Fulaa 25 - BII BILA

TUUVO LE CƐI-KOLA-TOANDAA TANGULLO A LE VANAA VANIN VALLO LENIN-NDA (25—31) Cuungiaa Israɛlla bɛnda mà yɔngu-o

¹ Mí Mɛlɛka soaa o Moise lo, mó dimul ndu aa:

² «Dimul Israɛlla mà yɔngu cuungiaalan le ya. Vana-vana yɔngu pɛ cuungiaa ndɔɔ a kɔl ndɔɔ kpow, la bii ndu ndu o ba.

³ Cuungiaala nda bɛnda mà yɔngu lan la co lan ni: sianion, volin humbon, daɲan,

⁴ yɔɔsɔla nda yin a kaan-ndan, yɔɔsɔla siaŋala sɔɔtɔtɔlan, la siaŋala vólotótolan, kola keese fɛtufɛtoo, kola toosian a yiiŋii cuinnda-o,

⁵ yáwla saa kóndóla nda yin yinɔɔ siaŋaa lan, yáwla kálà-kálàlan, pɛngɛn akasia,

⁶ cuɛiyan le vowvo o ɲɛ kɛsiaa lafitinaa nin, ɲɛm cun kɛndɔn le cuɛima co le pɔlaa-an a le ansan lomɔɔ,

⁷ pow onikse a powta báà kàlàla celen, le holɔɔ o doma ifalenndo a o doma-lapow-iyama bolle vanaa-solia-lasálàá coo.

⁸ Ma tosal-la Cɛi-Diandaa haliko mi cal Israɛlla tɛɛn.

⁹ I co nɔm Moise cɔm mɛɛ nda tangulnin Calta Mɛlɛka lan a ɲɛm-laandun diandan vanin lenin-ndon yɛ. O kon, mì la tangul ndu mɛɛ ya co niaa cɔm yɛ kpafii.»

Kesu kpemaa a kumbu ndɔɔ

¹⁰ «A bɛnda ma sɛl kesoo a pɛngɛn akasia, bandei dunndo lediin a tálá, buo dunndo lepilɛ a tálá, simndan dunndo lepilɛ a tálá.

¹¹ Mì nɔm Moise yikpa ndu lenin a lekɔɔli a sianin diandan, ma balu ndu sianion holɔɔ o cɔcɔn a o kpengon pindo.

¹² Ma tengiaa sianion, ma cɔw kelan mún hiɔɔlu le pelun hiɔɔlun kesu kon, ma lɛɛnduu n'miun kpengei pilɛ, n'miunndon kpengei pilɛi.

¹³ Ma sɛl yɔmnde a pɛngɛn akasia le ndu cuaa, ma yikpa ndi a sianion,

¹⁴ ma sɔɔ ndi o kelan mún nin o kpengun kesu kalaa, haliko mi vana nɔla kesoo cuaa a ndi.

¹⁵ Yɔmii ken i bɛnda mì i lo le lɔ́ɔ́-lɔ́ɔ̀ o kelan mún nin, vana bɛnda ma soli ndi lenin te.

¹⁶ Ma kɛsi sɛbɛ kpema diandaa ya co nɔm yɔngu-o o kesu kon nin.

¹⁷ Ma toosiaa vɛlɛ kumbu kesu kon a sianin diandan bandei dunndo lediin a tálá, buo dunndo lepilɛ a tálá.

¹⁸ Ma tuula mɛlɛkaa kanda ɲɛm Hala-on-nda a ŋiɔn a sianin fɛtufɛton o kpengun miuŋun kumbu kon.

¹⁹ O pilɛ nɛɛ kumbu kon mɛɛlu kpengei pilɛi-ya, o pilɔɔ vɛlɛ nɛɛ kumboo mɛɛlu kpengei pilɛi-ya, mà va isisi lecoo.

²⁰ Mì kumbannda ndalan la va lapɛɛngaa coocoo le kumbu kesu kon kandaa a kumbannda lan, mà mululan hɔlla vellaa-velle, mà va tofaa o kumbu kesu kon coo.

²¹ Ma handu kumbu kalaa o kesu kpema kon coo, ma kɛsi sɛbɛ kpema ya co nɔm yɔngu-o o kesu kon nin.

