Fulaa 28 - BII BILA

Volɔɔla cuɛinannda vanaa-solia-lasálàá

¹ «O Israɛlla tɛɛn, ma cua Aarɔn bɛ nɔm nda poaa ndɔa, Nadab, Abihu, Eleasar a Itamar pɛɛn, mì nda sɔɔnguu nɔm ikɛi. Nda hɛlin o Israɛlla tɛɛn le siŋnɔnndo vanaa-solia-lasálàá le ya Mɛlɛka ni.

² Ma sɔndu volɔɔla diandaala solia lasálàlan le Aarɔn bɛ nɔm. Lan la co va tɔɔmaseloo le biilu ndɔɔ a le bɛɛle ndɔlen ni.

³ Nɔm Moise, ma soo o vanaa caa sɔndɔɔ-a kpow lo, vanaa ya yɔngu kɔlkaloo taw-taw-va, ma dimul nda mà sondul Aarɔn volɔɔlan, haliko mo siŋnun teengen le ya baala solia lasálàá tosallo.

⁴ Volɔɔla nda bɛnda mà sɔndu lan la co lan ni: doma-lapow-iyamaa, doma ifalenndo, doma bɛndoo, doma lebɛngu sɔɔlaa, mɔsillo a yáwlen. Mì vanaa kan a toosiaa volɔɔla diandaala solia lasálàlan ndan le Aarɔn bɛ nɔm nda poaa ndɔa, haliko ma siŋnun vanaa-solia-lasálàá le ya Mɛlɛka.

⁵ Mì vanaa kan toosiaa ɲɛla lan a sianion, a kɛila nda yin a kaan-ndan, a kɛila siaŋala sɔɔtɔlɔlan, a kɛila siaŋala vólotótolan a á kola keesoo.»

Doma ifalen vana-solia-lasálàá

⁶ «Mì vanaa kan lɔ doma ifalenndo a kɛila n'sianilan, a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keese nda lɔ a kɛila kpeendaalan-ndo. Mì vanaa caa baala kon taw-va toosiaa lan.

⁷ Mì kolala n'pɛngɛla kei o congúlan coo le doma kalaa yiiyo lan la va tan tiɔn o kpengun miunndon coo.

⁸ Mì yáwlen le tosan a kola súú pilɔɔ nda doma ifalen kon, mì le va lesɔandaa lecoo a kɛila kpeendaalan.

⁹ Ma cua powta onikselan tan tiɔn, ma sɛva diola poaa Israɛl-la lecoo.

¹⁰ Mì diola vanaa ŋɔmpum la sɛvan o powvo o pilɛ coo, mì diola vanaa ŋɔmpumnda pilla la sɛvan o powvo pilɔɔ coo. Ava pɛ sɛvaa, a kandu a po tasoo, a mɛɛlu a po lumndo.

¹¹ Cua vana caa powtan siɔlɔɔ-o, mò sɛl diola lan o powta tiɔnnda lan coo mɛɛ nda sial powvo mà toosiaa tampɔnndo nuaa yɛ. Ma hol powta tiɔnnda lan o sianion coo.

¹² Ma hol tan o kolala n'pɛngɛla kei o congúlan coo lan. Powta lan ya vanin cɔu ni mì va loonɔnndo a poaa Israɛl-la. Kani Aarɔn vanin hunɔɔ ya Mɛlɛka o hɔl a diola lan o congúla ndɔlan coo, mì va loonɔnndo lɔ́ɔ́-lɔ́ɔ̀ a nda.

¹³ Ma cɔw vɛlɛ ɲɛla vana hol ɲɔɔ coo lan tan tiɔn a sianion,

¹⁴ ma cɔw yɔlɔn pɔmbɔn mún miun a sianin diandan, ma lɔ mun maa lakande, ma baa yɔlɔn lɔfan mun o ɲɛla holiaa laɲɛla lan.»

