Fulaa 29 - BII BILA

Mɛɛ vanaa-solia-lasálàá bɛnda mà sɔla pɔlaa yɛ

¹ «Nuaa n bɛnda ni ma pɔla Aarɔn nda poaa ndɔa, haliko ma siŋnun vanaa-solia-lasálàá le ya. A bii pɛ naw tova téndóó, a saa kóndóa nɔ lenamta le-a nda ŋiɔn,

² a cua vɛlɛ bulu toosian a lɛvɛn too, dɛɛ toaŋaa vɔɔcan a lɛvɛn too, o vɔɔcan a cuɛiyan-ndo, fùlúfúlù lɛvɛn vownun nin too, o nda vɔɔca o cuɛiyan nin-ndo a kpeyan funguɲa n'mallo.

³ A vow ɲɛm mun o kambɛiyo nin, a cɔm ya kambɛi kon a naw tova téndóó a saa kóndóa ŋiɔnda latulu.

⁴ O kon, a sɔɔnguu Aarɔn nda poaa ndɔa o cɛi-kola-toandaa-labɔɔŋianndo sondoo, a pulu nda a mɛnndan.

⁵ A cii pɛ nda pulɔɔ, a cua volɔɔla solia lasálàlan, a vow Aarɔn doma lebɛngoo, doma bɛndoo, doma ifalenndo a doma-lapow-iyamaa, a kanda ndu yáwle doma ifalennden o caŋ,

⁶ a vow ndu mɔsil solia lasálàá, a hol pɛngɛi n'sianii co tɔɔmasele diandaa-e o mɔsil kon laci.

⁷ O kon kɔɔli, a cua cuɛima co le pɔlaa-an, a tala man ndu o lebol, a pɔla ndu.

⁸ A cii pɛ ndu pɔla lende, a sɔɔnguu vɛlɛ poaa ndɔa, a vow nda domala lebɛngulan.

⁹ O kon, a kanda Aarɔn nda poaa ndɔa kan yáwve o caŋ, a vow nda mɔsilta solia lasálàlan o lebol. Lende n bɛnda ni ma suu Aarɔn nda poaa ndɔa cuɛima diandan, mì vali solia lasálàá va niko vali ndaa le fɛɛn a fɛɛn.

¹⁰ Ma cua vɛlɛ naw tovaa, ma hin a ndu o cɛi-kola-toandaa-labɔɔŋianndo sondoo, mì Aarɔn nda poaa ndɔa handu cɔlu kon balan o lebol,

¹¹ mì nɔm Moise kelu ndu bololan ya Mɛlɛka o hɔl o cɛi-kola-toandaa-labɔɔŋianndo sondoo.

¹² Ma haw kooma naw tova kon, ma suu man o kpɛ̀ɛ́n fonda-loamaa-lasálàá a suei nɔmnde. Ma cuuŋuu kooma tɔ̀an o fonda-loamaa-lasálà kon bɛngu.

¹³ O kon kɔɔli, a cua visin macuɛin kumbu ɲɛm co cɔlu kon o dembe-on-ndon, a bungɛi hiow naŋɔɔ o yemnde nin-nde, a kɔlkelen miunndon, a cuɛima kumbu kɔlkelen mun-ndan, a lom ɲɛm mun kpow o fonda-loamaa-lasálàá coo.

¹⁴ Kɛ ma lom visin bɛɛŋun cɔlu kon, yáw ndɔɔ a poola ndɔlan o dɔ́ɔ́ngɔ́ɔ̀ kɔɔli. Sálàá le hakio sɔlaa malɔɔ co kon ni.

¹⁵ Ma cua vɛlɛ saa kóndó tasoo, mì Aarɔn nda poaa ndɔa handu ndu balan o lebol,

¹⁶ mì nɔm Moise kelu ndu bololan, ma balu kooma ndɔan suiyo o fonda-loamaa-lasálàá pindo.

¹⁷ O kon kɔɔli, a sɛŋ saa kóndó kon, a diw ndu kundalan, a tɔɔ ɲɛm co ndu o dembe-on a bɛngula ndɔlan, a hɛɛndu lan o kundala ndɔlan a o bolle ndɔlen coo.

¹⁸ A cii pɛ, a lom visin saa kóndó kon kpow o fonda-loamaa-lasálàá coo. Sálà loamaa solìn le ya Mɛlɛka-o co kon ni. Sálà loamaa co kon ni, o ya tuɛi cun mì ɲɔɔ hɛnan ya-o.

¹⁹ O kon kɔɔli, a cua vɛlɛ saa kóndó diinndɔɔ, Aarɔn nda poaa ndɔa handu ndu balan o lebol.

