɛɛ cɛi-kola-toandaa-labɔɔŋianndo va-a.

8 Telen óò telen Moise ndóò cɛn pɛ le kɔlan o cɛi-kola-toandaa kon nin, vannda kpow ndáà cɛn isisi, vana-vana óò sim o cɛi-kola-toandaa ndɔɔ sondoo, ndáà lo Moise tofaa háá mì ndóò kɔ luɛi o cɛi-kola-toandaa-labɔɔŋianndo nin.

9 Te ndóò luɛi dɔ́ɔ́ lenin pɛ, tindile ikumnden léè tol, léè sim o cɛi-kola-toandaa kon sondoo, Mɛlɛka ndóò kandu suukanndo nda Moise.

10 Te Israɛlla ndáà ce pɛ dɔ́ɔ́ tindile ikumnde len isisi o cɛi-kola-toandaa kon dio, ndáà cɛn, ndáà baŋ vulan o cɛila-kolala-toandaala ndalan sondoo.

11 Kpendekele Mɛlɛka ndóò soaa o Moise lo ni mɛɛ vanacieo suukan nda vanacieo nuaa yɛ. Ndáà cii pɛ, Moise ndóò muungu o dɔ́ɔ́ngɔ́ɔ̀ nin. Kɛ vana ndɔ malaa, ó va Yosue po Nun-ndo-o, ndóò faŋan o cɛi-kola-toandaa-labɔɔŋian kon nin te.


Mɛlɛka suukan nda Moise

12 Mí Moise dimul Mɛlɛka aa: «Tofa vɔ, a dimul-la aa ya kɔ a vannda ha, kɛ a cɔm ya vana n co vomɔɔ le naa liilaa-o le. Nduyɛ nɔm pila dimul-la ni maa a hɛli ya má ca ya ɲia taw.

13 Taa ce ya pɛ ɲia lekɛ́ndɛi, mɛɛ cɔm-ndɔ ya yiyan nɔmndo haliko mi sina nɔm, mì sina dɔ́ɔ́ maa a ce ya ɲia lekɛ́ndɛi. Handɔɔ o kon coo, síná vɛlɛ maa cuavaa nɔmnda kpeekpei vannda ha co ni.»

14 Mí Mɛlɛka mulul ndu aa: «Ya pila co va nɔm ikɛi ma sɔla pɛngio.»

15 Mí Moise cɔɔlu vɛlɛ dimi aa: «Te nɔm pila kuenin naa tɛɛn te, mɛɛ fáŋà naa o fondaa ho le.

16 Vɛ̀ɛ̀ nda sina yɛnin maa a ce ya ɲia má ca vɛlɛ vannda ha ɲia? Fɔ mì n kɔɛ naa niaa latulu, mì n va teengen a vanaa súúla celen o ceendo coo malan vannda sina maa a ce naa ɲia.»

17 O kon, mí Mɛlɛka mulul ndu aa: «Le cɔ ya ce nɔm ɲia mí hɛli nɔm-ndo, i cɛl le sɔɛi n dimul-la-e tosaa.»

18 O kon kɔɔli, mí Moise dimul Mɛlɛka aa: «Cɔm ya biilu nɔmndo kpendekele.»

19 Mí Mɛlɛka mulul ndu aa: «I co nɔm naŋɔɔ nuu kei o hɔl, mì veelu diola nilan nɔm o hɔl, diola lan la co ni aa ‹Mɛlɛka›. Kani vana ya yeema pɛ le kɛndɛi tosallo, i tosal ndu kɛndɛi. Vana ya yeema pɛ le ɲííye tuinɔnndo, i tuinun ndu iɲíí.»

20 Mó cɔɔlu ndu dimul aa: «Kɛ a nɔla ma ce hɔlaa nia le. Kani vanaciee-vanaciee nɔla hɔlaa nia cɔu mò lo yoomu le.»

21 Mó dimi vɛlɛ aa: «Fondaa pum co ya ikɛi nanu. Hun mà sim o pow kpovaa ho coo,

22 te i va pɛ hiovɔɔ, i luei nɔm o soon co o pow kpovaa ho-o nin, i kinda ndu a ba nuu háá mì cuu hiovɔɔ.

23 I hiow pɛ, i faŋa baa o soondo coo, a koma cɔ ya mundoo. Kɛ vana-vana nɔla mo ce ya hɔlla le.»

© Alliance Biblique en Guinée

Bible Society in Guinea-Conakry
Lean sinn:



Sanasan