Fulaa 15 - BII BILA

Israɛlla lisa Mɛlɛka o condei nin le baŋa o baŋa nda-o

¹ O kon, mí Moise nda Israɛlla soli condei he le Mɛlɛka lisaa aa: «I solinin condei le Mɛlɛka lisaa, kani o cɔm biilu ndɔɔ ceen vakpa. O miisuu soa a vanaa ɲaanun o soa coo-a o mɛmma ihɛlma makpɛ̀ndɛ̀an nin.

² Mɛlɛka co yoomuma nian a vana ya lisà-o ni. Ndu yɔŋnun vana ciindiaa nuu ni. Ndu co Hala nuu ni, i lisanin ndu. Ndu co Hala fuɲa nuu ni, i sangalanin ndu.

³ Kuubanɔ cɔw bɛndoo pila Mɛlɛka co ni, diolan ndɔla kpeekpeilan aa: ‹Mɛlɛka›.

⁴ O miisuu ɲɛla ɲaanannda Faraɔnnɔɔ, la soa nan-ndan a vanaa ndɔa cɔwva o mɛmma ihɛlma makpɛ̀ndɛ̀an nin. Vanaa ndɔa caa cɔwvo taw-taw-va lo o mɛmma ihɛlma makpɛ̀ndɛ̀an nin,

⁵ má toal o limndon nin di, mí mɛnndan má kumbu nda. A kɔ cal lɛŋ o peo kɔllo maa pow.

⁶ Mɛlɛka, ba nɔm kɛndɔɔ cɔm kpaaya nɔmndo. Mɛlɛka, ba nɔm kɛndɔɔ kposoŋa yaamɔaa nɔmnda.

⁷ A bɔɔbɔɔyɛi nɔmnde, má yɔliyɔli yaamɔaa nɔmnda, mí kɔl nɔm tuwvo loam nda, má ŋɔa mɛɛ foeende ŋɔa nuaa yɛ.

⁸ Mɛɛ n yoomu fúù, mí mɛnndan má diwnun kundalan, mí ma kiolu, mí tindian ma sim maa lakpaki. Mí mɛmma biiŋuanndan ma sim kpɛ́ o pee kɔllo.

⁹ Yaamɔaa naa ndáà cii nin dimi aa: ‹N kɔnnun nda kɔɔli, mì n kɔ biinun nda. N kɔ puunun nda ɲɔɔn o laba a paa-kala, mì n dennun mun háá mì n pimnun kukúú. N solin mɔɔn cɔwvon mì n kɔ diwnun nda.›

¹⁰ Kɛ nɔm Mɛlɛka, mɛɛ n hɔŋ hoeyii nɔmnde, mì mɛnndan ma kumbu nda kpow, má mɔɔva o mɛmma ihɛlma yingilan nin maa ciliŋii dingɛn.

¹¹ Mɛlɛka, hala kuɛɛ co yɛ maa nɔm o halaa tɔ̀a tɛɛn? Nɛ̀ɛ́ co yɛ o diandaa maa nɔm? Kpúlúnkùma tosa sɔɔn tɔ́ɔ́ bɛndon-ndo n co ni. Nɛ̀ɛ́ tosà yɛ kaamaalan maa nɔm?

¹² Mɛɛ n siɛndi baa, mí lɛŋnden le mial yaamɔaa naa.

¹³ Le tùú n lò o lediom coo-o, má sim yungu n baŋa hoo-o laci. Má yaa nda o calta nɔmnda diandaalan a kpaaya nɔm bɛndoo.

¹⁴ Vanaa-mangalaa-isɔɔa tuei dɛnɔɔ ho, má ɲiiya a siòònde. Misìmisí bɛndu-bɛndoo bii vanaa co icali Filistii-a.

¹⁵ Simlacia Edɔm bɛɛ a yɔŋnun yulan-yulan a siòònde. Kɔltan la hiilun cuavaa lemasaa Moab nin voku-voku. Vanaa co icali Kanaan-nda bɛɛ fula mayoomu.

