Ɛsdras 6 - BII BILA

Muli masaa Darius muli-o

¹ O kon kɔɔli, mí masaa Darius viam vannda le yaasiaa o cɛi mandaa lasɛbɔɔ nin, nɛɛ bolofaa va o mandaa Babilɔn-nda.

² O yaasiaa kon nin, má saalun sɛbɛ simbulaa pum o kobio Ɛkbatan nin, ó va kobi lebollo le tàndá Medii-o-o. Sɔɔn va n'sɛvaa o sɛbɛ kon nin-ndon va mun ni: Kona nda sɛva-o.

³ «O vɔsi tasoo nin o masale Siris len bɛngu, mí ndu masaa Siris handu tɔŋndo ho a Cɛi-Hala-o Yerusalɛm o kɔɔ aa: ‹Cɛi-Hala-o bɛnda mò muungu tangulɔn, haliko mo muungu vɛlɛ Cɛi vana soli sálàlan nin-ndo. O bɛnda mò muungu kilan o foofo ndɔ paandoo coo, o vanin simndan dunndo belaŋɔmpum, buo dunndo belaŋɔmpum.

⁴ Mà kɛsi powta sialaalan polan man yáá a pɛngɛn celulan sɛnɛiyon polalen lepilɛ. Vɔngu kon kpow fulanin o kesu lemasaa nin.

⁵ O kon kɔɔli, ɲɛm diandan cɔwnun a sianion-ndon a n cɔwnun a volion-ndon, n Nebukanɛsar ndóò soli o Cɛi-Hala-o nin Yerusalɛm, mì ndóò kɔa a mun Babilɔn-ndon bɛnda mì n mingin, mà kɔ kɛsi mun Yerusalɛm nɛɛ n va paandu o Cɛi-Hala-o nin-nda.›»

⁶ «Lelan sisa, nɔm Tatnai co masa ibungaa o tàndá co o peo Efrate leeloo a ba paalen le del-lo coo-o, nɔm Setar-Bɔsnai a niaa caaŋaa ndaa co Afarsak o peo leeloo lon-nda, la soli sondolan o sɔɛi ken nin few-few.

⁷ La mal vanaa kan mà hiow laci a Cɛi-Hala-o mingio tangullo. Masa ibunga co Yuifia coo-o nda kaasoŋaa kɔlkalua Yuifia bɛnda mà mingi Cɛi-Hala kon tangul o fonda ndɔ pandoo coo.

⁸ La tuei-yɔ tɔŋ ya handu-o: ɲɛ niaa bɛnda mì la tosal vanaa kɔlkalua Yuifia le Cɛi-Hala mingio tangullo-o co hoo ni: bɔnɔla tangul kon la bɛnda mì la fula o volin lemasan nin, o mulu co biinɔnndo o tàndá co o peo Efrate leeloo a ba paalen le del-lo nin-ndo nin. Ɲɛ-sɔlaa kon bɛnda mò va vanaa kan yɔngɔnndo telen oo telen, yɔŋii vallo tamala nda o ba.

⁹ Lepalaa-lepala, la bɛnda mì la yɔngu vanaa-solia-lasálàá Yerusalɛm ɲɛm bɛnda le Hala co o halataalaa-o sálà loamaa solullo-on. Ɲɛm mun co mun ni: navaa tovaa téndéa, saa kóndóa, saa téndéa, maalon, hɛlle, mɔiyan a cuɛiyan. La bɛnda mì la yɔngu nda ɲɛm mun mɛɛ nda vanin mun ɲunaa yɛ. La bɛnda mì la pɔsɔŋa sɔɛi he le dɛ!

¹⁰ La yɔngu nda mun haliko ma solul Hala co o halataala-o sálàla cuɛima cun kɛndɛlan, mà piɛi Hala le yoomu masaa a le yoomu poaa ndɔa.

¹¹ La tuei-yɔ vɛlɛ tɔŋ ya yii-o: vana-vana tuundan pɛ le tɔŋndo ho tɛɛmbuuo, a nannin towlen o cɛi ndɔɔ, mà buli ndu a towle len, mà pesipesi cɛi ndɔɔ, mà mingi ndu bémboo.