Doma-lapow-iyamaa

¹⁵ «Ma dimul vanaa caa baala labaa taw-va, mà toosiaa doma-lapow-iyamaa a powta báà kàlàlan. Mà toosiaa mɛɛ nda toosiaa doma ifalenndo yɛ, mà tosa ndu a kɛila n'sianilan, a kɛila nda yin a kaan-ndan, a kɛila siaŋala sɔɔtɔtɔlan, a kɛila siaŋala vólotótolan a á kola keese nda lɔ a kɛila kpeendaalan-ndo.

¹⁶ Bandii pilɛi o nɔnin ni, kpengei pilɛ bandei baa piasaa lepilɛ, buo baa piasaa lepilɛ.

¹⁷ Ma hol powta báà kàlàlan polan mahiɔɔlu lecoo, o polale taselen coo, ma hol sarduan, topas a emerɔd.

¹⁸ O polale diinndɔlen coo, ma hol rubis, safir a diamannde.

¹⁹ O polale yàándɔlen coo, ma hol opal, akate a ametiste.

²⁰ O polale hiɔɔlundɔlen coo, ma hol krisolite, onikse a yaspe. Mì powta lan la va laholiaa o ɲɛla nda cɔw a sianion-ndan coo.

²¹ Mì diola poaa tɔ́ a à ŋiɔŋaa Israɛl-la la va lasialaa lecoo mɛɛ nda sial sɛvaa o powvo le ndu siinguuo tampɔnndo nuaa yɛ. Mì pow oo pow nɔ diola vana pilɛ o poaa tɔ́ a à ŋiɔŋaa Israɛl-laa kan tɛɛn.

²² Ma cɔw yɔlɔn pɔmbɔn le doma-lapow-iyama kon a sianin diandan, ma lɔfa mun maa iyoo.

²³ Ma cɔw vɛlɛ kelan mún miun a sianion, ma vil mun o kpengun miuŋun doma-lapow-iyama kon.

²⁴ Ma luei yoei ŋiiŋii n tosa a sianion-nde o kelan miuŋun n cɔw a sianion-ndon nin o kpengun miuŋun doma-lapow-iyama kon.

²⁵ Ma baa bolii yoei ŋiinde pilɛi o ɲɛla bààla co o yoei lacongúi doma-lapow-iyama kon laci lan.

²⁶ Ma cɔɔlu vɛlɛ kelan cɔvɔɔ mún miun a sianion, ma baa mun o kpengun miuŋun co o doma-lapow-iyama kon a lebɛngu-on, o hɔlaa vɔɔŋaa doma-lapow-iyama kon n bɛnda ni ma baa mun, hɔlaa holnun doma ifalenndo-a pɛɛn.

²⁷ Ma tosa vɛlɛ kelan n'sianin celen mún miun, ma baa mun o yoei lacongúi doma ifalenndo, ma baa mun laci a lebɛngu, o yáwle doma ifalen kon ikɛi.

²⁸ Mì kelan doma-lapow-iyama kon n baanun o kelan doma ifalenndo a o kola ipɛngɛ kola nda yin a kaan-ndo, haliko mi doma-lapow-iyama kon va o yiyaa o yáwle doma ifalenndo coo, yɔŋii o kpeŋan lecoo.

²⁹ O kon, lɔ́ɔ́-lɔ́ɔ̀ Aarɔn luɛi pɛ o Cɛi-Diandaa nin, o kɔɛ Mɛlɛka o hɔl a diola poaa Israɛl-la ndu o takpa o doma-lapow-iyama kon coo, haliko mi ya Mɛlɛka va loonɔnndo a nda lɔ́ɔ́-lɔ́ɔ̀.

³⁰ O kon, a vow urim a tumim o doma-lapow-iyama kon nin. Mì lan bɛɛ la va o takpa Aarɔn-ndo coo lɔ́ɔ́-lɔ́ɔ̀ o luɛi pɛ ya Mɛlɛka o hɔl. La va pɛ ndu o takpa, la cɔm ndu yaman ya vanin kiolɔɔ o sɔɔn Israɛlla nin-ndon.»

Volɔɔla cuɛinannda tɔ̀la vanaa-solia-lasálàá

³¹ «Ma sɔndu doma bɛndu bɛnda le vaa o doma ifalenndo bɛngu-o kpow a kola nda yin a kaan-ndo.

