Filipea 3 - BII BILA

Le vaa vana sandaa Hala o hɔl

¹ Le sɔɔn tɔ̀un yɛ, puapilɛa nia, la dɔwnun ɲaale o Maalii nin. Ɲɛ pala ya le niaa sɔɔn pilɔn miinguuo sɛvallo le, kani kon co fisa le niaa ni.

² La mandan a tunaa kan, la mandan a vanaa baalaa vɔɔnda, la mandan a faleŋaa fondoa kan.

³ Kani, naa co faleŋaa kpeekpeiya ni, naa co Hala biiloo o hɛnan Kɔl-Diandaa bɛngu, mì n va sangalanndo o Yeesu Krista nin-nda, naa tiindan dɛnnda n'falulan te-a pɛɛn.

⁴ Nduyɛ, yáà tiwba mì yáà tiindan dɛnnda n'falulan. Te vana pum co pɛ yiyanndo maa o nɔ dí le dɛnnda n'falulan tiindanndo, mɛɛ ya i hiow vana kon.

⁵ Ndáà violɔɔ ya, má dii ya tooma o paale ŋɔmaandɔ len. Israɛlnɔɔ ya i co ni, fulaa o polale Bɛnyamɛn-nden nin. Hebreenɔ Hebreenɔɔ velu-o ya co ni.

⁶ Le a ba tɔŋndo o kɔɔ yɛ, Faliisinɔɔ ya co ni. Te le dialun fulan a dɛnɛ dinaa o kɔɔ ni, vana tol kundala vanaa laalannda yɛlen-ndo ya yɔŋnun ni. Te le sandei a ba tɔŋndo ni, vanáà yaala ya nɛɛ-nɛɛ le.

⁷ Kɛ ɲɛm va mun tɔnɔɔ le ya-on, mí ca mun ɲɛ fondoo le Krista.

⁸ Dɛnndan kpow la co macoaa ya o hɔl maa delɔɔ, le naŋɔɔ bɛndu ya ce o Maalii nuu Yeesu Krista sinaa nin-ndo. Le ndu, mí cɛl, mí ɲɛ-ɲɛ hialun ya, mí ca ɲɛm mun kpow maa bil nda viow o sállo coo-o, haliko tuŋ i sɔla Krista,

⁹ o kon mí siŋnun vana sandaa o ndu nin, kɛ o ve sandii fula ya pila nin le tɔŋnda ya bii lan te, kɛ sandii vana sɔla o Krista laalanndo-e. Sandii fula Hala o ba, mì i nɔ tumndo o laalanndo coo-e.

¹⁰ I ya co kiltan kɔɔli-e co le ndu sinaa ni, mì sina kpaaya tindi ndu fulaa vanvílɛ́iya tɛɛn-ndo. O ya yeema-o co sangaa latulu a ndu, mì vel ndu o piɔ́m ndɔɔ nin ni,

¹¹ mì tiindan maa ya bɛɛ i tendulnin fulaa vanvílɛ́iya tɛɛn.

Kiltan le tiiyaa o mɛɛlulan

¹² Kon co dimi le maa i sɔla ɲɛ ya co kiltan kɔɔli-o, te kon te maa i tiiya kilta nilan mɛɛlulan, kɛ i co hiovɔɔ laci a kiltan, haliko mi bii ɲɛ ya co kiltan kɔɔli-o, kani ya bɛɛ, biyɔɔ Yeesu Krista bii ya ni.

¹³ Puapilɛa nia, yiyan co ya bɛɛ maa i bii nin ɲɛ ya co kiltan kɔɔli-o le, kɛ ɲɛ pilɛ ya co tosaa ni: o ya hiow nin-ndo ya co pɔɛɛnndan ni, mì va kindinndo le o co ya laci-o bendallo,

¹⁴ i co kiltan le tiiyaa o mɛɛlulan, le ɲɛ ya co kiltan kɔɔli-o sɔlaa, sala baala Hala ke ya o Yeesu Krista nin-ndo pɛɛn.

¹⁵ Naa vanaa-vanaa n co kaasonnda o laalanndo nin, yiyanndo ho va naa o lakɔl. Te o va yɛ pɛ mì la nɔ yiyannda celen o dɛnɔɔ pum coo, Hala cɔmnin niaa vɛlɛ vakpa mɛɛ niaa bɛnda le ndu biyɔɔ yɛ.

¹⁶ Telen naa n tiiya vɔ hoo-o, n kɔnnun diom pilɛ.

¹⁷ Puapilɛa nia, la tuula ya. La tofa vanaa co kelaa maa mɛɛ niaa ce naa kelaa yɛ-a.

¹⁸ Vanaa bɔɔ-bɔɔ a co kelaa maa n'yaamɔɔ le yɔm singafilaa Krista-o. I dimúl nin niaa ndi lɔ́ɔ́ levil, mì va vɛlɛ niaa ndi hau dimullo a caŋndo:

¹⁹ mɛɛlula vanaa kan la co o ɲánndávàà ni. Dembela ndalan la co hala ndaa ni, a cɛn pɛ a muungu ɲɛ vanin siɛmbulan le nda-o sooloo. O ɲɛm co o lɛŋnden coo-on coo kínɛí nda co yiyanndo ni.

²⁰ Le naa, ceen naa bɛndoo co o halataala. Lon Yeesu Krista naa n co cumndo-o fulanin ni, Vana Ciindiaa naa a Maalii naa.

²¹ Ndu mangalanin kɔɔle naale dɛnɛ palaalen ni, mò mingi len maa kɔɔle ndɔle biilaa len, a kpaaya bɛndu o nɔ le ɲɛ-ɲɛ fee lueinɔnndo ndu o ba bɛngu-o.