Filipea 4 - BII BILA

¹ Lelan puapilɛa nia hɛnan ya-a, yeemɛi co ya le niaa cɔw vɛlɛ. Niaa co ɲaale nuu a bɛɛle nilen ni. Lelan, caaŋaa nia hɛnan ya taw-va, la lo lende yili o Maalii nin.

Congɔnndan a silala yɛ́-yɛ́lan

² I co Evodi nda Sɛntis ɲɔɔlu le yiyan pilɛ nda nɔ o Maalii nin-ndo.

³ Nɔm vana naa n co baalaa latulu ɲɛkɛndɛi-yo bɛɛ, i co nɔm dimul mà mala vanlaandua ŋiɔŋaa kan. Kindinndo pila nda co le Yoongu kɛndɔɔ yondaa naa ndaa a Kileman a caaŋaa naa tɔ̀a naa n va vallo latulu-a ni. Caaŋaa naa diola ndalan la co lasɛvaalan o sɛbɛ cindaa nin-nda pɛɛn.

⁴ La dɔwnun ɲaale lɔ́ɔ́-lɔ́ɔ̀ o Maalii nin, mì tɔla vɛlɛ dimi, la dɔwnun ɲaale.

⁵ Màá vannda kpow a sínà vanakɛndɛyɛi niɛi. Maalii co nin le hunɔ̀ɔ̀.

⁶ La buulan le ɲɛ-ɲɛ le, kɛ o dɛnɛ oo dɛnɛ nin, la cɔm Hala balahavɛila niaalan o piɛilen nin a o tɛɛlɔnndo nin a kɔl sinaa ikɛndɔɔ.

⁷ O kon mì kɔlɲulu Hala-o, o hiow kɔlkalu kɛ́-kɛ̀-o manda kɔlta niaalan a yiyannda niaalan o Yeesu Krista nin.

⁸ Le sɔɔn tɔ̀un yɛ puapilɛa nia, la va kɔllo keelaa o dɛnndan ndan coo: dɛnnda toɲa lan kpow, dɛnnda lebɛɛlan kpow, dɛnnda sandaalan kpow, dɛnnda diandaa lan kpow, dɛnnda vannda hini kɔltan-ndan kpow a dɛnnda vanà sɔlà lisaa lan kpow.

⁹ La kelà o dɛnnda niaa pɛɛku ya o ba lan coo, dɛnnda niaa sɔla mì la tuɛi lan, a dɛnnda niaa ce ya o ba lan. O kon Hala kɔlɲuloo vanin niaa ikɛi.

Pol mel Filipea balika le ɲɛm nda yɔŋ ndu-on

¹⁰ I naŋ kɔl taw le yiyan sɛnɛi niaa sɔla vɛlɛ le ya o Maalii nin-ndo. I sínà maa niáà nɔ ya kɔllo coo, kɛ niáà nɔ vɔ mɛɛ niáà cɔm ndi o dɛnɛ nin te.

¹¹ O co le mɛɛ ya co o bahavɛiyo nin yɛ le ya co sɔɛi nuaa le, kani i dɛli nini a kɔllo naŋɔɔ a ɲɛ ya nɔ-o.

¹² I caa calii bala fondoei, i caa vɛlɛ calii ɲɛ-sɔlaa bɛnduei. O dɛnndan kpow nin a nɛɛ-nɛɛ ka, i dɛli a pumndo, mí dɛli a yiaan biuvɔnndo. I dɛli a sɔla bɛndoo, mí dɛli a pɛŋnden.

¹³ I co dɛnndan kpow nɔlaa o hɛnan vana co ya kpaayaa keo-vo bɛngu.

¹⁴ Kɛ nduyɛ, la bɛɛndiaa tosà mí la mala ya o pɛŋnde nilen nin.

¹⁵ Niaa pila Filipea, la sínà maa telen Yoongu kɛndɔɔ kandu yondanndo-o ya faŋan Maseduan ni, niaa pilɛ kpé yɔŋnun vanaa laalaŋaa mala ya-a ni.

¹⁶ Kabi telen ya va Tesalonike-o, la va ya ɲɛm yáà nɔ makoo-on yoo.

¹⁷ Ken co dimi le maa ɲɛm-kéan niaan ya co kɔɔli ni, o ya co kɔɔli-o co ni, mì la sɔla tɔnɔɔ taw.

¹⁸ I sɔla ɲɛm niaa yɔŋ ya-on kpow, mí n hiw kuiyo ya o ba. I pɛ, Epafrodite langa yɔngu ya ɲɛm niaa yɔŋ ya-on, n co macoaa maa lasikɔlɔ cun kɛndɛ, sálà hɛnan Hala-o.

¹⁹ Hala nuu nɛŋinin kpekula niaalan kpede maa mɛɛ bɔɔbɔɔyɛi ndɔɛi a biilu ndɔɔ co o Yeesu Krista nin yɛ.

²⁰ Biiloo co le Hala Fuɲa naa le fɛɛn a le fɛɛn. Amiina!

Yilɔɔla mɛɛlaalan

²¹ La yil vanaa laalan Yeesu Krista má va o kunda niaa nin-nda kpow. Puaapilɛa co ya ikɛi-ya yil niaa.

²² Vanaa laalaŋaa naa n co nanun-nda yil niaa, taama-taama a co baalaa o masaa Sesar lo cɛinin-nda.

²³ Màá kɛndɛi Maalii Yeesu Krista-e i lo niaa o lakɔl!