Fulaa 30 - BII BILA

Fonda nda loam ansan coo-o

¹ «Ma cɔw vɛlɛ fonda-loamaa-lasálàá a pɛngɛn akasia le ansan lomɔɔ lecoo.

² Mì kpengon va ɲɛ pilɔɔ: bandei dunndo lepilɛ, buo dunndo lepilɛ, simndan dunndo lediin. Mì kpɛ̀ɛ́n ndɔn va n'baalanndon a ndu pila.

³ Kandɔɔ lecoo, kpengun ndɔn, kɔ bii a kpɛ̀ɛ́n ndɔn, ma yikpa mun a sianin diandan. Ma balu ndu sianion holɔɔ o cɔcɔn pindo.

⁴ Ma cɔw kelan n'sianion mún miun, ma baa mun o cɔcɔn bɛngu. Lon niaa vownin kpɔlɔnndan le ndu cuaa ni.

⁵ Ma sɛl kpɔlɔnnda lan a pɛngɛn akasia, ma yikpa lan a sianion.

⁶ Ma kɛsi fonda-loamaa-lasálà kon o kola-landaa ven kesu kpema-o hɔl-ndɔ, o kumbu co o kesu kpema kon coo-o laci. O kumbu kon coo ya vanin nɔm cɔmnɔnndo ni.

⁷ O fonda-loamaa-lasálà kon coo Aarɔn vanin ansan lomɔɔ telen o vanin fitinalan vɔɔsuuo idii oo idii o cɛi-kola-toandaa diandaa nin-ndo ni.

⁸ Lecoo koni o vanin ndu lomɔɔ telen o vanin ndan mɛndullo icɔl oo icɔl-lo ni. Le fɛɛn a fɛɛn, la bɛnda mì la va ansan lomɔɔ ya o hɔl.

⁹ La vá ansan súú-súù ka lomɔɔ o fonda-loamaa-lasálà kon coo le, la sólì sálà loamaa lecoo le, là soli sálà ɲɛm vaa lecoo le, là tala vɛlɛ sálà mamɔi lecoo le.

¹⁰ Aarɔn bɛnda mò tosa faleŋii baŋannde o kpɛ̀ɛ́n fonda-loamaa-lasálà kon coo bɛmbɛ lepilɛ o vɔsio nin, a kooma cɔlu diinunnin le sálàá solio le hakio sɔlaa malɔɔ-o-an o bɛnda ni mo tosa faleŋii ken o kpɛ̀ɛ́n fonda kon coo. Le fɛɛn a fɛɛn, lende o bɛnda ni mo tosa faleŋii baŋannde lecoo bɛmbɛ lepilɛ o vɔsio nin. Kani fonda diandaa pila co kon le Mɛlɛka ni.»

Muloo le Cɛi-Diandaa

¹¹ Mí Mɛlɛka soaa o Moise lo, mó dimul ndu aa:

¹² «Tuma n vanin Israɛlla diolan sɛvaa a pilɛn-pilɛnnda le sinaa mɛɛ nda co kunda yɛ-o, vana-vana bɛnda mò mal muloo o ya Mɛlɛka lo le yoomu ndɔɔ baŋaa telen sɛva kon vanin tosanndo-o. O kon kpundɛ oo kpundɛ komalnin nda telen sɛva kon vanin tosanndo-o le.

¹³ O vanaa sɛvannin-nda nin, vana-vana bɛnda mò yɔngu tààngáà mɛɛ volin latámán co dionnɔnndo o Cɛi-Diandaa nin-ndon co yɛ. Le ya Mɛlɛka mulu kon biinunnin ni.

¹⁴ O vanaa sɛvannin-nda tɛɛn, vana-vana nɔ pɛ vɔsilan bidiin, te kon te hiovɔɔ bidiin coo, ndu bɛnda mò yɔngu cuungiaa kon le baala Mɛlɛka-o.

¹⁵ Vana bolofaa bɛnda mò yɔngu hiovɔɔ kon coo le, vana bala fondoo bɛnda mò kɛɛ suili le, vana-vana bɛnda mò yɔngu le Mɛlɛka mɛɛ o kelun yɛ le yoomu ndɔɔ baŋaa.

¹⁶ Nɔm Moise, ma bii ɲɛ-sɔlaa kon Israɛlla o laba le yoomula ndalan baŋaa, ma yɔngu ndu le baala cɛi-kola-toandaa-labɔɔŋianndo. Kon tosanin ni mì va loonɔnndo maa vana-vana mal muloo, mò baŋa yoomu ndɔɔ.»

Fɛngɛ bɛndu mamɛnndo

¹⁷ Mí Mɛlɛka soaa o Moise lo, mó dimul ndu aa:

¹⁸ «Cɔw fɛngɛ bɛndu mamɛnndo a daɲan le dindinndo, ma toosiaa fonda fɛngɛ bɛndu kon bɛnda le tumndo kɛsio coo-o a daɲan. Ma kɛsi ndu o cɛi-kola-toandaa-labɔɔŋianndo a fonda-loamaa-lasálàá tɛɛn, ma pei ndu ca a mɛnndan.

