Fulaa 32 - BII BILA

ISRAƐLLA TƐƐMBUU KPEMA HALA YII A NDA-O (32—34) Naw téndé nda cɔw a sianion-ndo

¹ Mɛɛ vannda ce maa Moise co viovɔɔ o pembei coo le tolɔɔ, má bɔɔŋian o Aarɔn ndo, má dimul ndu aa: «Cɔn ma cow naa piɔmndo, mì ndu va hala naa le kɔlan naa laci. Kani Moise soli hoo naa o lɛŋnde Esipte len nin-ndo, n sina ɲɛ yɔŋnun ndu le.»

² Mí Aarɔn mulul nda aa: «La soli kelan n'sianin co laandua niaa, poaa niaa a cuavaa niaa laandua o loni-on mì la cuu ya mun.»

³ Mí nda kpow a sooluu dɔ́ɔ́ kelan n'sianin va nda o lani-on, má cuu Aarɔn mun.

⁴ Mí Aarɔn bii mun nda o laba, mó teengiaa mun, mó vow mun o ɲɛ pum nin, mó cɔaw piɔmndo a mun maa naw téndé. O kon, mí nda kpow a saan kponyoo a yondaa aa: «Israɛlla, mì la ce hala niaa! Ndu soli niaa o lɛŋnde Esipte len nin ni.»

⁵ Mɛɛ Aarɔn ce lende, mó cɔaw fonda-loamaa-lasálàá piɔm kalaa laci. O kon kɔɔli, mó yonda coocoo aa: «Siɔdii, kafoo tosannin le Mɛlɛka.»

⁶ Le hee, diimandɔɔ idiiyo púŋ, mí vannda solul piɔm kon sálàla loamaalan a sálàla kɔlɲululan. Mɛɛ nda cii, má cal le ɲɛdiaa dioo a le kolɔɔ, o kon kɔɔli, má can pisulta bɛɛ tambɛilan.

⁷ Mí Mɛlɛka dimul Moise aa: «Tol ma muungu, kani vanaa n soli haa o lɛŋnde Esipte len nin-nda laasian.

⁸ A keŋela bɔɔ nɛi ya cɔm nda-o malɔɔ. A cɔw piɔmndo a sianion maa naw téndé, má baŋ vulan ndu o labɛngunin, má solul ndu sálàlan, má dimi aa: ‹Israɛlla, mì la ce hala niaa, ndu soli niaa o lɛŋnde Esipte len nin ni.›»

⁹ Mí Mɛlɛka cɔɔlu vɛlɛ Moise dimul aa: «I sina nihau maa vannda ha vanaa nila kalua nda co ni.

¹⁰ Lelan, mal-la mì tuisi nda kɔl ni tuwvo coo, mì diw nda kpow. Kɛ nɔm, i solinin vanaa-mangalaa-isɔɔa sɛ́lɛ́ bɛndoo taw nɔm o ipulu.»

¹¹ Kɛ mí Moise ɲɔɔlu Mɛlɛka Hala ndɔɔ, mó dimul ndu aa: «Éé Mɛlɛka! Le yɛɛ ma tuulu kɔl a vanaa nɔmaa n soli haa o lɛŋnde Esipte len nin a kpaaya bɛndoo a ba nɔm mayoomoo-a?

¹² Taa tɛɛmbuu nda pɛ, Esiptea co dimi aa ‹A yiyan vɔɔndo Hala ndaa soli nda Esipte ni, le nda kɔlan diwvo o lɛŋnde n'pembulen nin mì diola ndalan la faŋan o ceendo coo.› Lelan, ɲulul kɔl ma mal kpundɛ n tuu le vanaa nɔmnda tuisio coo-o.

¹³ Loonun a vanaa nɔmaa baalaa: Abraham, Isaak a Yakɔb, a n yiilu kpemaa má mɛnalan nda o diola nɔmndan-nda. Kani má dimul nda sindɛ aa: ‹I co cuavaa niaa imamaa kui maa loeon o halataala, i yɔngunin niaa lɛŋnde ya dimi le niaa yɔngoo len mì la loo len kɛ́ɔ le fɛɛn a fɛɛn.›»

¹⁴ O kon, mí Mɛlɛka ɲulul kɔl a yungu ndɔɔ, mó mal yiyan va ndu le nda kpundɔɔ tuisio coo-o.

¹⁵ Mí Moise faŋan o pembei coo, mó toal, powta yɛ́ndɛ́la tiɔnnda kpemalan la va ndu o ba. Sɛvaa va o powta yɛ́ndɛ́la lan nin a o kɔɔ, sɛvaa va o kpengun miuŋun pow oo pow.

¹⁶ Hala pila óò toosiaa powta yɛ́ndɛ́la lan ni, ndu pila koni óò sɛva vɛlɛ sɛva va lecoo-o ni.

¹⁷ Mɛɛ Yosue tuei vannda vɔngaa coocoo, mó dimul Moise aa: «Vɔnga cɔwvo co sɔɛi o dɔ́ɔ́ngɔ́ɔ̀ nin nuaa ni.»

¹⁸ Mí Moise mulul ndu aa: «Ɛ-ɛ, vanaa nɔla yaamɔɔa o cɔwvo-a vɔnga nuaa le, vanaa nda tiwba-a bɛɛ a vɔnga nuaa le, isɔkɔ-sɔkɔɛi ya co hee tueyɔɔ-e, condon nda co solio ni.»

