Fulaa 3 - BII BILA

¹ Moise va cɔlua Yetro lefu ndɔ-a mandaa, vana-solia-lasálàá Madian pɛɛn. Paale pilɛ, mɛɛ o kɔɛ a nda o lɛŋnde veselɛilen lekɔɔli, mó tiiya o pembii Hala-e, pembei Horɛb pɛɛn.

² Lon mɛlɛkanɔ Hala-o cɔmnun ndu o yinnde biyaalen nin o bɔɔ nin ni. Moise va yinnden cɔu sandei vulɛi-vulɛi o bɔɔ nin, kɛ bɔɔ kon ve ŋɔ le.

³ Mó dimi aa: «I sɔɔnguu vɔ macɛlu mì kɔ tofa dɛnɛ kaamaa bɛndoo ho lapi. Ko yɛɛ nɛ co yɛ tosaa bɔɔ ho co ŋɔ le?»

⁴ Mɛɛ Mɛlɛka ce maa o co sɔɔnguuo le cɔu lapi, mó veelu ndu o bɔɔ nin aa: «Moise! Moise!» Mí Moise cɛl aa: «Yoo!»

⁵ Mó dimul ndu aa: «Tiiya nanu le, soli samtala co nɔm o n'pelu lan. Kani fonda n sim hoo coo-o, fonda diandaa o co ni.»

⁶ Mó dimul ndu vɛlɛ aa: «Ya co Hala fuɲaa nɔmaa mamaa ni: Hala Abraham-ndo, Hala Isaak-o a Hala Yakɔb-o.» Mí Moise kumbu hɔlla, kani mí siòònde bii ndu le tofaa nɛɛ Hala va sɔɛi-ya.

⁷ Mí Mɛlɛka dimul ndu aa: «I ce mɔnɛi cuavaa nia co nin Esipte-e, i co nda tueyɔ̀ɔ́ koŋullo a saangiaa mɛlɛsoŋnda co nda-o, i ce dɛnɛ palaa co nda coo-o vakpa.

⁸ Le hee, i tol le nda solio o sanga kon nin Esiptea o ba, a le nda yɔ̀ɔ́ o lɛŋnde bɛndule kɛndɛ-kɛndɛlen nin, o lɛŋnde cɔlua a tɔlɔɔlan la naŋ nin taw-taw len nin, o lɛŋnde Kanannda, Hitiia, Amoriia, Perisiia, Heviia a Yebusiia co icali nin-nden nin.

⁹ Kani i co cɔu mɛɛ Esiptea co Israɛlla saangiaa a yɔɔkpiaa yɛ, yééla ndalan la co ya komallo háá nanu.

¹⁰ Lelan, nɔm Moise, i vem nɔm o Faraɔnnɔɔ lo sunsun. Kɔ ma kɔ soli yungu nuu o sanga kon nin Esipte, Israɛlla pɛɛn.»

Hala cɔm Moise diola ndɔlan

¹¹ Mí Moise ɲuna Hala aa: «Yɛɛ ya co yɛ le kɔlan simndan Faraɔnnɔɔ o hɔl a le Israɛlla solio Esipte?»

¹² Mí Hala mulul ndu aa: «I vanin nɔm ikɛi. Tofa vɔ tɔɔmaseloo le sinaa maa ya Hala vem nɔm ni: taa soli pɛ vanaa kan o lɛŋnde Esipte len nin, la hun tosa kaannden o pembei he coo niaa ndaa kpow le ya biiloo.»

¹³ Mí Moise dimul vɛlɛ Hala aa: «I kɛɛ lɛ le kɔlan te, kɛ te i tiiya pɛ o Israɛlla lo, mì dimul nda aa: ‹Hala fuɲaa niaa mamaa vem ya o niaa lo ni›, a co ya ɲuna aa: ‹Vɛɛ o nɔ yɛ diolan?› Vɛ̀ɛ̀ ya mulul-lɛnin nda?»

¹⁴ Mí Hala dimul ndu aa: «Ya co I CO ni.» Mó cɔɔlu vɛlɛ dimi aa: «Dimul Israɛlla aa I CO vem ya o niaa lo ni.»

¹⁵ Mó dimul ndu vɛlɛ aa: «Ma dimul vɛlɛ nda aa: ‹Mɛlɛka vem ya o niaa lo ni, Hala fuɲaa niaa mamaa pɛɛn: Hala Abraham-ndo, Hala Isaak-o a Hala Yakɔb-o.› Diola nilan la co lán le fɛɛn a fɛɛn ni. Nuaa yungulan kpow la bɛnda mì la veelu ya le fɛɛn a fɛɛn ni.

¹⁶ Lelan, kɔ ma kɔ cuungiaa kaasoŋaa kɔlkalua o Israɛlla tɛɛn, mà dimul nda aa Mɛlɛka, Hala fuɲaa niaa mamaa Abraham, Isaak a Yakɔb cɔmnun ya, mó dimul-la aa: ‹I mɛɛndan niaa, mí ca mɔnɛi nda co niaa lueiyo o lɛŋnde Esipte len nin-nde.›

¹⁷ Lelan ya dimi ni aa i co niaa soli o mɔnɛi ken nin, mì yɛɛ niaa o lɛŋnde Kanannda, Hitiia, Amoriia, Perisiia, Heviia a Yebusiia nin, lɛŋnde cɔlua a tɔlɔɔlan la naŋ nin taw-taw len pɛɛn.

¹⁸ Taa dimul pɛ nda lende, a co sɔɛi nɔmnde cɛlɔɔ, o kon mì la kɔɛ niaa kaasoŋaa kɔlkalua o masaa Esipte lo, mì la dimul ndu aa: ‹Mɛlɛka cɔmnun naa, Hala Hebreea pɛɛn. Lelan, mal naa mì n kɔɛ kɔla palɛi yaa o lɛŋnde veselɛilen nin le Mɛlɛka sálàá solullo, Hala naa pɛɛn.›

¹⁹ I sina maa masaa Esipte cɛlnin le niaa malɔɔ le. Le niaa malɔɔ, fɔ mì sɔɛi kalɛi hiow ndu mayoomu.

²⁰ Le hee, ya pila i co dɛnɛ tosa mì cɔm kpaaya nuu o lɛŋnde ndɔlen nin a sɔɔn kaaman. O kon o malnin niaa mì la kɔɛ.

²¹ I co Esiptea kɔltan muli o niaa lo mà ce niaa ɲia taw. Telen niaa vanin kɔlan-ndo, la kuenin bala fondo le.

²² Vanlaandua hebreea, vana-vana va pɛ kɔlan, o piɛi vanalanɔ Esiptenɔ nda co o bɛ́ɛ̀-o, te kon te vana o co o ba cɛinin-ndo ɲɛm-laandun cɔwnun a volin humbon-ndon, ɲɛm-laandun cɔwnun a sianion-ndon a volɔɔla cuɛinanndan. Te la yunga pɛ Esiptea lende, la siiluu poaa niaa a cuavaa niaa ɲɛm mun.»