Fulaa 16 - BII BILA

Mɛlɛka dɔw Israɛlla balo a siasoa a á ɲɛdiaa nda veelu aa manne-o

¹ Mí Israɛlla kpow faŋan Elim, cɔnɔn ndaa Esipte, ndáà tosa nin paangei pilɛ a palɛi tɔ́ a iŋuɛɛnu, má tiiya o lɛŋnde veselɛilen Sin nin, le co Elim a Sinai tɛɛn-nden.

² Mí nda kpow soaa sɔɔn pɔmbɔn a Moise nda Aarɔn o lɛŋnde veselɛile len nin.

³ Má dimul nda aa: «Àá! Ndóò naŋ mì Mɛlɛka ndóò diw naa o lɛŋnde Esipte len nin, telen naa n vannun icali o kpɛɛnɛn naan va n'piaa a vision-ndon ikɛi-yo, telen kon ɲɛdiaa vannun naa o ba taw. Kɛ mí la kɔ faŋa naa lon le hunɔɔ a naa o lɛŋnde veselɛilen nden nin, haliko mi n hun cuu vu kpow a yiaan.»

⁴ O kon mí Mɛlɛka dimul Moise aa: «Tofa vɔ, i co niaa ɲɛdiaa tuisi coo fulaa o halataala. Vannda vanin fulaa lepalaa-lepala, mà va ndu cɔwviaa mɛɛ o tiw le paale len yɛ. I co vɔ nda tɔɔndan lende, haliko mi sina taa biinin silala nilan, te kon te taa biinin ndan te.

⁵ Paale ŋɔmpumndɔlen, taa bɛɛndiaa pɛ o nda cɔwviaanin ɲinkon-ndo, o vanin le o nda cɔwviaa lepalaa-lepala-o bɛmbɛ lediin.»

⁶ Mí Moise nda Aarɔn a dimul Israɛlla kpow aa: «Dɔ́ɔ́ cɔɛllɛn, la sinanin maa Mɛlɛka soli niaa o lɛŋnde Esipte len nin ni.

⁷ Nduyɛ siɔdii, la canin biilu Mɛlɛka-o vakpa. Kani ndu pila tuei niaa sɔɔn pɔmbɔn dimio a ndu. Bau yɛɛ naa naa n co yɛ mì la soo sɔɔn pɔmbɔn a naa?»

⁸ Mí Moise dimi aa: «La canin biilu ndɔɔ telen ndu Mɛlɛka yɔngunin niaa cɔɛllɛn vision le dioo-o, telen o yɔngunin vɛlɛ niaa ɲɛdiaa taw-taw siɔdii-o. Kani Mɛlɛka tuei sɔɔn pɔmbɔn niaa soo a ndu-on. Naa naa, yɛɛ naa n co yɛ? O co a naa le niaa soo sɔɔn pɔmbɔn te, kɛ a Mɛlɛka pila.»

⁹ O kon kɔɔli, mí Moise dimul Aarɔn aa: «Dimul Israɛlla kpow mà sɔɔnguu Mɛlɛka o hɔl, kani o tuei sɔɔn pɔmbɔn nda co sɔɛi a ndu-on.»

¹⁰ Tuma Aarɔn va sɔɛi o Israɛlla kpow lo-o, mí Israɛlaa kan muli hɔlla ba lɛŋnde veselɛilen, mí biilu Mɛlɛka-o cɔmnun nda o kumnde nin.

¹¹ Mí Mɛlɛka soaa o Moise lo, mó dimul ndu aa:

¹² «I tuei sɔɔn pɔmbɔn Israɛlla soo-on. Lelan, soo o nda lo mà dimul nda aa: ‹Cɔɛllɛn, la co vision dio, mì la de vɛlɛ ɲɛdiaa siɔdii. O kon la sinanin maa ya co Mɛlɛka ni, Hala niaa pɛɛn.›»

¹³ Icɔl kon, mí siasoa fula, má coŋ nda coo o dɔ́ɔ́ngɔ́ɔ̀ nin taw. Idiiyo, mí mɔ́mndo kɛsi kɛmndan kpungban o dɔ́ɔ́ngɔ́ nda kon balɔɔ pindo.

¹⁴ Mɛɛ kɛmma man ma vesa, mí ɲɔɔ pum lo lɛŋ o fonda kon maa n'bulubulu, vanáà ce ndu pɛ aa mɛnndan ma liimian kpungban pɔmbɔn ni.

¹⁵ Mɛɛ Israɛlla ce ɲɛ kon, má va ɲuunianndo vellaa-velle aa: «Yɛɛ nɛ co yɛ hoo?» Kani ndáà sina ɲɛ va kon-ndo le. Mí Moise dimul nda aa: «Ɲɛdiaa Mɛlɛka yɔngu niaa le dioo-o co hoo ni.

¹⁶ Lelan, ɲɛ ndu Mɛlɛka pila dimul niaa le tosaa-o co hoo ni: vana-vana cɔwviaa mɛɛ o nɔla mò pim yɛ. Vana-vana nɔla mò kɔndu le litilio lehiɔɔlu le ndu pilɛ, o kon mì la kɔndu mɛɛ vannda co o cɛi-kola-toandaa pilɔɔ nin yɛ.»

¹⁷ Mí Israɛlla tosa lende, mí a pum kɔandu hiovɔɔ mɛɛ Mɛlɛka dimi yɛ, a pum a tiiya kɔndɔɔ lende le.

