Fulaa 20 - BII BILA

Tɔŋnda tɔ́la Hala yɔngu Moise lan

¹ O kon, mí Hala soaa sɔɔn mun kpow, mó dimi aa:

² «Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni, lɛŋnde niaa va nin o cɛlen nin-nden.

³ Lelan, la bɛnda mi la sooluu halaa celen o ya kɔɔli le.

⁴ La selnun piɔmnda le. La tuula ɲɛ-ɲɛ le: o va ɲɛm co o halataala-on, o va ɲɛm co o lɛŋnden coo-on, o va ɲɛm co o mɛnndan nin o lɛŋnden bɛngu-on.

⁵ La baŋ vulan ɲɛm mun o labɛngunin te, la sooluu mun te. Kani ya Mɛlɛka Hala niaa, Hala paŋalaa ya co ni. I soaŋ cuavaa vanaa nɔ nɛyɔn nuu-a le hakila fuɲaa ndaa, i soaŋ cuavaa ndaa háá o lambi yàándɔɔ, háá o lambi hiɔɔlundɔɔ bɛɛ.

⁶ Kɛ vanaa kaola ya má bii tɔŋnda nilan-nda, i lo nda kɛndɛi tosallo háá o lambi vaa pilɛndɔɔ.

⁷ La pial diola Mɛlɛka Hala niaa o fondo fúúo coo le, kani vana pɛl pɛ diola ndɔlan o fondo fúúo coo, Mɛlɛka tuisi vana kon dɛnɛ palaa coo.

⁸ La loonun a paale pɛngiaalen mì la ce len maa lediandaalen le co ni.

⁹ La bɛnda mì la tosa baalaa o palɛi ndii ŋɔmpum bɛngu, mì la toosiaa kpekula niaalan kpow.

¹⁰ Kɛ paale ŋɔmmɛwndɔlen, paale pɛngiaale diandaale co le Mɛlɛka Hala niaa len le co len ni. La tosa baala oo baala o paale len coo le, kandɔɔ a niaa pila, poaa niaa, cuavaa niaa laandua, cɛa niaa piaandua a à laandua, cɔlua niaa, kɔ bii a mialaa co niaa o bɛngu coo-a.

¹¹ Kani o palɛi ndii ŋɔmpum bɛngu, mí Mɛlɛka cɔaw halataalaa, lɛŋnden, mɛmma ihɛllan a ɲɛm co lenin-ndon kpow, kɛ o paale ŋɔmmɛwndɔlen coo, mó pɛngi. Lelan ndu Mɛlɛka dɔw paale pɛngiaale len duaa ni mó dindi len.

¹² La ke fuɲaa niaa a kalaa niaa bɛɛlen, haliko mi la viow yoomu o lɛŋnde Mɛlɛka Hala niaa co niaa yɔngu len coo.

¹³ La dii vanacieo le.

¹⁴ La suunda le.

¹⁵ La yɔŋ levui le.

¹⁶ La tímbul caanda seile lacòòvalen te.

¹⁷ La fúla cɛi pilaa lehɔl te. La fúla lanɔ pilaa lehɔl te, la fúla cɛ piaandu pilaa, cɛ laandu pilaa, naw pilaa, sofɛlɛ pilaa lehɔl te. La fúla ɲɛ-ɲɛ co ɲɛ pilaa lehɔl te.»

¹⁸ Vannda kpow a va diom mataŋndo a diom bulu bɛndoo tueyɔɔ, a va piɔɔ cɔu volio iŋuanndi-ŋuanndiei a kumii bɛndu-bɛndui kumbu pembii ken mɔku-mɔku-e. Mɛɛ nda ce lende, má ɲiiya a siòònde, má sim kɔɔli-kɔɔli.

¹⁹ O kon má dimul Moise aa: «Nɔm pila soo nin o naa lo, mì n bii sɔɛi nɔmnde. Kɛ Hala soaa lɛ o naa lo sakpo le, yɔŋii naa n sɔla piɔ́mndo.»

²⁰ Mí Moise mulul nda aa: «La yɔŋ isiòòn te. Le niaa tɔɔndanndo Hala hin ni, haliko mi la nɔ bɛɛle ndɔlen, yɔŋii niaa tosa hakio.»

²¹ Mí vannda sim kɔɔli-kɔɔli, Moise ndu pilɛ kpé sɔɔnguu nɛɛ Hala va o tindile ikumnden nin-nda ni.

Tɔŋndo a fonda-loamaa-lasálà Mɛlɛka-o o kɔɔ

²² Mí Mɛlɛka dimul Moise sɔɔn mun le Israɛlla mun tɛɛngullo aa: «La ce mɛɛ ya lo o halataala mí soaa o niaa lo yɛ.

²³ La cɔaw piɔmnda a volin humbon a á sianion o ya kɔɔli, mì la kpɔnda nda biiloo a ya le.

²⁴ La ców ya fonda-loamaa-lasálàá a puuloo, mì la soli sálàla loamaala niaalan a sálàla kɔlɲulula niaalan lecoo, mì la soli vɛlɛ cɔlua niaa pɔmbɔa a navaa niaa sálàá lecoo. Fonda oo fonda ya cɔmnun niaa pɛ, i hin o niaa lo, i dɔw niaa duaa.

²⁵ Te la va pɛ ya fonda-loamaa-lasálàá cowvo a powtan, la cɔaw ndu a powta sialaalan te. Kani te la sɛl pɛ powtan a tuɛ̀ndɔɔ, mɛɛ powta lan la bɛnda lɛ le vali Mɛlɛka-o le.

²⁶ La cow ya fonda-loamaa-lasálà vana hel coo maa kpengba-o le, yɔŋii vanaa vanin helɔɔ lecoo-a lo helɔɔ lon mì vannda ce tum fondo ndaa.»