Fulaa 27 - BII BILA

Fonda-loamaa-lasálàá

¹ «O kon kɔɔli, ma toosiaa vɛlɛ fonda-loamaa-lasálàá a pɛngɛn akasia, mì kpengon kpow n va ɲɛ pilɔɔ: bandei dunndo leŋuɛɛnu, buo dunndo leŋuɛɛnu, simndan dunndo leyàá.

² Ma heelu ndu kpɛɔn mún hiɔɔlu o sɔngila ndɔla hiɔɔlulan coo, mì kpɛ̀ɛ́n mun va n'baalanndon a fonda-loamaa-lasálà kalaa, ma yikpa ndu a daɲan.

³ Ma cɔw ɲɛm-laandun fonda-loamaa-lasálà kon kpow a daɲan, ma cɔw bombola kɔandaa lapultan, peelelan, bonyon le koovan hawvo lenin, cukanila n'ciŋndan, ma cɔw vɛlɛ bonyun nda fuusa-on. Ɲɛla lan kpow la bɛnda mì la cɔwnun a daɲan.

⁴ Ma lɔ ɲɔɔ maa kpangbàà a daɲan le fonda-loamaa-lasálà kon, ma lɛɛnduu kelan n'daɲan mún hiɔɔlu o sɔngila ndɔla hiɔɔlulan.

⁵ Ma vow ɲɛ co kon a daɲan maa kpangbàà-o o fonda-loamaa-lasálà kon nin, ma tuisi tiŋ, mò va tɛɛn kínɛí.

⁶ Ma sɛl yɔmii cuaa ndu-e ndii ŋiin a pɛngɛn akasia le fonda-loamaa-lasálà kon, ma yikpa ndi a daɲan.

⁷ Mì yɔmii ken i sɔɔnun o kelan ndɔn nin o kpengun miunndon le ndu cuaa a ndi.

⁸ Fonda-loamaa-lasálà cɔwnun kon a pɛngɔn-ndo bɛnda mò va fondo lenin. Cɔw ndu mɛɛ tuula ndɔɔ cɔmnun nɔm o pembei coo yɛ.»

Kolalan o bɛ́ɛ̀ cɛi-kola-toandaa-labɔɔŋianndo

⁹ «O kon kɔɔli, ma bɛɛndiaa bɛɛ Calta Mɛlɛka lan. A ba too, ma kunga ndu a kola keese nda lɔ a kɛila kpeendaalan-ndo, mì fonda kungan kon-ndo va bandei dunndo kɛmɛ le kpengei ipilɛ.

¹⁰ Ma landu kola keese kon o sungbuma n'pɛngɛma bidiinma co lon-ndan, mì sungbuma man ma nɔ tumndan o ɲɛla kɛsiaa latumnda bidiinnda cɔwnun a daɲan-ndan nin. Mì bawla vanin o sungbuan-ndan a kpɔlɔnnda landaa lakolalan là cɔwnun a volin humbon.

¹¹ A ba luaŋ-ndo bɛɛ, ma tuu bandei dunndo kɛmɛ, ma kunga fonda kon a kolalan, ma landu kolala lan o sungbuma n'pɛngɛma bidiinndan, mì sungbuma man ma nɔ tumndan o ɲɛla kɛsiaa latumnda bidiinnda cɔwnun a daɲan-ndan nin. Mì bawla co o sungbuan-ndan a kpɔlɔnnda landaa kolalan la cɔwnun a volin humbon.

¹² Ma tuu bu bɛɔ dunndo beleŋuɛɛnu a ba paalen le del-lo, ma landu kolalan o sungbuan tɔ́, mì sungbuma man ma nɔ tumndan o fondala kɛsiaa latumndan tɔ́ nin.

¹³ Mì bɛɔ nɔ vɛlɛ buo dunndo beleŋuɛɛnu a ba paalen le can-ndo.

¹⁴ O sondo bɛɔ baa pilɔɔ, ma tuu dunndo tɔ́ a leŋuɛɛnu, ma landu kolalan ndon, o sungbuan man yáá o fondala kɛsiaa latumndan tan yáá nin.

¹⁵ O sondoo baa pilɔɔ vɛlɛ, ma tuu dunndo tɔ́ a leŋuɛɛnu, ma landu kolalan o sungbuan man yáá, o fondala kɛsiaa latumndan tan yáá nin.

¹⁶ Ma tondu kola-landaa dunndo bidiin o dio kunga bɛɔ, mì kola-landaa kon va o toosiaa a kolala keesela nda lɔ a kɛila nda yin a kaan-ndan-ndan, la nda yin yinɔɔ siaŋa sɔɔtɔtɔɔ lan a la yin yinɔɔ siaŋa vólotótoo lan. Mì vanaa caa sɔɔluuo taw-va sɔɔluu ndu ɲɛkɛndɛi. Mì kola-landaa kon va o landaa o sungbuan man hiɔɔlu, mì sungbuma man ma nɔ tumndan o fondala kɛsiaa latumndan tan hiɔɔlu nin.

¹⁷ Sungbuma balu kunga bɛ́ɛ̀ cɛi-kola-toandaa-labɔɔŋian kon-ndan kpow ma bɛnda mì ma tombolian a kpɔlɔnnda cɔwnun a volin humbon-ndan, mì bawla co o sungbuma man-ndan la cɔwnun a volin humbon, mì fondala kɛsiaa latumnda ndalan la va latoosiaa a daɲan.

¹⁸ Mì bɛɛ kon va bandei dunndo kɛmɛ, buo dunndo beleŋuɛɛnu. Mì simnda kola keese nda tondu-o va dunndo leŋuɛɛnu, mì fondala kɛsiaa latumnda masungbulan kpede la va lacɔavaa a daɲan.

¹⁹ Ɲɛm-laandun co le baalaa tosaa o Calta Mɛlɛka lan nin-ndon, pikin cɛi kalaa a pikin kunga bɛ́ɛ̀ ndɔɔ kpow n bɛnda mì n va n'cɔavaa a daɲan.»

Cuɛiyan le fitinalan mɛndullo

²⁰ «Ma dimul Israɛlla mà cuu nɔm cuɛima olivema sɔvɛ-sɔvɛan, haliko mi fitinalan la va sandei idii a icɔl o ɲɛ kɛsiaa lafitinaa coo.

²¹ Mì Aarɔn nda poaa ndɔa bɛɛndiaa fitinalan kɛsi ɲɛkɛndɛi o cɛi-kola-toandaa-labɔɔŋianndo nin, o kola-landaa ven kesu kpemaa-o o hɔl-ndɔ, haliko mi fitinalan la va lɔan sandei pii ya Mɛlɛka o hɔl. Fonda oo fonda niaa va pɛ icali, kandɔɔ a niaa pila, kɔ bii a cuavaa niaa imamaa, la bii tɔŋndo ho le fɛɛn a fɛɛn.»