Fulaa 12 - BII BILA

Kafo-hiavaa-coo

¹ Tuma nda va vɔ kon o lɛŋnde Esipte len nin-ndo, mí Mɛlɛka dimul Moise nda Aarɔn aa:

² «Paangii niaa co hee nin-nde vanin paangii tasei o vɔsio nin le niaa ni. Ndi bɛnda ni mì i kandu vɔsio.

³ La kɔ dimul Israɛlla maa te paangei he tiiya pɛ palɛi tɔ́, yungu oo yungu bii saa téndóó, te kon te cuin téndóó o pilɛ, cɛi oo cɛi bii vɛlɛ saa téndóó, te kon te cuin téndóó o pilɛ.

⁴ Te yungulen lepum le dɔɔnan pɛ le saa téndóó, te kon te le cuin téndóó ciiyo sɔmndo, vanaa co lenin-nda mɔsɔŋan nda yungule co nda ikɛi len, a tofa mɛɛ vannda co lenin yɛ, a hɛli cɔloo mɛɛ vana-vana tiwba le dioo yɛ.

⁵ A bɛnda ma bii saa téndé, te kon te cuin téndé piaandu nɔ lenamta loo, o nɔ vɔsio pilɛ-o.

⁶ A bɛnda mà manda ndu háá o paale tɔ́ a lehiɔɔlundɔle paangii ken. A paale delaalen ɲinkon, Israɛlla kpow, yungu oo yungu kelu cɔlu nda hɛli-o bololan.

⁷ A cii pɛ, a cua kooma ndɔan mapum, a suu man o kpengun miuŋun kèédei coo a ba luaŋ-ndo, o cɛi oo cɛi nda dianin cɔlu kon nin.

⁸ A bɛnda mà tuɛi visin mun, mà de mun icɔl kon a bulu toosian a lɛvɛn too a á bil loloo.

⁹ A dia visin mun n'kiyɛiyon, te kon te n'yavan te. A bɛnda mà tuɛi mun kpow, kandɔɔ bolle cɔlu kon, bɛngula ndɔlan, kɔ bii a ɲɛm co ndu nin-ndon kpede.

¹⁰ À manda ɲɛ-ɲɛ le diimandɔɔ le. Te ɲɛ lɔl pɛ kuya, a pena ndu lomɔɔ idiiyo.

¹¹ Mɛɛ niaa bɛnda le ɲɛdiaa kon dioo yɛ co hoo ni: la bɛnda mì la kandan yáwlen o caŋ, mì la vownun samtalan o n'pelu, mì la bii tindala niaalan o laba. La bɛnda mì la de ndu cɔ́-cɔ́ le kɔlan. Nuaa niaa bɛnda ni mi la tosa kafo-hiavaa-coo le ya Mɛlɛka.

¹² Icɔl kon, i keinin o lɛŋnde Esipte len tɛɛn, mì poaa tasea a cɔlua piaandua tasea Esipte kpede a sɔla piɔ́mndo, kandɔɔ a poaa tasea vanndacieea, kɔlan tiiyaa a cɔlua piaandua tasea cɔlua kom-nda. Mɛɛ nuaa ya kialunin halaa nda co sooloo Esipte-a iyama ni. Ya co Mɛlɛka ni.

¹³ Le niaa Israɛlla yɛ, kooma cɔlua niaa suunin o cɛilan-ndan ma vanin tɔɔmaseloo ni maa la co o cɛila lan nin. I ce pɛ kooma man, i hiow niaa coo. O kon, kpundɛ tɛɛmbua n'cuaw ya co kon tuisi Esiptea coo-o pilannin niaa le.

¹⁴ Le fɛɛn a fɛɛn, kandɔɔ a niaa pila, kɔ bii a cuavaa niaa imamaa, la bɛnda mì la tosa kafo bɛndoo le ya Mɛlɛka biiloo, haliko mi la va loonɔnndo a dɛnɛ kon o kɔɔ.»

Kafo bulu toosian a lɛvɛn too

¹⁵ «O palɛi ndii ŋɔmmɛw bɛngu, la bɛnda mì la va bulu toosian a lɛvɛn too dioo. Paale tasele lɔ́ɔ́ kon le tiiya dɔ́ɔ́ pɛ, la soli lɛvɛnndo o cɛila niaalan nin few-few. Kandɔɔ paale tasele len, kɔ bii paale ŋɔmmɛwndɔlen, te vanndo de pɛ bulu toosian a lɛvɛnndo-o, a bɛnda mà faŋa vana kon Israɛlla tɛɛn.

¹⁶ La bɛnda mì la cuungian le kaanden tosaa o paale taselen a o paale ŋɔmmɛwndɔlen coo. La tosa baala celen o palɛi ken coo le, fɔ le ɲɛdiaa niaa yawvo kínɛí.

