Fulaa 14 - BII BILA

Faraɔnnɔɔ kuel Israɛlla le nda biyɔɔ

¹ Mí Mɛlɛka soaa o Moise lo, mó dimi aa:

² «Soo o Israɛlla lo, mà dimul nda aa a mùùngú mà kila dɔ́ɔ́ngɔ́ɔ̀ Pi-Hahirɔt ikɛi, Mikdɔl a mɛmma ihɛllan tɛɛn. Lon niaa bɛnda ni mi la kila dɔ́ɔ́ngɔ́ɔ̀, Baal-Sefɔn o hɔl-ndɔ sakpo, o mɛmma ihɛllan dangalaa.

³ Faraɔnnɔɔ co dimi aa ‹Israɛlla pɔw nɛiyo má laasian o tàndà kon nin, a co hiŋnɔnndo a siòònde o lɛŋnde veselɛilen nin›.

⁴ I co ndu nilan kindi háá mò cɛn le niaa kuello. Kɛ i co kei a ndu pila a á vanaa ndɔa cɔwva mì cɔm biilu nuu, mì Esiptea kpow a sina maa ya co Mɛlɛka ni.» Mí Israɛlla tosa mɛɛ Mɛlɛka dimul nda yɛ.

⁵ O kon mí vannda dimul masaa Esipte maa Israɛlla ɲaanun. Mɛɛ Faraɔnnɔɔ nda vanaa ndɔa baalaa a tuei lende, má cua yiyan vɔɔndo a nda, má dimi aa: «Yɛɛ nɛ naa n tosa yɛ hoo? Le yɛɛ naa n mal-lɛ Israɛlla kɔnndan? Vɛ̀ɛ̀ vanaa va naa vallo tosallo-a kɔɛnnun te?»

⁶ O kon mí Faraɔnnɔɔ baa ɲɛ ɲaanan ndɔ soa nan-ndo o sow, mó cuungiaa vanaa ndɔa cɔwva.

⁷ O kon kɔɔli, mó cua ɲɛla ɲaanannda soa nan-ndan o lɛŋnde Esipte len nin kpow, o lan tɛɛn la hiow naŋɔɔ lan la va kɛmɛ leŋɔmpum, a vanaa caa soa ɲaanɔnndo taw-va lenin.

⁸ Mí Mɛlɛka kindi Faraɔnnɔɔ, o co masaa Esipte-o nilan háá mó can Israɛlla kuello le nda biyɔɔ. Nduyɛ, a ba nda bɛɛn-bɛɛn Israɛlla faŋan o lɛŋnde Esipte len nin ni.

⁹ Esiptea lo nda kuello a soa, a ɲɛla ɲaanannda Faraɔnnɔɔ, la soa nan-ndan, a vanaa ndɔa caa soa ɲaanɔnndo-a, má kɔ bendal nda nɛɛ ndáà kila dɔ́ɔ́ngɔ́ɔ̀ Pi-Hahirɔt ikɛi-ya, Baal-Sefɔn o hɔl-ndɔ, o mɛmma ihɛllan dangalaa.

¹⁰ Faraɔnnɔɔ va hunɔɔ a sɔɔnguuo nda macɛlu tuŋ. Mɛɛ Israɛlla muli hɔlla, má ca Esiptea nda hinullo. Mí siòòŋii bɛndu-bɛnduei bii nda, má koŋul o Mɛlɛka lo kpélén.

¹¹ O kon kɔɔli, má mululun Moise, má dimul ndu aa: «Sɛila bɔɔ la co macoaa Esipte le? Le yɛɛ nɛ n hin yɛ a naa le piɔ́mndo sɔlaa o lɛŋnde veselɛilen nden nin? Le kɔlɔ yɛɛ n soli yɛ naa o lɛŋnde Esipte len nin?

¹² Le hee naa n dimul nɔm telen naa n va vɔ lon-ndo ni aa mal naa mì n vannun cɛa Esiptea. Kani Esiptea vaa o ba o cɛlen nin co fisa le naa a piɔ́mndo sɔlaa o lɛŋnde veselɛilen nin.»

¹³ Mí Moise mulul nda aa: «La yɔŋ isiòòn te. La sim yili mì la mɛɛndan. La canin hau mɛɛ Mɛlɛka co niaa ciindiaa yɛ. Esiptea niaa co haa cɔu sisa-a, la ci lɛnin nda le fɛɛn a fɛɛn te.

¹⁴ Mɛlɛka co cɔlɔba le niaa. Lelan, niaa la simnun yili.»

Mɛlɛka kumbi nɛiyo o mɛmma ihɛllan tɛɛn

¹⁵ Mí Mɛlɛka ɲuna Moise aa: «Le yɛɛ n co yɛ deŋio ho o ya lo? Dimul Israɛlla mà bii nɛiyo le kɔlan.

¹⁶ Nɔm pila yɛ, heelu tinda nɔmndo coo, siɛndi baa o mɛmma ihɛllan coo ma tɛnda man tɛɛn, haliko mi Israɛlla taŋ leeloo a pelon n'vesɛi sɛ́ɛ́n.