¹⁹ Mɛɛ nda tiiya o dɔ́ɔ́ngɔ́ɔ̀ ikɛi, mí Moise ca piɔm nda cɔw kon maa naw téndé-o, mó ca mɛɛ vannda va kponyoo yɛ, mó tuulu kɔl taw-taw, mó viaw powta yɛ́ndɛ́la va ndu o ba lan, mí la cuinun o pembei bɛngu mululu.

²⁰ Mó cua piɔm nda cɔw kon a sianion maa naw téndé-o, mó mal ndu o yin, mó pesi ndu háá mó siŋnun maa cundu, mó saŋ cundu kon o mɛnndan coo, mó koesi Israɛlla mɛmma man.

²¹ Mó ɲuna Aarɔn aa: «Yɛɛ nɛ vannda ha yɔŋ yɛ nɔm má luei nda o yɔŋ vɔɔn bɛndoo ho nin?»

²² Mí Aarɔn mulul ndu aa: «Tuulu kɔl te vana ni bɛndoo. Nɔm pila sina maa yiyan tosaa dɛnɛ vɔɔndo tuŋ co vannda ha nin ni.

²³ Nda pila dimul-la ni aa: ‹Cow naa piɔmndo mò va maa hala naa, mò va kɔlan naa laci, kani n sina ɲɛ yɔŋnun Moise soli naa hoo o lɛŋnde Esipte len nin-ndo le.›

²⁴ Ya bɛɛ mí mulul nda aa vanaa nɔ kelan n'sianion o lani-a sooluu mun mà cuu ya. Mɛɛ nda sooluu mun má cuu ya, mí teengiaa mun o yin, mí hoo fula.»

Sangalan la tol Israɛlla coo

²⁵ Mí Moise sina maa vannda co a malnannda, má va yeemɛi nda pila-e tosaa, kani Aarɔn léndu nda hɔlla coo le, o mal nda má cuu labɛɛ yaamɔaa ndaa o hɔl.

²⁶ O kon, mí Moise kɔ sim o dɔ́ɔ́ngɔ́ɔ̀ dangalaa, o nɛiyo sondoo, mó yonda aa: «Vanaa co le Mɛlɛka-a kpow, la hun o ya lo.» Mí vanaa fula o polale Levii len nin-nda kpow a kɔa o ndu lo.

²⁷ Mɛɛ nda kɔɛ, mó dimul nda aa: «Mɛlɛka, o co Hala Israɛlla-o dimi aa: ‹O niaa tɛɛn, vana-vana cua mɔɛi ndɔɛi cɔwve mò landun o congú, mì la balu o dɔ́ɔ́ngɔ́ɔ̀ nin kpede, mì la luɛi o cɛila-kolala-toandaalan lapilɛn-pilɛnndan nin, mì vana-vana dii puapilɛ ndɔɔ, te kon te ndepilɛ ndɔɔ, caan ndɔ, a vana nda co nɛɛ pilɛ-o.›»

²⁸ Mí vanaa fula kan o polale Levii len nin-nda cɛl sɔɛi Moise dimi ken-nde. Vanaa vi ɲinkon-nda va le vanpiaandua vàála yaa.

²⁹ Mí Moise dimul yungu Levii kon aa: «Mɛɛ vana-vana dii po ndɔɔ, puapilɛ ndɔɔ, te kon te ndepilɛ ndɔɔ yɛ, la solin hau sálà mí la siŋnun vanaa baalaa Mɛlɛka-a, paalen nden hau, Mɛlɛka dɔw niaa duaa.»

Moise tɛɛlun Mɛlɛka le Israɛlla hakio malɔɔ

³⁰ Diimandɔɔ, mí Moise dimul vannda aa: «Haki bɛndu-bɛndoo pila niaa tosa nuaa ni. Lelan, i muungu vɔ Mɛlɛka o ibuŋ o pembei coo. Bɔɔle i lonin ndu tɛɛlɔnndo mò cɛl le niaa hakio malɔɔ.»

³¹ Mí Moise muungu Mɛlɛka o ibuŋ o pembei coo, mó dimul ndu aa: «A ce ya lɛŋ Mɛlɛka. I sina maa haki bɛndoo pila vannda ha tosa ni, kani a cɔw piɔmndo a sianion má siinguu ndu hala ndaa.

³² Yandi, mal nda haki le yɔŋ vɔɔn ndaa. Te o co yɛ dɔ́ɔ́ lende le, mɛɛ ɲumi diola nilan nɛɛ n sɛva lan o sɛbɛ cindaa nin-nda.»

³³ Mí Mɛlɛka mulul Moise aa: «Vana tosa hakio a ya-o, ndu ya ɲùmi diolan o sɛbɛ ni cindaa nin ni.

³⁴ Lelan, tol ma kɔɛ a vannda ha o fonda ya dimul nɔm le kɔlan a nda-o. Mɛlɛkanɔ nuu vanin kɔlan nɔm laci. Kɛ paale pum, i kɔɔsanin a nda, mì soŋ nda le haki nda tosa-o.»

³⁵ Mí Mɛlɛka soaŋ vanaa kan le piɔm n'siani Aarɔn cow nda kon maa naw téndé-o.