¹⁷ La tosa kafo bulu toosian a lɛvɛn too ho le loonɔnndo maa paale len ya soli yungula niaalan a kundalan o lɛŋnde Esipte len nin ni. Le fɛɛn a fɛɛn, kandɔɔ a niaa pila, kɔ bii a cuavaa niaa imamaa, la bɛnda mì la loonun a dɛnɔɔ ho. Tɔŋ niaa bɛnda mì la bii-o co hoo ni:

¹⁸ Te paangii tasei tiiya pɛ palɛi tɔ́ a ihiɔɔlu, kandɔɔ a paale yɔngannden ɲinkon, háá o paale bidiin a lepilɛndɔlen icɔllo, la bɛnda mì la va bulu toosian a lɛvɛn too dioo.

¹⁹ O palɛi ŋɔmmɛvii ken bɛngu, lɛvɛnndo bɛnda mò va niaa o laba cɛilan nin te. Te vanndo de pɛ ɲɛdiaa toosian a lɛvɛnndo-o o palɛi ken bɛngu, o va mial, o va Israɛlnɔ pilaciee, o bɛnda mò faŋan Israɛlla tɛɛn few-few.

²⁰ Mɛɛ lelan, la dia ɲɛ toosian a lɛvɛnndo-o o palɛi ken nin te. Fonda oo fonda niaa va pɛ icali, la dia bulu toosian a lɛvɛnndo-o o palɛi ken nin te.»

Israɛlla toosiaa ɲɛdiaa kafo-hiavaa-coo

²¹ Mí Moise veelu kaasoŋaa kɔlkalua o Israɛlla tɛɛn, mó dimul nda aa: «La kɔ mì la kɔ bii saa téndéa, te kon te cuinaa téndéa le yungula niaalan, mì la kelu nda bololan le kafo-hiavaa-coo.

²² La dii pɛ cɔloo, la cua pei bil hisɔp, la yin ndi o kooma cɔlu kon nin o taalaa nin, la suu man o kèédei coo a o koŋndo lenin a lekɔɔli. Háá mì paalen le sɛ, vana-vana fúlà o ndu lo cɛinin te.

²³ Mɛlɛka co hunɔɔ Esiptea yɛɛvɛ dɔvɔɔ, kɛ te o va pɛ hiovɔɔ mò ce koovan o koŋndo a o kèédei coo, o hiownun. O kon, kpundɛ kon tulnin niaa coo o cɛila niaalan nin te.

²⁴ Kandɔɔ a niaa pila, kɔ bii a cuavaa niaa imamaa, la bɛnda mì la bii tɔŋndo ho le fɛɛn a fɛɛn.

²⁵ Te la tiiya pɛ o lɛŋnde Mɛlɛka yiilu niaa kpemaa le niaa len yɔngoo len nin, la tosa kafoo ho.

²⁶ Te cuavaa niaa ɲuna pɛ niaa aa: ‹Le kɔlɔ yɛɛ niaa co yɛ kafoo ho tosaa?›

²⁷ La mulul nda aa: ‹Sálàá ho naa n solúl Mɛlɛka o paale kafo-hiavaa-coo len coo ni. Kani telen naa Israɛlla n va o lɛŋnde Esipte len nin-ndo, mí Mɛlɛka tuisi Esiptea kpundɛ piɔ́mndo coo. Kɛ mɛɛ o tiiya o cɛila naalan, mó hiawnun, o sim mò tuisi naa a yungula naalan kpundɛ kon coo le.›» O kon, mí Israɛlla baŋ vulan Mɛlɛka o labɛngunin, má biilu ndu.

²⁸ O kon kɔɔli, má kɔa, má kɔ tosa ɲɛ Mɛlɛka dimul Moise nda Aarɔn-ndo.

Kpundɛ mɛɛlaa: piɔ́m poaa tasea a cɔlua piaandua tasea Esiptea

²⁹ Mɛɛ di-tɛɛndo tɛnda, mí Mɛlɛka lɔaa poaa tasea o lɛŋnde Esipte len nin kpow: kandɔɔ a po tase Faraɔnnɔ va masalen tosaa Esipte-o, kɔ bii a po tase vana kaaso va o kindaa-o, a cɔlua piaandua tasea.

³⁰ Icɔl kon, mí Faraɔnnɔɔ can a vanaa ndɔa baalaa, a Esiptea kpow, má koŋul koŋullo pila. Kani o cɛi oo cɛinin, mí biisio yɔŋnun.

³¹ Le hee, mí Faraɔnnɔɔ veelu Moise nda Aarɔn o ɲumma man nin, mó dimul nda aa: «La cɔn mì la kɔɛ. La faŋan o lɛŋnde nilen nin few. La kɔndu Israɛlla mì la kɔɛ a nda. La kɔ biilu Mɛlɛka mɛɛ niaa dimi yɛ.

³² La cua vɛlɛ cɔlua niaa kpede mɛɛ niaa dimi yɛ, mì la kɔɛ a nda. Ya bɛɛ la dɔw ya duaa.»

