Ɛsdras 9 - BII BILA

Mɔnɛi a piɛile Ɛsdras len le dɛnɛ nɔɔlɛi Yuifia

¹ «Lɔ́ɔ́ dɛnnda lan la cuu-o, mí simlacia pum sɔɔnguu ya ikɛi, má dimul-la aa: ‹Cuavaa Israɛlla, vanaa-solia-lasálàá a leviia, vana-vana sɛyan a vannda ha o lɛŋnden nden nin te. A del dɛnnda nɔɔlɛila vannda ha kɔɔli: Kanannda, Hitiia, Perisiia, Yebusiia, Amɔnnda, Moabua, Esiptea a Amoriia.

² A yil cuavaa vanaa-mangalaa-isɔaa kan o nɔ̀lan le nda pila a le poaa ndaa. Nuaa nda bingulan yɛyii diandɛi a vanaa súúla celeŋaa co o lɛŋnde len nin-nda ni. Vanaa va vanaa tasea le dɛnɛ nɔɔlɛi kon tosaa-a yɔŋnun simlacia a vanaa bɛndua ni.›

³ Mɛɛ ya tuei sɔɛi ken, mí sɛɛsiaa doma ni pɔmbɔɔ a doma ni bɛndoo a mɔnɛi, mí suingin yiinde o lebol, mí suingin siaiye, mí cal a mɔnɛi bɛnduei.

⁴ Mí lo icali lon lende háá telen nda soli sálà paale delaa-o. Mí vanaa va buulanndo le yamɛi Hala Israɛlla va kiolɔ̀ɔ̀ le yɔŋ vɔɔn vanaa fula kan o biyɔɔ nin-nda tosa kon-ndo-e-a sɔɔnguu ya ikɛi.»

Ɛsdras piɛi Hala le vanaa del o pɔwlan nin-nda

⁵ «Tuma solia sálà paale delaa tiiyaa, doma ni pɔmbɔɔ a doma ni bɛndoo va ya lekɔɔ lasɛɛsiɛilan, mí can a mɔnɛi lende, mí baŋ vulan, mí heelu balan o Mɛlɛka Hala nuu lo.

⁶ Mí dimul ndu aa: ‹Éé Hala nuu! Siɛmbulan la bii ya taw, hali hɔlla bɛɛ i nɔla heeloo le nɔm tofaa le, Hala nuu! Kani yɔŋnda vɔɔnnda naalan la lo kuiyo tei mì la hiaw naa ba, hakila naalan la lo dengelanndo háá mì la tiiya o halataala.

⁷ Kandɔɔ o paale fuɲaa naa imamaa, háá hau, pɔwla naalan la co bɔɔ sɛ́lɛ́. Le hakila naa n tosa lan, mí naa pila, masaa naa a vanaa-solia-lasálàà naa n luɛi masaa co o lɛŋnden coo-a o ba bɛngu, mí n del o mɔɛi cɔwve bɛngu, má kɔa a naa o biyɔɔ nin, mí vannda punga ɲɛm naan, mí siɛmbulan la bii naa mɛɛ la co hau naa biyɔ̀ɔ́ nuaa yɛ.

⁸ Kɛ nduyɛ, o co vɔ lɔ́ɔ́ levil te, mí nɔm Mɛlɛka Hala naa tosal naa kɛndɛi, má mɛi vannda pum yoomu o vanaa naa tɛɛn, má mingi nda vɛlɛ le calle o lɛŋnde nɔmnde diandaa len coo. Hala naa, nuaa n cɔm naa ɲɛ-tengaa ni, má yɔnyɔla naa o cɛle naalen nin.

⁹ Kani cɛa naa n co ni, kɛ o cɛle naale len nin, nɔm Hala, a mel naa le few. Má luei masaa Pɛrsea kɔl iɲííyo nin a naa, haliko ma ce naa ɲia. Má cɛl vɛlɛ naa le Cɛi biilaa nɔmndo mingio tangullo, o ndóò del nin-ndo pɛɛn, haliko mi n sɔla caltan Yerusalɛm a o tàndá Yuda-o nin.

¹⁰ Éé Hala naa! Yɛɛ nɛ naa n dimi yɛ vɛlɛ o dɛnnda tosan lan-ndan kɔɔli? N cii tɔŋnda nɔmndan tɛɛmbuu.

¹¹ Tɔŋnda nɔm óò yɔngu vanaa nɔmaa baalaa, vanaa-tɛɛngaa-diom Hala-a nɔmnda le naa lan tɛɛngullo lan pɛɛn. Mí nɔm óò dimul naa o tasendɔ aa: Lɛŋnde niaa co lakɔ le calle nin-nden le cuu nɔɔliaa, kani vanaa co o lɛŋii ken nin-nda cuu nɔɔlian. Kandɔɔ o tumndo háá o bollen, a cii len pei a dɛnnda vɔɔnndan.

¹² La kɛ́sì cuavaa niaa laandua o nɔ̀lan poaa mialaa kan o ba le. La yil vɛlɛ cuavaa ndaa laandua o nɔ̀lan le poaa niaa le. La fula dɛnɛ nda kɛndɔɔ lehɔl te, la buulan le naŋɔɔ vanaa-mangalaa-isɔɔa sina kan Hala le-a le. Lende niaa siŋnunnin lɛŋnde kpaaya len ni, mì la de kulun kɛndɛn lelɛŋndon, mì la mel vɛlɛ poaa niaa lɛŋnde len kɛ́ɔ.

¹³ Éé Hala naa! Dɛnnda palaalan ndan la komal naa fúú le, kela naa vɔɔndo a tɛɛmbuula naala bɛndulan la cuu naa ndu ni. A kon kpede a saangiaa naa mɛɛ hakila naalan la co yɛ le, má mɛi naa yoomu.

¹⁴ O dɛnndan ndan kpow kɔɔli, vɛ̀ɛ̀ naa n kɛɛ yɛnin vɛlɛ tɔŋnda nɔmndan biyɔɔ, mì n muungu nɔlan yiiyo naa vanaa-mangalaa-isɔɔa nɔ haa dɛnnda nɔɔlɛilan-nda? Vɛ̀ɛ̀ a tembunin kɔl a naa mà cii naa kpede hali vanndo pilɛ bɛɛ lonin te le?

¹⁵ Mɛlɛka, Hala Israɛlla, vana sandaa n co ni. Lelan naa pumnda n co hau yoomu nuaa ni. Má cè naa nɔm o hɔl nanu a hakila naalan! Nduyɛ vana-vana bɛnda mò va nɔm o hɔl lende le.›»