¹⁸ Kɛ mɛɛ nda tuu o nda kɔndu-o, mí nda kpow a sɔla kpen-kpen. Vanaa kɔndu taw-va, ɲɛ hiw lecoo le. Vanaa suili kɔndɔɔ lende le-a, mí o ndaa sul lende kpafii. Mí vana-vana sɔla mɛɛ o nɔla mò pim yɛ.

Tɔŋndan a ɲɛdiaa manne-o o kɔɔ

¹⁹ Mí Moise dimul nda aa: «Vana-vana manda ɲɛ-ɲɛ le siɔdii le.»

²⁰ Kɛ a pum bii sɔɛi ndɔɛi le, má manda le diimandɔɔ. Mí càá luɛi o ɲɛ nda manda kon-ndo nin háá mó fula cun vɔɔndo kuí-kuí. O kon, mí Moise tambu kɔl a vanaa kan.

²¹ Idii oo idii, a va ɲɛdiaa kon cɔwviaa, vana-vana va cɔwviaa mɛɛ ndóò nɔla pumndo yɛ. Te paalen léè kendu pɛ, ndóò pɔya, ndóò tenga.

²² Paale ŋɔmpumndɔlen, má kɔandu mɛɛ nda dema kɔndɔɔ yɛ bɛmbɛ lediin. Mí vana-vana kɔandu le litilio leŋɔmaa. Mí vanaa lebolla nda tɛɛn a hun downun Moise kona.

²³ Mí Moise dimul nda aa: «Ɲɛ Mɛlɛka dimul naa kpéŋ-kpéŋ le tosaa-o co hoo ni: siɔdii, paale pɛngiaalen le co ni. Paale pɛngiaale dindin mí le kɛsin teengen le Mɛlɛka len le co len ni. Lelan, ɲɛdiaa niaa bɛnda le toosiaa o cɛi loamaa buloo nin-ndo, la toosiaa ndu hau, ɲɛdiaa niaa bɛnda le yawvo-o, la yaw ndu hau. O niaa nɔ vɛlɛ o kon kɔɔli-o bɛɛ, la manda ndu ɲɛkɛndɛi le siɔdii.»

²⁴ O kon, má manda ɲɛ tɔ̀u ɲɛkɛndɛi háá diimandɔɔ idiiyo maa mɛɛ Moise dimul nda yɛ. O nda manda kon-ndo, o fula cun te, càá luei vɛlɛ lenin te.

²⁵ O kon, mí Moise dimul nda aa: «La dio hau ɲɛ niaa manda-o, kani paale pɛngiaalen le co hau le Mɛlɛka ni. Lelan, la kɔ bɛɛ hau, la seelunnin ɲɛdiaa kalaa le.

²⁶ Kani o palɛi ndii ŋɔmpum bɛngu, la tiwba mì la cɔwviaa ndu, mì la de. Kɛ paale ŋɔmmɛwndɔlen, paale pɛngiaalen le co len ni, lelan la cinin ndu le.»

²⁷ Kɛ o nda tɛɛn, mí vannda pum a fula o paale ŋɔmmɛwndɔlen coo le kɔlan ɲɛdiaa kon cɔwviaa, kɛ a seelun ɲɛ-ɲɛ le.

²⁸ O kon mí Mɛlɛka ɲuna Moise aa: «Lɔ́ɔ́ kuɛɛ kpeekpei niaa bii yɛnin silala nilan a tɔŋnda nilan?

²⁹ La sina maa ya Mɛlɛka, i yɔngu niaa paalen le pɛngio, lelan ya yɔngu niaa ɲɛdiaa le palɛi ndii ŋiin o paale ŋɔmpumndɔlen coo ni. Le hee, o paale ŋɔmmɛwndɔlen coo, vana-vana bɛnda mò lo o cɛi-kola-toandaa ndɔɔ nin, vana-vana bɛnda mò fula o ndu lo le.»

³⁰ O kon mí nda kpow a pɛngi o paale ŋɔmmɛwndɔlen coo.

³¹ Mí Israɛlla ke ɲɛdiaa kon diolan aa manne (kon co dimio ni aa «Yɛɛ nɛ co yɛ hoo?»). Ndóò velan taw a kulun tɔlɔɔ koriandre, ɲɛdiaa kalaa yeelaa maa dɛɛ nda toaŋ a lɛan-ndo.

³² Mí Moise dimul nda aa: «Ɲɛ Mɛlɛka dimul niaa le tosaa-o co hoo ni: la kɔndu ɲɛdiaa ho litilio lehiɔɔlu, mì la manda ndu ɲɛkɛndɛi le cuavaa niaa imamaa fɛɛn-fɛɛn, haliko ma hun sina ɲɛdiaa ya yɔngu niaa le dioo telen ya soli niaa o lɛŋnde Esipte len nin-ndo-o.»

³³ Mí Moise dimul vɛlɛ Aarɔn aa: «Cua bonyei ma vow manne lenin letilio lehiɔɔlu, mà kɛsi ndu Mɛlɛka o hɔl, haliko mo va o mandaa kpáŋ le cuavaa niaa imamaa.»

³⁴ Maa mɛɛ Mɛlɛka pila dimul Moise ndi yɛ, mí Aarɔn kɛsi ndu o mandaa kɔ́dɔ́ o kesu kpemaa hɔl-ndɔ.

³⁵ O vɔsilan belehiɔɔlu bɛngu Israɛlla de manne ni. A lo ndu dioo háá má tiiya o pɛɛngulan a lɛŋnde Kanaan-nden.

³⁶ Fɔ mì vanáà tuu ɲɛ tuvaa ndáà tuu le sɔlaa litilio lehiɔɔlu-o tɔ́ malan ndóò pia ɲɛ tuvaa nda dema tuu-o ca.