Fulaa 24 - BII BILA

Mɛlɛka yii kpemaa a Israɛlla

¹ Mí Mɛlɛka dimul Moise aa: «Cua Aarɔn, Nadab, Abihu a kaasoŋaa kɔlkalua n'van belaŋɔmmɛw o Israɛlla tɛɛn, mì la hel o ya Mɛlɛka lo o pembei coo, mì la sim kɔɔli-kɔɔli, mì la baŋ vulan ya o labɛngunin.

² Nɔm Moise kínɛí bɛnda ni mà sɔɔnguu ya ikɛi, haa nda bɛnda mà sɔɔnguu ya ikɛi le. Vanaa tɔ̀a yɛ, nda bɛnda mà hel o pembei coo le.»

³ Mí Moise toal, mó tɛɛngul vannda sɔɔn Mɛlɛka soo-on kpow a silala o yɔngu lan kpede. O kon, mí nda kpede a deŋi diom pilɛ kpé aa: «Ɲɛ-ɲɛ Mɛlɛka dimul naa le tosaa, n co ndu tosa.»

⁴ Mí Moise sɛva sɔɔn Mɛlɛka soo-on kpow. Diimandɔɔ, mó pena cɔnɔn idiiyo púŋ, mó cɔaw fonda-loamaa-lasálàá o pembii ken bɛngu, mó simi powta sálàlan tɔ́ a latiɔn mɛɛ polama Israɛlla ma co tɔ́ a mamiɔn yɛ.

⁵ O kon kɔɔli, mó viam langbaa Israɛlla pum le Mɛlɛka sálàla loamaalan solullo, a le ndu sálàla kɔlɲululan solullo a navaa tovaa.

⁶ Mó haw tálá kooma cɔlua kan o hɛngɛilan nin, mó fasaŋiaa táláá pilɔɔ o fonda-loamaa-lasálàá.

⁷ O kon kɔɔli, mó cua sɛbɛ kpemaa, mó dimi ɲɛ va o sɛvaa lenin-ndo coocoo vannda kpow o hɔl. Mí Israɛlla kpede a dimi aa: «Ɲɛ-ɲɛ Mɛlɛka dimul naa le tosaa, n co ndu tosa. N co sɔɔn o dimul naa-on kpow biyɔɔ.»

⁸ O kon, mí Moise cua kooma cɔlua kan, mó fasaŋiaa man nda coo, mó dimi aa: «Kooma kpeman ma co man ni, kpema Mɛlɛka yii a naa o sɔɔn mun kpow nin-ndo.»

⁹ O kon kɔɔli, mí Moise hel o pembei coo nda Aarɔn, a Nadab, a Abihu a kaasoŋaa kɔlkalua belaŋɔmmɛw o Israɛlla tɛɛn.

¹⁰ Má ca Hala Israɛlla. Pow yɛ́ndɛ́ ndóò kɛsi pelon coo-o va maa halataala diandaa, yinɔɔ biloo pow kon ndóò nɔ ni, diolan ndu aa «safir».

¹¹ Mɛlɛka tosal vanaa kɔlkalua ce ndu kan-nda dɛnɛ vɔɔn te. Má mɛɛndan Hala ɲɛkɛndɛi, o kon kɔɔli, má dia ɲɛdiaa, má kol.

Moise tiiya nɛɛ Hala co o pembei coo-a

¹² Mí Mɛlɛka dimul Moise aa: «Hel nɛɛ ya co o pembei coo nanu-a ma sim nanu. I co nɔm powta yɛ́ndɛ́la ya sɛva tɔŋndan a silalan coo lan yɔngu, haliko ma kɔ pɛɛku vannda lan.»

¹³ Mí Moise can nda Yosue vana ndɔ malaa, má hel o pembii Hala-e coo.

¹⁴ Mó dimul kaasoŋaa kɔlkalua o Israɛlla tɛɛn aa: «La lo naa cumndo nanu háá mì n hin, Aarɔn nda Hur co va niaa ikɛi. Vana nɔ pɛ isɔɔ, o komal nda.»

¹⁵ Mí Moise hel o pembei Sinai coo, mí kumnde kumbu pembii kalɛi mɔku-mɔku.

¹⁶ Mí biilu Mɛlɛka-o hun tiw lecoo, mí kumnde lo lecoo háá palɛi ndii ŋɔmpum. Paale ŋɔmmɛwndɔlen, mí Mɛlɛka veelu Moise o kumnde nin.

¹⁷ Israɛlla va biilu Mɛlɛka-o cɔu o pembei tullo maa yinnde bɛndu-bɛndu.

¹⁸ O kon, mí Moise luɛi o kumii ken nin, mó hel háá o pembei tullo. Mó tosa palɛi belehiɔɔlu a malɔ belehiɔɔlu o pembii ken coo.