¹⁹ A mɛmma man Aarɔn nda poaa ndɔa bɛnda ni mà va balan a pelon pulɔɔ.

²⁰ Tuma pá nda luɛi o cɛi-kola-toandaa-labɔɔŋianndo nin, fɔ mà kei fɔlɔn pelon a balan pulɔɔ a mɛmma man, yɔŋii nda sɔla piɔ́mndo. Tuma pá mà sɔɔnguu vɛlɛ o fonda-loamaa-lasálàá ikɛi le sálà ŋɔa o yin-ndo solio o Mɛlɛka lo, a bɛnda mà pulu pelon a balan a man, yɔŋii nda sɔla piɔ́mndo.

²¹ Le fɛɛn a fɛɛn, kandɔɔ a Aarɔn pila, kɔ bii a poaa ndɔa, a bɛnda mà bii tɔŋndo ho.»

Cuɛiyan le pɔlaa

²² O kon kɔɔli, mí Mɛlɛka soaa o Moise lo, mó dimul ndu aa:

²³ «Nuwviaa ɲɛm cun kɛndɛ-kɛndɔn: mir landenndo kilolan laŋuɛɛnu, kanɛl cun kɛndɔɔ kilolan latiɔn a tálá, sinanɔm kilolan latiɔn a tálá,

²⁴ kase kilolan laŋuɛɛnu, mì vɔngu ɲɛm mun cɔmnun o volin co dionnɔnndo o Cɛi-Diandaa nin-ndon nin, a cuɛima olivean litililan laŋɔmpum.

²⁵ A ɲɛm mun n toosiaanin cuɛiyan le pɔla diandaa ni. Ma yɔngu vana toosiàà lasikɔlɔɔ-o ɲɛm mun, mò toosiaa cuɛima pɔlan a mun.

²⁶ Ma cua cuɛima man, ma pɔla cɛi-kola-toandaa-labɔɔŋianndo, kesu kpemaa,

²⁷ tabalio a ɲɛm ndɔn laandon, ɲɛ kɛsiaa lafitinaa a ɲɛm ndɔn, fonda loamaa ansan,

²⁸ fonda loamaa sálà loamaa a ɲɛm ndɔn laandon kpow, a fɛngɛ bɛndu mamɛnndo a fonda o kɛsi tumndo coo-o.

²⁹ Ma dindi mun ya Mɛlɛka o hɔl few-few. Ɲɛ-ɲɛ pilan nin mun pɛ, ndu bɛɛ siŋnun le Mɛlɛka.

³⁰ Ma pɔla vɛlɛ Aarɔn nda poaa ndɔa haliko ma siŋnun vanaa-solia-lasálàá le vali nuu.

³¹ Ma dimul vɛlɛ Israɛlla sɔɔn mun: ‹Le fɛɛn a fɛɛn, le vali Mɛlɛka-o kínɛí cuɛima pɔlan man ma bɛnda mi ma va ni.

³² O co cuɛima vana suunun te, la toosiaa vɛlɛ cuɛima súú vaa lende le kpeku celen te. Cuɛima diandan ma co le vali Mɛlɛka-o ni, la cɔ man maa madiandan ma co ni.

³³ Vana-vana toosiaa pɛ cuɛima súú vaa lende mò suu vana celen man, te o co yɛ vana-solia-lasálàá le, a bɛnda mà soli vana súú kon vanndo man-ndo Israɛlla tɛɛn po.›»

Le ansan toosiaa

³⁴ Mí Mɛlɛka dimul vɛlɛ Moise aa: «Nuwviaa ɲɛm nɔ cun kɛndɔɔ-on: staktee, pow onikse a kalbanɔm, ma cua ansan yukuyukoo a ɲɛm mun kpen-kpen,

³⁵ ma dimul vana toosiaa ɲɛm kɛndɔn-ndo mò muulian ɲɛm mun toosiaa a hɛlle, mò siinguu mun ansan diandaa.

³⁶ Ma cui n'pum yukuyuku, ma kɛsi mun o kesu kpemaa hɔl-ndɔ o cɛi-kola-toandaa-labɔɔŋianndo nin, o fonda ya vanin nɔm cɔmnɔnndo-o. La cɔ ɲɛm mun maa n'diandaa-diandaa n co ya Mɛlɛka o hɔl ni.

³⁷ La bɛnda mì la toosiaa lasikɔlɔ súú vaa lende le niaa pila le. La cɔ ndu maa ɲɛ diandaa o co ya Mɛlɛka o hɔl ni, le vali nuu kínɛí o co ni.

³⁸ Vana-vana toosiaa súú kon pɛ le cun ndɔ kɛndɔɔ tueyɔɔ yeela, a soli vana kon Israɛlla tɛɛn po.»