¹⁶ Siòònde a kɔl pulan-pulanndo tol nda kpow coo. Mɛlɛka, a kpaaya nɔm bɛndoo, ma mingi nda maa pow háá mí yungu nɔmndo cuu hiovɔɔ, yungu n sɔla-o pɛɛn.

¹⁷ A co lakɔ a nda, ma kɔ tɔl nda o pembii nɔmii kɛ́i coo, o fonda n bɛɛndiaa mò va calta nɔmndan-ndo pɛɛn. Òó Mɛlɛka! A co nda yɔɔ háá o cɛi-kola-toandaa diandaa n tangul-lo nin.

¹⁸ Mɛlɛka co masaa le fɛɛn a fɛɛn ni.»

¹⁹ Mí soa Faraɔnnɔɔ, ɲɛla ɲaanannda ndɔla soa nan-ndan a vanaa ɲaanun soa-a kpow a lo o mɛmma ihɛllan nin. Mí Mɛlɛka ɲindu nda mɛnndan coo, kɛ mí Israɛlla nda taŋnun a pelon n'vesɛi sɛ́ɛ́n.

²⁰ Mí Miriam, yemaa Aarɔn, ó va vanalanɔ-tɛɛngaa-diom Hala-o-o cua dundoo, mí vanlaandua tɔ̀a kpow a fula ndu kɔɔli a dundulan lɔɔ a á yolan.

²¹ Mí Miriam cua condei aa: «La lisa Mɛlɛka o condei nin, kani o cɔm biilu ndɔɔ ceen vakpa. O miisuu soa a vanaa ɲaanun o soa coo-a o mɛmma ihɛlma makpɛ̀ndɛ̀an nin.»

CƆNƆNNDO O MƐMMA IHƐLMA MAKPƐ̀NDƐ̀AN LE KƆLAN O PEMBEI SINAI (15—18) Israɛlla kol mɛnndan Mara

²² Mí Moise faŋan a Israɛlla o mɛmma makpɛ̀ndɛ̀ma man ikɛi, má kɔa a ba lɛŋnde veselɛilen Sur. Má kɔa o lɛŋnde veselɛile len nin háá palɛi ndii yáá, a ci mamɛn te.

²³ Má tiiya Mara, má komal mɛnndan ndon, kɛ a nɔla man kolɔɔ le, kani maa lol bɔɔ. Lelan nda ke fonda kon diolan ni aa Mara (kon co dimio ni aa «Ɲɛ loloo»).

²⁴ O kon, má soaa sɔɔn pɔmbɔn a Moise, má ɲuna aa: «Yɛɛ naa n co yɛ niko kolɔɔ?»

²⁵ Mí Moise piɛi Mɛlɛka, mí Mɛlɛka cɔm ndu yɔmndo súúo pum. Mí Moise mal yɔm kon o mɛmma man nin, mí ma muungu makɛndɛ le kolɔɔ. Lon Mɛlɛka yɔngu nda silalan ni, mó cɔm nda ɲɛ nda bɛnda le tosaa-o. Lon koni o tɔɔndan nda vɛlɛ ni.

²⁶ Mí Mɛlɛka dimul nda aa: «Te la bii pɛ diom nuu, ya Mɛlɛka, ya co Hala niaa-o, te la kela pɛ kela sandaa ya o hɔl, te la yaŋ pɛ nilan o silala nilan mì la bii lan kpow, i tuisinin niaa nààla ya tuisi Esiptea coo lan coo le, hali naa vaa lende o pilɛ o tulnin niaa coo le. Kani ya co Mɛlɛka ni, ya nɔ siongɔɔ niaa o ba ni.»

²⁷ O kon mí Israɛlla tiiya o lɛŋnde Elim-nden nin, má komal peela leboltan tɔ́ a latiɔn a vawvan belaŋɔmmɛw lon. Má kila dɔ́ɔ́ngɔ́ɔ̀ lon o mɛnndan ikɛi.