Ɛsdras 1 - BII BILA

Tɔŋ Siris yii-o

¹ O vɔsi tasoo nin o masale Siris masa Pɛrsea len bɛngu, mí Mɛlɛka luei ndu Siris yiyanndo nin le sɔɛi Mɛlɛka ndóò dimi a sondo Yeremi vana-tɛɛngaa-diom Hala-o-e peeloo. O kon, mí Siris sɛva sɛbɔɔ, má yonda sɔɛi ken o masale ndɔlen nin kpow aa:

² «Nuaa Siris, masaa Pɛrse dimi ni aa: ‹Mɛlɛka, Hala co o halataala-o yɔngu ya masɛi co o lɛŋnden kpow coo-e. O vem ya le ndu Cɛiyo tengullo Yerusalɛm, o tàndá Yuda-o nin.

³ Lelan, vanaa co vanaa ndɔa o niaa tɛɛn-nda, a hèèlú Yerusalɛm, o tàndá Yuda-o nin le Cɛi-Mɛlɛka-o, o co Hala Israɛlla-o mingio tangullo lon. Hala nda co biiloo Yerusalɛm-ndo pɛɛn. Màá Mɛlɛka Hala ndaa va nda ikɛi!

⁴ Vanaa ndɔa tɔ̀a lo yoomu-a, nɛɛ-nɛɛ nda co pɛ, vanaa nda co icali tɛɛn-nda bɛnda mà mala nda a volion, a sianion, a ɲɛm celen, a cɔlua a á ɲɛm-kéan vana yɔngu a yeemɛi vana pilɛi-yon, le Cɛi-Hala-o tangullo, Hala co Yerusalɛm-ndo.›»

⁵ O kon mí vanaa va bolii lapangɛi o polale Yuda len a o polale Bɛnyamɛn-nden coo-a, vanaa-solia-lasálàá, leviia a vanaa Hala tosa ɲɛ pum o lakɔl-la bɛɛndian le kɔlan Cɛi-Hala co Yerusalɛm-ndo.

⁶ Mí vanaa nda va icali tɛɛn-nda kpow a mala nda a ɲɛm nda cɔw a volion-ndon, ɲɛm nda cɔw a sianion-ndon, ɲɛm celen, cɔlua a ɲɛm sɔvɛɔn, handɔɔ o ɲɛm-kéan vannda yɔngu a yeemɛi nda pilɛi-yon coo.

⁷ Mí masaa Siris ndu viam vannda má kɔ cua ɲɛm valin va lɔ́ɔ́ kon o Cɛi-Mɛlɛka-o nin-ndon, n Nebukanɛsar ndóò kɔ cua Yerusalɛm mí ndóò kɛsi mun o cɛi máán halaa ndɔa nin-ndon pɛɛn.

⁸ Mí ndu Siris masa Pɛrsea viam Mitredat, ó va bolofaa mandaa-o, mó kɔ cua ɲɛm mun. Mɛɛ o cii mun cɔm, mó yɔngu Sɛsbasar va simlacinɔɔ Yuda-o mun.

⁹ Mɛɛ ɲɛm mun va sɛ́lɛ́ yɛ va hoo ni: sɛtila n'sianilan beleyaa (30), sɛtila n'volilan vàá pilɛ (1 000), mɔɔn bidiin a n'ŋɔmahiɔɔlu (29),

¹⁰ taalala kólaala n'sianilan beleyaa (30), taalala kólaala tiɔn-tiɔnnda toosian a volion-ndan kɛmɛ lehiɔɔlu a tɔ́ (410) a ɲɛm celen vàá pilɛ.

¹¹ Ɲɛm-laandun va n'cɔavaa a sianion a á volion-ndon va faw-faw vàála ŋuɛɛnu a kɛmɛ lehiɔɔlu (5 400). Tuma vanaa va o biyɔɔ nin-nda va faŋanndo Babilɔn le muungoo Yerusalɛm-ndo, mí Sɛsbasar cua ɲɛm mun kpow le mun mingio Yerusalɛm.