²⁰ Mi nɔm Moise kelu ndu bololan, ma haw kooma ndɔan, ma suu man o nile tiilannde ba kɛndɛle Aarɔn-nden coo, a o nila tiilannda bala kɛndɛla poaa ndɔa coo, ma suu vɛlɛ man o sun bɛndun bala ndala kɛndɛlan coo a o sun bɛndun bɛngula ndala ba kɛndɛlan coo. O kon kɔɔli, a fasaŋiaa man o kpengun hiɔɔlun fonda-loamaa-lasálàá.

²¹ A cii pɛ, a cua kooma vanin makɛsiaa o fonda-loamaa-lasálàá coo-an, a cuɛima co le pɔlaa-an, a fasaŋiaa man Aarɔn coo a o volɔɔla ndɔla cuɛinanndan coo, a fasaŋiaa man vɛlɛ poaa Aarɔn-nda coo a o volɔɔla ndala cuɛinanndan coo. Lende Aarɔn bɛnda ni mo sɔla pɔlaa nda poaa ndɔa, a volɔɔla ndala cuɛinanndan le vali solia lasálàá tosaa ya Mɛlɛka o hɔl.

²² Ma cua visin macuɛin saa kóndó diinndɔɔ, puilen ndɔlen, cuɛima kumbu ɲɛm co ndu o dembe-on-ndan, bungɛi hiow naŋɔɔ o yemnde nin-nde, kɔlkelen miunndon, cuɛima kumbu mun-ndan a lɔlu ba kɛndɛ ndɔɔ, kani saa kóndó sálà kandaa baalaa co kon ni,

²³ ma cua vɛlɛ buloo o pilɛ, a dɛɛ toaŋaa nda toŋ a cuɛiyan-ndo o pilɛ, a fùlúfúloo o pilɛ o kambɛi bulu toosian a lɛvɛn too co nin-ndo nin, kambɛi co o kɛsiaa Mɛlɛka o hɔl-lo,

²⁴ ma sɔɔ ɲɛm mun kpow Aarɔn nda poaa ndɔa o ba. Ma cɔm nda mɛɛ vana heelu ɲɛm mun Mɛlɛka o hɔl a faleŋii vana heelu ɲɔɔ Mɛlɛka o hɔl-le tosaa yɛ.

²⁵ A cii pɛ faleŋii ken tosa, a bii mun nda o ba, a lom mun o yin o sálà loamaa co o fonda-loamaa-lasálàá coo-o coo, haliko mi tuei cun ndɔ kɛndɔɔ. Sálà ŋɔa o yin le ya Mɛlɛka-o co kon ni, o ya tuɛi cun mì ɲɔɔ hɛnan ya-o.

²⁶ Ma cua kɔŋɔ saa kóndó co kon le sálà kandaa baalaa solio le Aarɔn-ndo, ma tosa faleŋii vana heelu ɲɔɔ Mɛlɛka o hɔl-le, ma cɔm ndu kɔŋɔ kon. A cii pɛ, a loo kɔŋɔ kon le nɔm pila, o co le nɔm-ndo co kon ni.

²⁷ Ma tosa faleŋii dindiannde le kɔŋɔ nda cɔmnin kon Mɛlɛka a faleŋii heelɛi-yo, a le lɔlu nda solinin o saa kóndó sálà kandaa baala yɔngunnin le Aarɔn nda poaa ndɔa-o.

²⁸ Le Aarɔn nda poaa ndɔa ɲɛm mun co ni. Tɔŋndo co kon le fɛɛn a fɛɛn Israɛlla tɛɛn ni. Kani cɔwviaalan la co lán ni, nduyɛ cɔwviaala lan Israɛlla bɛnda ni ma va Mɛlɛka yɔngoo o sálàla ndala kɔlɲulula nda vanin solio lan coo.

²⁹ Poaa ndɔa hun loonin volɔɔla ndɔla solia sálàla lan fɛɛn ni, paale nda vanin pɔlaa sɔlaa a faleŋun kandaa baalan tosaa len nda vownunnin ndan ni.

³⁰ O poaa ndu Aarɔn-nda tɛɛn, po lonin bolle vanaa-solia-lasálàá o fonda ndɔɔ, mò luɛi o cɛi-kola-toandaa-labɔɔŋianndo nin le sálàá solio o Fonda-Diandaa nin-ndo bɛnda ni mo vownun ndan, mì la lo ndu lekɔɔ háá palɛi ndii ŋɔmmɛw.

³¹ O kon kɔɔli, a cua visin saa kóndó diinunnin le sálà kandaa baalaa solio-o, a yaw mun nɛɛ diandaa pum.

