Ɛstɛr 5 - BII BILA

Ɛstɛr veelu masaa nda Haman le ɲɛdiaa dioo

¹ O paale yàándɔlen coo, mí Ɛstɛr mingin volɔɔla ndɔla lemasalan lekɔɔ, mó kɔ sim o bɛ́ɛ̀ va o cɛi lemasaa tɛɛn-ndo, o cɛila masaa va nin-ndan sondoo. Masaa va icali o kpɛŋɛ ndɔ lemasaa nin o dio bɛndoo sanaa.

² Ndóò cɔu dɔ́ɔ́ Ɛstɛr laa ndɔ isisi o bɛ́ɛ̀, mó ca ndu ɲia. Mó yulu tinda n'siani ndóò nɔ o ba-o Ɛstɛr o hɔl, mí Ɛstɛr sɔɔnguu, mó pilan tindaa hɔllo.

³ Mí masaa dimul ndu aa: «Òó Ɛstɛr laa ni! Yɛɛ nɛ yɔŋnun yɛ? Yɛɛ nɛ n yeema yɛ? Hali o va bɛɛ aa masale nilen táláá n yeema ni, i yɔngunin nɔm.»

⁴ Mí Ɛstɛr mulul ndu aa: «Te nɔm masaa cɛl pɛ! I yeema mì la hin hau niaa Haman o ya lo le ɲɛdiaa sɔvɛ ya toosiaa le nɔm-ndo dioo.»

⁵ Mí masaa dimi aa: «La kɔ dimul Haman cɔ́-cɔ́ le kɔlan veelú Ɛstɛr-o naa ndu.» Mí masaa nda Haman a kɔa le ɲɛdiaa sɔvɛ Ɛstɛr ndóò toosiaa-o.

⁶ Ndáà ciiyo ɲɛdiaa dioo, mí masaa ɲuna Ɛstɛr aa: «Yɛɛ nɛ n yeema yɛ mì yɔngu nɔm, bahavɛi yɛɛ nɛ n nɔ yɛ? Hali o va bɛɛ aa masalen táláá pilɔɔ n yeema ni, i yɔngunin nɔm.»

⁷ Mí Ɛstɛr muli aa: «O ya yeema mì ɲuna masaa-o co hoo ni:

⁸ Te masaa ce ya pɛ ɲia, maa o cɛl sɔɛi ya co ndu ɲuna-e, mò toosial-la ba ni havɛiyo. I yeema mì la hin vɛlɛ siɔdii niaa Haman le ɲɛdiaa ya ɛɛndiaanin le niaa-o. O kon, i mululnin nɔm, mì cɔm nɔm ba ni havɛiyo kpeekpei.»

Haman toosiaa yɔmndo le Mardosee landɔɔ

⁹ Mí Haman fula ɲinkon a ɲaaloo a á kɔlkɛndɔɔ taw. Kɛ telen o va luɛyɔɔ o dio cɛi lemasaa-o, mó ca Mardosee icali. Mardosee cen te o kpeŋan o fonda ndɔɔ le. Mí Haman tuulu kɔllo taw-taw a ndu.

¹⁰ Kɛ mí Haman kalaa bii kɔl ndɔɔ, mó muungu o ndu lo. Mó kɔ veelu caaŋaa ndɔa a Serɛs laa ndɔ.

¹¹ Mó cɔm nda mɛɛ bolofaa ndɔɔ va o bɔɔ yɛ, mɛɛ ndóò nɔ cuawva sɛ́lɛ́ bɛndoo yɛ a mɛɛ masaa ndóò heelu ndu o fonda bɛndoo, mó va vanaa bɛndua kpow a simlacia masaa kpow bollen yɛ.

¹² Mó dimul nda vɛlɛ aa: «Ya pilɛ kpé Ɛstɛr, lanɔɔ masaa veelu le kɔlan ɲɛdiaa sɔvɛ o bɛɛndiaa-o dioo naa pɔnɔ ndɔ ni. Siɔdii vɛlɛ, i co o veelaa naa masaa latulu.

¹³ Kɛ a kon kpow, te Mardosee Yuifinɔɔ ho co vɔ pɛ icali o cɛi lemasaa dio, i hinì kɔl te.»

¹⁴ O kon, mí Serɛs laa ndɔ a caaŋaa ndɔa kpow a dimul ndu aa: «Mɛɛ baŋ yɔmndo bandei dunndo beleŋuɛɛnu, o kon siɔdii púŋ, a dimul masaa, vana pena ndu Mardosee kalaa landɔɔ lon. À landu pɛ ndu, nɔm kɔɛnnun niko a ɲaaloo fɛkɛi le ɲɛdiaa sɔvɛɔ dio niaa masaa.» Mí tuula lan la hɛnan Haman, mó cɛl mì yɔmndo baŋnun.