Fulaa 23 - BII BILA

Tɔŋndo a dɛnɛ sandaa tosaa o kɔɔ

¹ «La sɛŋi sɔɔn lacòòvan te. La sim vana yɔŋ vɔɔndo kɔɔli mì la timbi seile lacòòvalen le ndu dio keo le.

² La del fàngà-kundaa kɔɔli le dɛnɛ vɔɔndo tosaa le. Taa veelu nɔm pɛ le seilen timbio o kɔɔsɔɔ, del fàngà-kundaa kɔɔli le toɲaa vionɔɔ le.

³ La sim vannda kɔɔli o còòlan coo o kɔɔsɔɔ nin te, hali o va vana bala fondoo.

⁴ Te la saalun pɛ naw luusian yaamɔɔ niaa o ba-o, te kon te sofɛlɛ ndɔ luusian ndu o ba-o, la cuu ndu ndu.

⁵ Te la komal pɛ sofɛlɛ yaamɔɔ niaa o delaa o volɔɔla lusulan bɛngu, la hiawnun mì la kɔɛnnun te, kɛ la mala yaamɔɔ niaa kon le sofɛlɛ ndɔ kon mingio isisi.

⁶ La dímì còòlan mì la ven di vana bala fondoo o kɔɔsɔɔ le.

⁷ La luei balan o sɔɔn lacòòvan nin te. La dii vana tɛɛmbuu isɔɔ loo le, la dii vana sandaa le. Kani ya Mɛlɛka, i ci vana tɛɛmbua tɔŋndo vana sandaa le.

⁸ La cɛl ɲɛm nda vanin niaa yɔngoo le niaa luɛyɔɔ nin-ndon te, kani ɲɛm vaa lende n suumiaa vanaa co cɔu-va, mì n laasiaa sɔɔn vanaa sandaa.

⁹ La luei mialaa co niaa o bɛngu coo-a mɔnɛi le, niaa pila sina mɛɛ calle o sumialle i kendu yɛ. Kani mialla niaa bɛɛ yɔŋnun o lɛŋnde Esipte len nin ni.»

Tɔŋndo le vɔsila pɛngiaalan a palɛi pɛngiɛi

¹⁰ «O vɔsilan tan ŋɔmpum bɛngu, la tiwba mì la vàá ciɛɔn niaan, mì la kow yɛiyun niaa saŋ-ndon.

¹¹ Kɛ o vɔsi ŋɔmmɛwndɔɔ, la bɛnda mì la ke yondoo pɛngio. Ɲɛ-ɲɛ vanaa ikɔɔa niaa tɛɛn a komal pɛ o ciɛɔn mun nin vɔsi kon, a dɔwnun balo a kon. Ɲɛ tɔ̀ nda mɛinin-ndo visia koma dɔwnun balo a kon. La tosa lende a nakɔla niaala n'rɛsɛnndan a á nakɔla niaala olivieelan.

¹² O palɛi ndii ŋɔmpum bɛngu, la tiwba mì la tosa baalala niaalan kpow. Kɛ o paale ŋɔmmɛwndɔlen coo, la bɛnda mì la tosa baala le, haliko mi navaa niaa a sofɛlɛa niaa sɔla pɛngio, mì poaa cɛa niaa laandua a mialaa co niaa o bɛngu coo-a sɔla vɛlɛ yoomuma sɛnɛi.

¹³ La bɛnda mì la bii sɔɔn ya dimul niaa-on kpow. La sooluu halaa celen te, la pial bɛɛ nda diolan te.»

Tɔŋndo a kafola bɛndulan tan yáá o kɔɔ

¹⁴ «O vɔsi oo vɔsi nin, la bɛnda mì la tosa kafolan tan yáá le ya Mɛlɛka biiloo.

¹⁵ La bɛnda mì la tosa kafo bulu toosian a lɛvɛn too. Mɛɛ ya dimul niaa le tosaa o telen kelun o paangii Abib-e nin-ndo yɛ, o palɛi ndii ŋɔmmɛw bɛngu, bulu toosian a lɛvɛn too niaa bɛnda ni mi la va dioo. Kani o paangii ken nin niaa faŋan o lɛŋnde Esipte len nin ni. Vana-vana bɛnda mò hun sim ya Mɛlɛka o hɔl bala fondo le.

¹⁶ La bɛnda vɛlɛ mì la tosa duɲɛi kafo koavaa telen niaa kandunin ɲɛm niaa vàá o ciɛɔn niaan nin-ndon kovɔɔ-o, ɲɛm tasen niaa koawnin-ndon pɛɛn. O vɔsio mɛɛlulan, la tosa vɛlɛ duɲɛi kafo lakùùo telen niaa ciinin ciɛɔn niaan kovɔɔ-o.