³² Visin mun cuu pɛ yaw, Aarɔn nda poaa ndɔa de mun a bulu co o kambɛiyo nin-ndo o cɛi-kola-toandaa-labɔɔŋianndo sondoo.

³³ Nda kínɛí bɛnda ni mà de ɲɛm sálàn mun. Kani a mun hakila ndalan la ɲuminnin telen nda vanin nda faleŋun kandaa baalan tosaa coo-o ni, faleŋun mun tosanin ni mà siŋnun vanaa diandaa ya Mɛlɛka o hɔl. Vana celen bɛnda mò de ɲɛm mun te, kani ɲɛm diandan n co ya Mɛlɛka o hɔl ni.

³⁴ Te visin cɔlu sálà kandaa baala kon a buloo lo pɛ o tɔ̀ háá diimandɔɔ, a lom ɲɛm lo mun-ndon o yin. Vana bɛnda lɛ ma de kuya kon te, kani ɲɛ diandaa o co Mɛlɛka o hɔl ni.

³⁵ O palɛi ndii ŋɔmmɛw bɛngu, a bɛnda ma va faleŋun kandaa baalan tosaa le Aarɔn nda poaa ndɔa mɛɛ ya cɔm nɔm yɛ kpafii.

³⁶ Lepalaa-lepala, a bɛnda ma soli sálàá le hakio sɔlaa malɔɔ a naw tovaa o pilɛ, ma dindi fonda-loamaa-lasálàá a faleŋun baŋan n vànin tosaa lecoo-on, ma pɔla ndu le ndu dindio le vali Mɛlɛka-o.

³⁷ Ma va faleŋun baŋan mun tosaa lecoo háá palɛi ndii ŋɔmmɛw, haliko mo sɔla dindio le vali Mɛlɛka-o. A cii pɛ tosa lende, o siŋnun o diandaa taw, ɲɛ-ɲɛ pilan nin ndu pɛ ɲɛ kon siŋnun le Mɛlɛka.»

Sálàla loamaala tiɔnnda solin lepalaa-lepala lan

³⁸ «Ɲɛ n bɛnda vɛlɛ ma tosa o fonda-loamaa-lasálàá coo le fɛɛn a fɛɛn-ndo co hoo ni: lepalaa-lepala, a bɛnda mà soli sálàá a saa téndéa nɔ vɔsio pilɛ-a nda ŋiɔn o fonda-loamaa-lasálàá coo.

³⁹ Ma soli sálà idiiyo a ò pilɛ, ma soli sálà paale delaa a o pilɔɔ.

⁴⁰ A dii pɛ saa téndé tasoo idiiyo, a kɔndu kpeyanndo kiloo leyàá, o nda vɔɔca a cuɛima kɛndɛ-kɛndɛma olivean litilio pilɛ a tálá-o. O kon kɔɔli, a tala mɔiyan litilio pilɛ a tálá le sálà mamɔiyo le saa téndé oo saa téndé.

⁴¹ Le sálà paale delaa bɛɛ, ma cua ɲɛm pilɛn mun: kpeyanndo, cuɛiyan a mɔiyan, mɛɛ n tosa a cɔlu sálà idiiyo yɛ. Sálà ŋɔa o yin le ya Mɛlɛka-o co kon ni, o ya tuɛi cun mì ɲɔɔ hɛnan ya-o.

⁴² Sálà loamaa niaa bɛnda mì la va solio le fɛɛn a fɛɛn-ndo co kon ni, la bɛnda mì la va ndu solio ya Mɛlɛka o hɔl o cɛi-kola-toandaa-labɔɔŋianndo sondoo. Lon ya vanin bɔŋanndo a niaa ni, lon koni ya vanin suukanndo a nɔm Moise ni.

⁴³ Lon ya vanin bɔŋanndo a Israɛlla ni, biilu nuu co fonda kon dindi.

⁴⁴ I dindinin cɛi-kola-toandaa-labɔɔŋianndo a fonda-loamaa-lasálàá le vali nuu. I dindinin vɛlɛ Aarɔn nda poaa ndɔa mà siŋnun vanaa-solia-lasálàá le ya Mɛlɛka.

⁴⁵ I kɛsinin calta nilan Israɛlla tɛɛn, mì va Hala ndaa.

⁴⁶ O kon, a sinanin maa ya Mɛlɛka co Hala ndaa ni, maa ya soli nda o lɛŋnde Esipte len nin ni haliko mi va icali nda tɛɛn. Lekɛ́ndɛi ya co Mɛlɛka ni, Hala ndaa pɛɛn.»