³³ Mí Esiptea tisa Israɛlla kɔɔli le faŋanndo o lɛŋnde ndalen nin, kani nuaa nda va dimio ni aa: «Naa kpow cuuo naa n co nuaa ni.»

³⁴ Lelan, mí Israɛlla kɔannun a dɛɛ ndáà linda-o, o ndáà dow-vɔ lɛvɛn nin too. Má cua ciliŋun nda linda buloo nin-ndon, má yii mun a domala ndala bɛndulan fiso, má siilun o lacongú.

³⁵ Má tosa ɲɛ-ɲɛ Moise dimul nda, má piɛi Esiptea ɲɛm cɔwnun a sianion-ndon, ɲɛm cɔwnun a volin humbon-ndon a volɔɔla cuɛinanndan.

³⁶ Mí Mɛlɛka yoola mí Esiptea ca Israɛlla ɲia taw, má ke nda ɲɛm mun. Lende nda yunga Esiptea ni cúcúú.

Israɛlla faŋan Esipte

³⁷ O kon, mí Israɛlla faŋan Ramsɛs ciee le kɔlan Sukɔt, a va vanpiaandua vaalan kɛmɛ leŋɔmpum, a cɔm cuaambɔa, vanlaandua a vanaa yuuvɛiya le.

³⁸ Mí vanaa-mangalaa-isɔaa súúla celen a del nda kɔɔli telen nda va kɔnndan-ndo, má kɔa nda ndaa latulu. Má kɔa vɛlɛ a cɔlua ndaa, cɔlua kan va kunda taw: saa, cuinnda a nawva.

³⁹ Má loam bulu toosian a lɛvɛn too a dɛɛ lindaa nda cɛn Esipte-o, kani telen nda tow nda le faŋanndo o lɛŋnde Esipte len nin-ndo, ndáà vow vɔ lɛvɛnndo o dɛɛ kon nin te. Lelan, a tamala lɛ le faŋanndo lon te, hali ɲɛm dian a nɔla lɛ mun toosiaa le keiyo dioo nɛi-tɛɛn te.

⁴⁰ Israɛlla tosa vɔsilan kɛmɛ lehiɔɔlu a beleyaa o lɛŋnde Esipte len nin.

⁴¹ Mɛɛ vɔsila lan la ciŋa kɛmɛ lehiɔɔlu a beleyaa, mí vanaa Mɛlɛka-a fula o lɛŋnde Esipte len nin paale loonannde len kpeekpei.

⁴² Maa mɛɛ Mɛlɛka lɔl ɲinkon lahɔl le cuavaa ndɔa solio o lɛŋnde Esipte len nin yɛ, le fɛɛn a fɛɛn, te paale len le tiiya pɛ, Israɛlla bɛɛ bɛnda mà lɔl lahɔl. Kani le Mɛlɛka biiloo ɲumma man ma solin sálà ni.

Tɔŋndo le kafo-hiavaa-coo tosaa

⁴³ Mí Mɛlɛka dimul vɛlɛ Moise nda Aarɔn aa: «Tɔŋndo le kafo-hiavaa-coo co hoo ni: mial oo mial bɛnda mò sɔɔnguu le ɲɛdiaa kafo kon dioo le.

⁴⁴ Cɛa nda pendu-a nɔla mà de ɲɛdiaa kon, kɛ fɔ mà dii fɔlɔn toomaa.

⁴⁵ Mial hin calle niaa tɛɛn-ndo, te kon te vana co baalaa tosaa le sala ndɔɔ sɔlaa-o bɛnda mò de ɲɛdiaa kon te.

⁴⁶ Cɛinin kínɛí niaa bɛnda ni mi la de visin ɲɛdiaa kafo kon, vana fula a mun o bɛ́ɛ̀ le. Vana pel paa cɔlu kon te.

⁴⁷ Mɛɛ Israɛlla co sɛ́lɛ́ kpow, vana-vana bɛnda mò tosa kafo kon.

⁴⁸ Te mial co icali niaa o bɛngu coo-o yeema pɛ le kafo-hiavaa-coo kon tosaa le Mɛlɛka biiloo, fɔ mì vanpiaandua o yungule ndɔlen nin kpow a dii fɔlɔn toomaa. O kon kɔɔli, o nɔla niko mò sɔɔnguu le kafoo tosaa maa Israɛlaa tɔ̀a. Te vanndo dii toomaa le, o dia le.

⁴⁹ Tɔŋndo ho co le cuavaa pilacieea Israɛl, o co vɛlɛ le mialaa hin calle niaa o bɛngu coo o lɛŋnde niaalen nin-nda.»

⁵⁰ Mí Israɛlla kpow a tosa ɲɛ Mɛlɛka dimul Moise nda Aarɔn le nda tɛɛngullo-o.

⁵¹ Paale len kpeekpei Mɛlɛka soli nda o lɛŋnde Esipte len nin a kundalan ni.