³² Mì doma bɛndu kon va o bulia tɛɛn le bollen lueiyo lon. Mì vanaa lɔaa lakolaa sɔɔluu bolola bulin lan-ndan ɲɛkɛndɛi, yɔŋii la sɛɛsa.

³³ Ma tosa ɲɛlan lapum velanndo a krenadeon a kɛila nda yin a kaan-ndan, a kɛila siaŋala sɔɔtɔtɔlan a á kɛila siaŋala vólotótolan, ma balu lan bayiaa a bamban pɔmbɔn cɔwnun a sianion-ndon latulu o cɔcɔɛi lebɛngui doma bɛndu kon pindo.

³⁴ A baa pɛ bambɛi n'sianiei ipilɛ, a baa vɛlɛ tuula krenadeo o pilɛ. Lende n bɛnda ni ma lo lan hiyahiyanndo bayiaa háá mà bɔŋa cɔcɔɛi lebɛngui doma bɛndu kon sɔ́.

³⁵ Ndú Aarɔn vanin vownɔnndo ni le luɛyɔɔ sálàlan solio. Tuma Aarɔn vanin luɛyɔɔ ya Mɛlɛka o hɔl o Cɛi-Diandaa nin-ndo a telen o vanin fulaa-o, bamban mun bɛnda mì n va comullo ni. Kon tosanin ni o sɔlanin piɔ́mndo le.

³⁶ O kon kɔɔli, ma tosa pɛngɛi pɔmbɔɛi a sianin diandan le holɔɔ o mɔsillo laci, ma sɛva lecoo mɛɛ vana sɛva o tampɔnndo coo nuaa yɛ aa: ‹O kɛsin teengen le baala Mɛlɛka-o-o.›

³⁷ Ma hol ndi o mɔsil solia lasálàá laci a pɛngɛi kola nda yin a kaan-ndo,

³⁸ haliko mi pɛngɛi ken va Aarɔn o itendu. Kon cɔm ni maa te Israɛlla tosa pɛ hakio, mà pilan ya tana o ya sálàla ndalan súúlan kpow cuuo nin, mɛɛ Aarɔn siilun hakila ndala lan. Pɛngɛi ken vanin ndu o itendu lɔ́ɔ́-lɔ́ɔ̀ ni haliko mi cɛl sálàla lan a kɔl nuu kpow.

³⁹ Kon cuu pɛ, a cua kola keesoo, a sondul doma lebɛngoo, a sondul ndu vɛlɛ mɔsillo a kola keese pilɛ kon. Mì vana caa sɔɔluuo-o toosiaa yáwlen.

⁴⁰ Ma sondul vɛlɛ poaa Aarɔn-nda domala lebɛngulan, a yáwve, a mɔsilta vilɛilan. Tɔɔmaselelan la co lan ni le biilu ndaa a le bɛɛle ndalen cɔmndo.

⁴¹ Ma vow Aarɔn bɛ nɔm a poaa ndɔa volɔɔla lan, ma pɔla nda a cuɛima diandan, ma kɛsi nda teengen, haliko ma kandu baalaa le siŋnɔnndo vanaa-solia-lasálàà nia, ya Mɛlɛka pɛɛn.

⁴² Ma sondul nda vɛlɛ lɛmbɛla lebɛngulan a kola keesoo, mì la va bandei kandɔɔ o caŋnda háá o lɔlulan, yɔŋii nda va tumnda fondo.

⁴³ Te Aarɔn nda poaa ndɔa a va pɛ luɛyɔɔ o cɛi-kola-toandaa-labɔɔŋianndo nin, te kon te mà va le kɔlan o fonda-loamaa-lasálàá o Fonda-Diandaa nin, à bɛnda mà vownun ndan. À tosa pɛ lende, mɛɛ à delnin kasi mà sɔla piɔ́m te. Tɔŋndo co hoo le Aarɔn a polale ndɔlen ndu kɔɔli le fɛɛn a fɛɛn ni.»