¹² Masa oo masa, te kon te vanaa-mangalaa-isɔɔ súú-súù a tuundan pɛ le dɛnɛ pum tosaa le tɔŋndo ho tɛɛmbuuo, le Cɛi-Hala co kon Yerusalɛm-ndo puusiaa, màá Hala diola ndɔlan la co piɔlnɔnndo o fonda kon-ndo tɛɛmbuu vana kon! Ya Darius pila yii tɔŋndo ho ni, lelan lende kpafii o tosannin ni.»

A tosa kafo kumbiaa Cɛi-Hala-o

¹³ O kon mí Tatnai, ó va masa ibungaa o tàndá va o peo Efrate leeloo a ba paalen le del-lo coo-o, Setar-Bɔsnai a caaŋaa ndaa bii sɔɔn masaa Darius dimul nda mun-ndon kpafii.

¹⁴ Mí vanaa kɔlkalua Yuifia hiaw laci a tangullo, mí vali kalaa biinun bila nda o ba, kani vana-tɛɛngaa-diom Hala-o Hasee nda Sakari po Ido-o a va sɔɛi o nda lo le nda yoomuan lueiyo o silalan nin. Má siow tangullo maa mɛɛ Hala Israɛlla ndóò dimul nda yɛ. Má tosa baalaa mɛɛ tɔŋ Siris-o, tɔŋ Darius-o a tɔŋ Artasɛrsɛs masa Pɛrsea va yɛ.

¹⁵ O vɔsi ŋɔmpumndɔɔ nin o masale Darius len bɛngu, paangii Adar va malɔ leyàá, mí Cɛi-Hala-o cuu tangul.

¹⁶ O kon mí Israɛlla, vanaa-solia-lasálàá, leviia a vanaa fula o biyɔɔ nin-nda kpow a tosa kafo kumbiaa Cɛi-Hala-o a kɔlkɛndɛ bɛndoo.

¹⁷ Le Cɛi-Hala kon kumbio, má soli navaa tovaa kɛmɛ (100), saa kóndóa kɛmɛ lediin (200) a saa téndéa kɛmɛ lehiɔɔlu (400). Le sálàá solio le haki cuavaa Israɛlla kpow, má yɔngu cuinaa toovia tɔ́ a à ŋiɔn maa mɛɛ polama ndan ma va sɛ́lɛ́ yɛ.

¹⁸ O kon má piɔw vanaa-solia-lasálàá a leviia mɛɛ nda va a kundalan yɛ le vali Hala-o tosaa Yerusalɛm maa mɛɛ o co o sɛvaa o sɛbɛ tɔŋ Moise-o nin yɛ.

Kafo-hiavaa-coo a kafo bulu toosian a lɛvɛn too

¹⁹ Mí vanaa fula o biyɔɔ nin má muungu-a tosa kafo-hiavaa-coo o paangii tasei nin o paale tɔ́ a lehiɔɔlundɔlen coo.

²⁰ Mí vanaa-solia-lasálàá a leviia tosa fɔlɔn faleŋun dindianndon latulu, mí nda kpow a diandu. O kon, má diw saa téndéa le kafo-hiavaa-coo tosaa le vanaa va o biyɔɔ nin má muungu-a kpow, le puapilɛa ndaa vanaa-solia-lasálàá a le nda pila.

²¹ O kon mí Israɛlaa fula o biyɔɔ nin má muungu-a dia ɲɛdiaa kafo-hiavaa-coo nda vanaa sɛyan a dɛnɛ nɔɔlɛi vanaa-mangalaa-isɔaa va o lɛŋnde len nin-nda-a, a yiinun a Israɛlla le mulinndo Mɛlɛka Hala Israɛlla o ibuŋ-nda pɛɛn.

²² O kon kɔɔli, má tosa kafo bulu toosian a lɛvɛn too a kɔlkɛndɔɔ o palɛi ndii ŋɔmmɛw bɛngu. Kani mí Mɛlɛka nɛŋi nda kɔl, mó tosa mí masaa Asiri ca nda ɲia, mó luei nda yoomuan o vali tangulaa Cɛi-Hala Israɛlla nin.