Ɛsdras 5 - BII BILA

A mingi vallo kandɔɔ

¹ Paale pilɛ, mí vana-tɛɛngaa-diom Hala-o Hasee nda vana-tɛɛngaa-diom Hala-o Sakari po imama Ido-o soaa o Yuifia va o tàndá Yuda-o nin-nda lo a o Yuifia va Yerusalɛm-nda lo o diola Hala Israɛlla, Hala va nda coo-o pɛɛn.

² O kon, mí Sorobabɛl po Sealtiɛl-lo nda Yosue po Yosadak-o a mingi vallo kandɔɔ, má muungu vɛlɛ Cɛi-Hala-o tangullo Yerusalɛm. Vanaa-tɛɛngaa-diom Hala-a va nda ikɛi, a va nda malaa.

³ O palɛi ken nin, mí Tatnai, ó va masa ibungaa o tàndá va o pee bɛndoo Efrate leeloo a ba paalen le del-lo coo-o, Setar-Bɔsnai a caaŋaa ndaa a hun komal nda, má ɲuna nda aa: «Nɛ̀ɛ́-nɛ̀ vem yɛ niaa le Cɛi-Hala-o ho mingio tangullo a le cii ndɔɛi mingio cɔvɔɔ?

⁴ La ke naa diola vanaa co Cɛi kalaa mingio tangullo-a.»

⁵ Kɛ Hala ndaa va hɔlten kaasoŋaa kɔlkalua Yuifia coo, lelan a kuuna lɛ nda le hiovɔɔ laci a baalaa le, má lo cumndo háá mí Darius ndóò sɔla sɛbɔɔ a sɔɛi ken o kɔɔ, mí ndóò mingul nda mulio.

A lɔlu vɛlɛ Yuifia o masaa Darius lo

⁶ Má sɛva sɛbɔɔ, má yoo masaa Darius. Vanaa sɛva sɛbɛ kon-nda yɔŋnun haa ni: Tatnai va masa ibungaa o tàndá va o peo Efrate leeloo a ba paalen le del-lo coo-o, Setar-Bɔsnai a caaŋaa ndaa va Afarsak o peo leeloo lon-nda.

⁷ Sɔɔn ndáà sɛva o sɛbɛ ndáà yoo ndu-o nin-ndon va mun ni aa: «Masaa Darius. Màá kɔlɲuloo peelanndo va le nɔm!

⁸ Masaa, sina pɛngu maa n kɔɛ o tàndá Yuda-o nin, mí n kɔ tiiya háá o Cɛi-Hala-o dí, Hala bɛndoo pɛɛn. A kandu Cɛi kon mingio tangullo a powta sialaalan. A co yɔmnde vowvo o cìì Cɛi kalaa nin. Vali kalaa co tosanndo a taasio ɲɛkɛndɛi, o co bɛndaa nda o ba taw.

⁹ Mí n veelu simlacia va nda tɛɛn-nda, mí n ɲuna nda aa: ‹Nɛ̀ɛ́-nɛ̀ vem yɛ niaa le Cɛi-Hala-o ho mingio tangullo a le cii ndɔɛi mingio cɔvɔɔ?›

¹⁰ Mí n ɲuna diola vanpiaandua va nda bollen-nda, mí n sɛva lan le lan nɔm cɔmndo.

¹¹ Má mulul naa aa: ‹Vanaa baalaa Hala cɔw halataalaa a lɛŋnden-ndo-a naa n co ni, Cɛi-Hala cɔwnun sindɛ nin pá-pá-o naa n co mingio tangullo ni, ò masa bɛndoo pum Israɛl ndóò cɔw mí ndóò cii kpede-o.

¹² Kɛ mɛɛ fuɲaa naa imamaa tɛɛmbuu Hala co o halataala-o kɔllo, mí Hala mal nda kaldenɔɔ o ba, Nebukanɛsar masaa Babilɔn pɛɛn. Mí masa kon tɛɛmbuu Cɛi-Hala kon, mó bii nda, mó kɔa a nda o biyɔɔ nin Babilɔn.

¹³ Nduyɛ, o vɔsi tasoo nin o masale Siris masaa Babilɔn-nden bɛngu, mí ndu masaa Siris viam vannda le Cɛi-Hala-o ho mingio tangullo.

¹⁴ O mɛɛlu ko a ken te, masaa Nebukanɛsar ndóò cua lɔ́ɔ́ kon ɲɛm diandan cɔwnun a sianion-ndon a n cɔwnun a volion-ndon o Cɛi-Hala-o nin Yerusalɛm mí ndóò kɔ kɛsi mun o cɛi máándo nin Babilɔn. Mí ndu masaa Siris pila viam vannda, má kɔ soli ɲɛm diandan mun o cɛi máán kon nin, mó sɔaa mun Sɛsbasar ndóò kɛsi masa ibungaa-o o ba.

¹⁵ Mó dimul ndu le ɲɛm mun cuaa, mò kɔ kɛsi mun o Cɛi-Hala-o nin Yerusalɛm. Mó dimul ndu kpendekele maa Cɛi-Hala-o bɛnda mò muungu tangulɔn o fonda ndɔ pandoo coo.

¹⁶ O kon, mí Sɛsbasar kon hun Yerusalɛm nanu, mó mingi Cɛi-Hala-o kila sɛnɛi. Kandɔɔ ɲinkon háá hau, Cɛi kon co tangulɔnndo tuŋ, kɛ tangul kalaa cuu vɔ le.›

¹⁷ Lelan sisa, te nɔm masaa cɛl pɛ, viom vannda mà yaasiaa o sɛbɛla paandula lemasalan nin Babilɔn ndon, le sinaa te diom kon ndóò fula masaa Siris o sondo lekɛ́ndɛi, mí ndóò sɛvan maa Cɛi-Hala-o bɛnda mò muungu tangulɔn Yerusalɛm. O kon kɔɔli mì nɔm masaa cɔm naa tuu nɔmndo a dɛnɔɔ ho o kɔɔ.»