Ɛsdras 10 - BII BILA

Yuifia sɛyan a laandua mangalaa isɔaa ndáà cua o nɔ̀lan-nda

¹ Telen Ɛsdras va kon vula baŋaa o Cɛi-Hala-o hɔl-ndɔ, mó va Hala piɛiyo a hakilan sɔlɔnndo a caŋndo-o, mí Israɛlla cuungian sɛ́lɛ́ bɛndoo ndu ikɛi: vanpiaandua, vanlaandua a cuaambɔa. Mí nda kpow a va caŋndo fúkpàà-fùkpàà.

² O kon mí Sekania, po Yehiɛl fula o polale Elam-nden nin-ndo cua sɔɛi, mó dimul Ɛsdras aa: «N lo o lediom coo a Hala naa le, kani n yil laandua o vanlaandua mangalaa isɔaa vanaa co o lɛŋnden nden nin-nda tɛɛn. Kɛ hali n tosa bɛɛ lende, kɔlkɛsiaa co vɔ le Israɛlla o dɛnɛ kon nin.

³ N cuannun niko ciɛ́ɔn o Hala naa lo, o kon mì n kɛɛnun laandua kan a cuavaa naa n velu a nda-a kpow. N biinun sila nɔm Ɛsdras vana naa bɛndoo a vanaa nɔ siòòŋii Hala-e-a sila naa-o. O bɛnda mì n kela mɛɛ tɔŋndo dimul naa yɛ.

⁴ Cɔn, kani sɔɛi he sɔɛi nɔmnde i co ni. Naa bɛɛ n co nɔm kɔɔli. Lelan kiisan te, kandu vallo.»

⁵ O kon mí Ɛsdras can, mó dimul simlacia vanaa-solia-lasálàá a leviia a simlacia Israɛlla kpow le mɛnanndo le tosaa mɛɛ Sekania ndóò tuu yɛ. Mí nda kpow a mɛnan.

⁶ Mí Ɛsdras faŋan o Cɛi-Hala-o sondoo, mó kɔa o Yohanan po Eliasib-o lo cɛinin. Kɛ má kɛɛ le ɲɛ-ɲɛ dioo a le kolɔɔ, kani mɔnɛi va ndu taw le dɛnɛ vɔɔn bɛndu vanaa fula kan o biyɔɔ nin-nda tosa-o.

⁷ O kon má yonda Yerusalɛm a o tàndá Yuda-o nin, haliko mi vanaa va o biyɔɔ nin-nda cuungian Yerusalɛm.

⁸ Mí simlacia a vanaa kɔlkalua va nda coo-a dimi maa vana-vana hin o palɛi ndii yáá bɛngu le, a poondiaa ɲɛm ndɔn kpow. O kon kɔɔli, a faŋa ndu pila caanda coo.

⁹ Palɛi ndii yáá o kon kɔɔli, mí vanpiaandua fula o tàndá Yuda-o nin-nda a á fula o tàndá Bɛnyamɛn-ndo nin-nda cuungian Yerusalɛm. O paale bidiinndɔlen coo o paangii ŋɔmahiɔɔlundɔɛi nin, mí vannda kpow a kɔ sim o Cɛi-Hala-o sondoo. Má va ɲiiyaa le dɛnɛ kon a le piɔɔ va siaa-o.

¹⁰ Mí Ɛsdras vana-solia-lasálàá can, mó dimul nda aa: «Niaa Israɛlla, la cua haki bɛndoo le yilɔɔ niaa yil vanlaandua mangalaa isɔɔa o nɔ̀lan-ndo. La cɔɔlu vɛlɛ Israɛlla malɔɔ o pɔwla bɛndu nin dɛ!

¹¹ Lelan, la sɔlɔlan hakila niaalan Mɛlɛka Hala fuɲaa niaa mamaa o hɔl, mì la tosa mɛɛ hɛnan ndɔɔ co yɛ, la sɛyan a vanaa co o lɛŋnden nden nin-nda, mì la mal vɛlɛ laandaa mangalaa isɔaa co niaa o ba-a.»

¹² Mí vanaa va lon-nda kpow a yonda o lepilɔɔ aa: «Toɲaa n dimi ni mbɔ̀! O naa n bɛnda le tosaa-o co ɲɛ n dimul naa-o biyɔɔ ni.

¹³ Kɛ nduyɛ n co sɛ́lɛ́, o sialten nin naa n co vɛlɛ ni, n tiwnin ba le lou isisi o bɛ́ɛ̀ nuaa le. Handɔɔ o kon coo, sɔɛi he co sɔɛi toosian o paale pilɛ, te kon te o palɛi ŋiin bɛngu le, kani naa vanaa kɔndu hakio o dɛnɔɔ ho nin-nda n co sɛ́lɛ́.