²² O kumbu kesu kon coo, o mɛlɛkaa ŋiɔŋaa vanin kan o kumbu kesoo coo-a tɛɛn ya vanin nɔm cɔmnɔnndo ni. Lon ya vanin nɔm sɔɔn kpow dimullo le Israɛlla ni.»

Tabali kɛsiaa bulu sálàá

²³ «O kon kɔɔli, ma sɛl vɛlɛ tabalio a pɛngɛn akasia, bandei dunndo lediin, buo dunndo lepilɛ, simndan dunndo lepilɛ a tálá.

²⁴ Ma yikpa ndu a sianin diandan, ma holi sianion o cɔcɔn tabali kalaa pindo.

²⁵ Ma toosiaa pɛngɔn tongei a ba kɔllo kpen, ma balu mun baŋɔɔ le ndu saa kpíŋ, ma holi sianion o cɔcɔn pɛngɛn mun.

²⁶ Ma tosa kelan mún hiɔɔlu a sianion, ma lɛɛnduu mun o sɔngila hiɔɔlulan, nɛɛ pelun hiɔɔlun tabali kon hun ciŋan o tabalio-a.

²⁷ O kelan co mun o pɛngɛn saa ndu kpíŋ-ndon ikɛi-yon nda sɔaanin yɔmii cuaa tabalii kalɛi ni le kɔlan a ndu.

²⁸ Ma sɛl kpɔlɔnndan tan tiɔn a yɔm akasia, ma yikpa lan a sianion, lan la vanin le tabali kalaa cuaa le kɔlan ni.

²⁹ Ma cɔw ɲɛm-laandon: sɛtilan, taalala kólaalan, fɛngɛlan a hɛngɛilan le sálàla mamɔilan solio, lan kpow a sianin diandan.

³⁰ Ma kɛsi bulu nda solul-la sálàá-o ya o hɔl o tabali kon coo, mò va o kɛsiaa lon le lɔ́ɔ́-lɔ́ɔ̀.»

Ɲɛ kɛsiaa lafitina cɔwnun a sianion-ndo

³¹ «Ma cɔw ɲɛ kɛsiaa lafitinaa a sianin diandan fɛtufɛton, ma cɔw ndu o baalanndo a tum ndɔɔ, mì lɔɔla ndɔlan la nɔ kɛɛmiaalan tɛɛn maa lapeenge a boondon. O lɔɔla lan bolle, mì hɛngɛila tɛsɛkɛɛlan la va lon le fitinalan kɛsio lecoo.

³² Ma cɔw ndu a lɔɔlan laŋɔmpum: kpengeí layàá, kpengeì pilɛi vɛlɛ layàá.

³³ Lɔɔla ŋɔmpumnda lan, lɔɔ oo lɔɔ bɛnda mò nɔ boondon mún yáá a kɛɛmiaalan o boondun mun maa peengela yɔm amanndiee.

³⁴ Lɔɔ co tɛɛn-ndo bɛnda mò nɔ boondon mún hiɔɔlu a kɛɛmiaalan o boondun mun maa peengela yɔm amanndiee.

³⁵ Mì kpukpon va o fondala lɔɔla tiɔn-tiɔnndan la hun bɔŋa o lɔɔ co tɛɛn-ndo-o bɛngu.

³⁶ Mì kpukpun mun a lɔɔla lan la va labaalanndan o lɔɔ co tɛɛn-ndo. Mì ɲɛ kɛsiaa lafitina kon kpow va o cɔavaa nɛɛ pilɛ a sianin diandan fɛtufɛton.

³⁷ Ma cɔw vɛlɛ fitinalan tan ŋɔmmɛw, ma kɛsi lan o hɛngɛila tɛsɛkɛɛla toosian le fitinalan kɛsio lecoo lan coo, haliko mi ɲɔɔ va o tengaa laci.

³⁸ Ma cɔw kpaɲala ndɔlan a bombola kɔandaa lapulta ndɔlan a sianin diandan.

³⁹ A bɛnda ma tuu sianin diandan kilolan beleyaa le ɲɛ kɛsiaa lafitinaa a volɔɔla ndɔlan cɔvɔɔ.

⁴⁰ Toosiaa ndu ɲɛkɛndɛi mɛɛ ya tuu ndu mí cɔm nɔm o pembei coo yɛ kpafii.»