¹⁷ Ya yɛ, i co Esiptea nilan kindi háá mà tol le taŋɔɔ niaa kɔɔli. O kon, i co kei a Faraɔnnɔɔ a á vanaa ndɔa cɔwva kpow, ɲɛla ɲaanannda ndalan a vanaa ndɔa ɲaanun o soa coo-a, mì cɔm biilu nuu.

¹⁸ Te i soli pɛ mɔnɛ lende a Faraɔnnɔɔ, a ɲɛla ɲaanannda ndɔla soa nan-ndan a á vanaa ɲaanun o soa coo-a, mì soli biilu nuu o nda nin, Esiptea kpow sinanin maa ya co Mɛlɛka ni.»

¹⁹ Mí mɛlɛkanɔ Hala va kɔlan o dɔ́ɔ́ngɔ́ Israɛlla laci-o faŋan laci, mó muungu kɔlan o dɔ́ɔ́ngɔ́ɔ̀ a makɔɔ. Mí tindile ikumnden bɛɛ le faŋan nda laci, mí le muungu nda a makɔɔ.

²⁰ Mí le hun sim o dɔ́ɔ́ngɔ́ Esiptea hun kila-o a o dɔ́ɔ́ngɔ́ Israɛlla va nin-ndo tɛɛn. Tindile ikumnde len le va kpengei pilɛi ɲumndan kpengei pilɛi pangeloo le ɲumndan teengiaa. Lelan, háá mí paalen le sia, vanaa va o dɔ́ɔ́ngɔ́ Esiptea nin-nda nɔla sɔɔnguuo o dɔ́ɔ́ngɔ́ Israɛlla ikɛi le, Israɛlla bɛɛ a nɔla sɔɔnguuo o dɔ́ɔ́ngɔ́ Esiptea ikɛi le.

²¹ Mí Moise siɛndi baa o mɛmma ihɛllan coo, mí Mɛlɛka cua hoeyii fùkù-fùkùi bɛndu-bɛnduei a ba paalen le can-ndo, mó cuu ndi o mɛmma ihɛlma man coo. Mí hoeyii ken lɔl hɔŋndo pii, mí i hiiluu mɛnndan yongban-yongban, mí i veesiaa man háá mí ma kiolu tɛɛn.

²² Mí Israɛlla toal o pee kɔ́llo, pee kalaa vannun o vesɛi sɛ́ɛ́n. Mí mɛnndan ma siŋnun yɛ́ndɛ́lan maa lakpaki o ba mɛl ndaa a o ba kɛndɛ ndaa coo.

²³ Mí Esiptea toal le taŋɔɔ nda kɔɔli, kandɔɔ a soa Faraɔnnɔɔ, ɲɛla ɲaanannda ndɔla soa nan-ndan, kɔ bii a vanaa ɲaanun o soa coo-a.

²⁴ Kɛ nduyɛ, a paale siaalen, mí Mɛlɛka tofa dɔ́ɔ́ngɔ́ Esiptea o tindile ikumnde va vɛlɛ tindile leyinnden-nden nin, mó hiŋ nda hɔlla, mó puusiaa nda.

²⁵ Mó ŋɔaw bɛngula ɲɛla ɲaanannda ndala soa nan-ndan, mí la lusul lusullo pila háá mí kɔlan la lɛngɛla nda o ba. O kon mí Esiptea dimi aa: «N ɲaanun mì n faŋan Israɛlla kɔɔli, kani Mɛlɛka cɛn naa Esiptea cɔlɔbaa le nda.»

²⁶ Mí Mɛlɛka dimul Moise aa: «Siɛndi ba nɔmndo o mɛmma ihɛllan man coo, haliko mi mɛnndan ma mɔwviaa Esiptea, ɲɛla ɲaanannda ndala soa nan-ndan a vanaa ndaa ɲaanun o soa coo-a.»

²⁷ Mí Moise siɛndi ba ndɔɔ o mɛmma man coo. A paale siaalen, Esiptea ndáà cɛn nin le ɲaanɔnndo le kɔnndan, mí mɛnndan ma muungu o fonda ndɔɔ, mí Mɛlɛka miisuu nda lenin.

²⁸ Mí mɛnndan má hun kumbu ɲɛla ɲaanannda soa nan-ndan a vanaa ɲaanun o soa coo o vanaa cɔvaa Faraɔnnɔɔ-a tɛɛn kpow. Kani ndáà tol o peelo kpede le taŋɔɔ Israɛlla kɔɔli. Hali o pilɛ lo yoomu le.

²⁹ Kɛ mí Israɛlla va kɔnndan a vesɛi sɛ́ɛ́n o mɛmma ihɛlma man tɛɛn, mí mɛnndan ma siŋnun yɛ́ndɛ́lan maa lakpaki o ba mɛl ndaa a o ba kɛndɛ ndaa coo.

³⁰ Ɲinkon, mí Mɛlɛka ciindiaa Israɛlla, mó baŋa nda Esiptea o ba, mí Israɛlla ca Esiptea a vílɛ́iya o mɛmma ihɛlma man dangalaa.

³¹ Mí Israɛlla ca ɲinkon ba kpaaya bɛndu Mɛlɛka timbi mó tɛɛmbuu Esiptea-o, má yɔŋ siòòŋii ndɔɛi, má laalan ndu Mɛlɛka, má laalan vɛlɛ Moise, vana baala Mɛlɛka-o pɛɛn.