¹⁴ O co fisa mì simlacia naa lo nanu o diola vannda kpow. O kon, mì vanaa-vanaa cua laandaa mangalaa isɔɔa o naa Israɛlla tɛɛn a komal nda o lɔ́ɔ́ naa n yimnin nda-o coo. A hunnin latulu nda vanaa kɔlkalua a vanaa kialaa n'yamaa co o kobila ndalan nin-nda. Lende naa n co tosa ni háá mì kɔltuw bɛndu Hala-o ho pɔlul a naa le dɛnɔɔ ho.»

¹⁵ Yonatan, po Asaɛl-lo, nda Yasia, po Tikva-o daama a kɛɛ tuu kon ni. Mí Mesulam nda Sabtai leviinɔ sim nda kɔɔli.

¹⁶ Kɛ mí Israɛlaa tɔ̀a fula o biyɔɔ nin-nda kpede cɛl tuu kon. Mí Ɛsdras vana-solia-lasálàá hɛli bolii lapangɛi, mó veelu nda diolan. Má cal le sɔɔn yaasiaa o paale taselen coo o paangii tɔ́ndɔɛi nin.

¹⁷ O vɔsio pilɔɔ nin, o paale taselen coo o paangii tasei nin, má cii sɔɛi vanaa cua kan laandaa mangalaa isɔɔa-a toosiaa.

Diola vanaa tosa haki kon-nda la co lan ni

¹⁸ O polama vanaa-solia-lasálàá nin, vanaa ndáà yil laandaa mangalaa isɔɔa o nɔ̀lan-nda va haa ni: o polale Yosue po Yosadak-o len coo a o polama puapilɛa ndɔa coo, má saalun Maseya, Eliesɛr, Yarib a Kedalia,

¹⁹ mí nda kpow cua ciɛ́ɔn, má mɛnan le laandaa ndaa kan malɔɔ a le saa kóndóó sálàá solio haliko mi Hala mal nda haki.

²⁰ O poaa Immɛr-a tɛɛn: Hanani nda Sebadia.

²¹ O poaa Harim-nda tɛɛn: Maseya, Eliya, Semaya, Yehiɛl a Osias.

²² O poaa Pasur-a tɛɛn: Elioenai, Maseya, Ismaɛl, Yosabad a Eleasa.

²³ O Levii-a tɛɛn: Yosabad, Simei, Kelaya (o nda veelu vɛlɛ aa Kelita-o), Petahia, Yuda a Eliesɛr.

²⁴ O vanaa solia n'condua tɛɛn: Eliasib. O kpalilla ladioa tɛɛn: Salum, Telɛm a Uri.

²⁵ O Israɛlaa tɔ̀a tɛɛn, vanaa fula o polale Pareɔs len nin-nda yɔŋnun Ramia, Yisia, Malkia, Miamin, Eleasar, Malkia a Benaya ni.

²⁶ O vanaa fula o polale Elam-nden nin-nda tɛɛn: Matania, Sakari, Yehiɛl, Abdi, Yeremɔt a Elia.

²⁷ O vanaa fula o polale Satu len nin-nda tɛɛn: Elioenai, Eliasib, Matania, Yeremɔt, Sabad a Asisa.

²⁸ O vanaa fula o polale Bebai len nin-nda tɛɛn: Yohanan, Hanania, Sabai a Atlai.

²⁹ O vanaa fula o polale Bani len nin-nda tɛɛn: Mesulam, Maluk, Adaya, Yasub, Seal a Ramɔt.

³⁰ O vanaa fula o polale Pahat-Moab len nin-nda tɛɛn: Adna, Kelal, Benaya, Maseya, Matania, Bɛtsalɛl, Binnui a Manase.

³¹ O vanaa fula o polale Harim-nden nin-nda tɛɛn: Eliesɛr, Yisiya, Malkia, Semaya Simeɔn,

³² Bɛnyamɛn, Maluk a Semaria.

³³ O vanaa fula o polale Hasum-nden nin-nda tɛɛn: Matnai, Matata, Sabad, Elifelɛt, Yeremai, Manase a Simei.

³⁴ O vanaa fula o polale Bani len nin-nda tɛɛn: Maadai, Amram, Uɛl,

³⁵ Benaya, Bedia, Keluhu,

³⁶ Vania, Meremɔt, Eliasib,

³⁷ Matania, Matnai, Yasai,

³⁸ Bani, Binnui, Simei,

³⁹ Selemia, Natan, Adaya,

⁴⁰ Maknadbai, Sakai, Siarai,

⁴¹ Asareɛl, Selemia, Semaria,

⁴² Salum, Amaria a Yosɛf.

⁴³ O vanaa fula o polale Nebo len nin-nda tɛɛn: Yeiɛl, Matitia, Sabad, Sebina, Yadai, Yɔɛl a Benaya.

⁴⁴ Vannda ha kpow ndáà yil laandaa mangalaa isɔɔa ni. O vanlaandua kan tɛɛn a bɔɔ-bɔɔ ndáà velu nin cuawva.