¹⁷ Bɛmbɛ leyáá o vɔsio nin, vanpiaandua kpow bɛnda mà hun sim Maalii o hɔl, ya Mɛlɛka pɛɛn.

¹⁸ La hun a bulu toosian a lɛvɛnndo-o telen niaa co va ya sálàla n'cɔlulan solullo-o le. La mándà cuɛima cɔlua nda co ya sálàlan solullo o kafola nilan coo-a-an háá diimandɔɔ idiiyo le.

¹⁹ La bɛnda mì la kɔɛ a ɲɛm tasen niaa koawnin o ciɛɔn niaan nin-ndon o Cɛi-Mɛlɛka Hala niaa nin. La yaw cuin cuaa o mɛɛma kala ndɔan nin te.»

Mɛlɛka yɔngu Israɛlla silalan le kɔla nda vanin-ndan

²⁰ «I co mɛlɛkanɔɔ vomɔɔ niaa laci le niaa mandaa nɛi-tɛɛn a le niaa yɔɔ o fonda ya bɛɛndial niaa-o.

²¹ La caa kelaa a ndu mì la bii ndu diom. La simul ndu le, kani te la tɛɛndan ndu pɛ, o melnin niaa haki le. Bau diola nilan la co ndu coo.

²² Kɛ te la bii pɛ sɔɛi ndɔɛi ɲɛkɛndɛi, mì la tosa sɔɔn ya dimul niaa le tosaa-on kpede, i siŋnunnin yaamɔɔ vanaa co niaa yaamɔɔlen tosallo-a, mì simul vanaa simulnin niaa-a.

²³ Kani mɛlɛkanɔ nuu vanin kɔlan niaa laci háá mo kɔ tiiya niaa o lɛŋnde Amoriia, Hitiia, Perisiia, Kanannda, Heviia a Yebusiia nin. Vanaa kan yɛ, i ciinin nda kpede.

²⁴ La sooluu halaa ndaa le, la baŋ vulan nda o labɛngunin te. La kélà mɛɛ nda co kela nɔɔlɛiyo yɛ le, kɛ la pesipesi piɔmaa ndaa, mì la koombiaa powta sálàla ndalan.

²⁵ Ya Mɛlɛka, ya co Hala niaa-o kínɛí niaa bɛnda le biiloo ni, haliko mi dɔw niaa duaa, mì yɔngu niaa ɲɛdiaa kɛndɛ-kɛndɔɔ a mɛnndan taw-taw, mì kanda niaa vɛlɛ le nààlan.

²⁶ O lɛŋnde niaalen nin, vanalanɔ oo vanalanɔ tembunin ipulu le, o kɛ́-kɛ̀ vanin vɛlɛ vana vialaa. Handɔɔ o kon coo, i yɔngunin niaa yoomu vilɛiyo.

²⁷ I co vanaa co icali niaa laci-a siòòŋii niɛi luei. Nɛɛ-nɛɛ niaa va pɛ luɛyɔɔ, i toawnin vanaa vanin niaa laci lon-nda. I vanin yaamɔaa niaa tovɔɔ mà va niaa ɲaanɔnndo.

²⁸ I co sunbungaa yɔɔ niaa laci, mà kɔ tow Heviia, Kanannda a Hitiia.

²⁹ Kɛ nduyɛ, i tuwnin nda niaa laci o vɔsi pilɛ bɛngu le, yɔŋii lɛŋnden le lo lemalnannden mì visia yondoa kui le niaa cɔlɔbaa.

³⁰ Lelan, o pɔm-pɔmbɔ ya vanin nda tovɔɔ niaa laci ni, haliko mi la lo kuiyo háá mì la tiwba le lɛŋnden kpow cuaa, mì la tiw lenin kpede.

³¹ I handunin pɛɛngula lɛŋnde niaalen cɔnɔnndo a mɛmma ihɛlma makpɛ̀ndɛ̀an, kɔ bii a mɛmma ihɛlma Filistia, kandɔnndo vɛlɛ a lɛŋnde veselɛilen Sinai, kɔ bii a pee bɛndoo Efrate. Kani i malnin vanaa co o tàndà kon nin-nda niaa o ba, mì la tow nda polon.

³² La yii kpema niaa ndaa le, la yii kpema a halaa ndaa le.

³³ La cɛl lɛ mà cal o lɛŋnde niaale len nin te, yɔŋii nda viom niaa hakio tosaa a ya Mɛlɛka, mì la sooluu halaa ndaa. Kani te la tosa pɛ lende, mɛɛ la haw o yaŋɔɔle ndalen nin.»