Ɛstɛr 1 - BII BILA

Kafo masaa Sɛrsɛs-o

¹ O telen Sɛrsɛs-o dɛnndan ndan la yɔŋnun ni. Sɛrsɛs kon pɛɛn, ò masale ndɔlen le va kandɔɔ o lɛŋnde Ɛnde len, kɔlan tiiyaa háá Kus-o. Faw-faw, tàndàlan kɛmɛ a bidiin a laŋɔmmɛw la va o masale ndɔlen nin ni.

² Telen ndu masaa Sɛrsɛs va icali o kpɛɛŋɛ ndɔ lemasaa coo o kobi lebol lemasaa Suse nin-ndo,

³ o vɔsi yàándɔɔ nin o masale ndɔlen nin, mó tuisi kafoo, mó toosiaa ɲɛdiaa sɔvɛɔ, mó veelu vanaa ndɔa baalaa, langbaa ndɔa kɛsun kálàá, simlacia vanaa cɔvaa Pɛrsea a Mɛdea, handɔɔ o vanaa bɛndua a masaa n'bungaa coo.

⁴ Mó cɔm nda bolofaa ndɔɔ a biilu ndɔ lemasale, mó cɔm nda mɛɛ naŋɔɔ ndɔ bɛndu-bɛndoo va yɛ. Mí kafo kon viaw taw-taw, palɛi kɛmɛ a belaŋɔmaa a va kafoo tosaa tuŋ.

⁵ O palɛi ken mɛɛlulan, mí masaa tuisi vɛlɛ kafo celen le vanaa va o kobi lemasaa nin Suse-a kpow. Mó yaw ɲɛdiaa sɔvɛɔ le vanaa bolofaa a vanaa bala fondoa. Mí kafo kon tosan palɛi ndii ŋɔmmɛw o nakɔla cɛi lemasaa nin.

⁶ Kolala keesela yinaalan a kolala makààlan la va la yiyaa o sungbuma cɔwnun a pow marbre-an, o yoei humbuei a o yoei siaŋɛi kelan n'volion va n vulaa-e. Kpɛŋɛla nda toosiaa a sianion-ndan a kpɛŋɛla nda toosiaa a volion-ndan la va lakɛsiaa o lɛŋnde yikpan a powta siaŋalan, powta humbulan, powta deŋiaalan a powta tiŋilan-nden-ndan coo.

⁷ Má va vannda mɔiyan yɔngoo o taalala kólaala n'sianila súú-súù ka nin, mɔima lemasan ma va fulaa taw-taw masaa o ba.

⁸ Mí vana-vana kol mɛɛ o nɔla yɛ. Kani masaa ndóò cii nin vanaa ndɔa baalaa dimul kpow maa o vanaa nda veelu-a tɛɛn, a tosal vana-vana mɛɛ o yeema yɛ.

⁹ Mí Vasti lanɔɔ masaa bɛɛ tuisi kafo diaa le vanlaandua o cɛi lemasa masaa Sɛrsɛs-o nin.

Vasti lanɔɔ masaa del kasi a masaa

¹⁰ Paale ŋɔmmɛwndɔlen o kafo kon coo, masaa va a ɲaaloo taw a mɔiyan o hɔl, mó viam vanpiaandua ŋɔmmɛvaa ndu masaa ndóò kɛsi kɔllo coo-a: Mehuman, Bista, Harbona, Bikta, Abakta, Setar a Karkas,

¹¹ le kɔlan hunɔɔ a Vasti laa ndɔ ndu masaa pila o hɔl, mì Vasti ndóò hin a mɔsil lemasaa o lebol maa lanɔɔ masa. Masaa ndóò yeema mì ndóò cɔm vanaa va lon-nda a vanaa lebolaa ndɔa kpow mɛɛ Vasti ndóò naŋ hɔlla taw yɛ. Kani salama bɛndoo o va ni.

¹² Mí vanpiaandua masaa ndóò kɛsi kan kɔllo coo-a kɔ dimul Vasti lanɔɔ masaa diom masaa soo-o, kɛ mí Vasti kɛɛ le hunɔɔ. Mí masaa tuulu kɔl taw, mó ɲiiya a kɔlfulaa.

¹³ Le hee, mí masaa ɲuna silaa o vanaa kɔlkalua sina sɔɔn tɔŋndon-nda lo, kani lende sɔɔn masaa mun dimin vanaa sina tɔŋndo-a a vanaa dimi sɔɔn sandan-nda tɛɛn ni.

¹⁴ Vanaa ndɔa silaa va ndu ikɛi kpɛɛlun-nda va haa ni: Karsena, Setar, Admata, Tarsis, Merɛs, Marsena a Memukan. Nda vanaa ŋɔmmɛvaa kan va vanaa bɛndua lebolla le Pɛrsea a Mɛdea n. Nda va o fondala bɛndulan o masale ndɔlen nin ni, kani masaa ndóò laalan nda.

¹⁵ Mí masaa ɲuna nda aa: «I vem vanaa ya handu kɔllo coo-a le kɔlan hunɔɔ a Vasti laa ni, kɛ o cɛl le hunɔɔ le. Ɔ́ɔ̀ ɲɛ dimin o tɔŋndo nin le ndu handɔɔ coo-o?»

¹⁶ Mí Memukan mulul masaa Sɛrsɛs simlacia va lon-nda kpow o hɔl aa: «O co nɔm pilɛ kpé le Vasti laa nɔm pɛɛsa nuaa le, kɛ vanaa bɛndua nɔmnda a vanaa co bollen o kobila leboltan nin o masale nɔm nden nin-nda kpow o pɛɛsa ni.

¹⁷ Kani dɛnɛ Vasti tosa hoo-o, vanlaandua kpow a co ndu sina, mì nda bɛɛ sɔla yiyanndo le piandaa ndaa tɛɛndanndo. Bau a nɔla mà dimi aa: ‹Ɛ̀ɛ̀ kɛ mí masaa Sɛrsɛs ndóò viam vannda le kɔlan hunɔɔ a Vasti laa ndɔ, kɛ o cɛl le hunɔɔ le.›

¹⁸ Hau-hau, te laandaa simlacia Pɛrsea a Mɛdea tuei pɛ ɲɛ lanɔɔ masa bɛndoo tosa hoo-o, nda bɛɛ tosanin ɲɛ pilɛ kon a piaandaa ndaa co simlacia co nɔm o ba bɛngu-a, a pɛɛsa yɛ pɛ nda lende, piaandaa ndaa tuulu kɔltan.

¹⁹ Lelan, te masaa cɛl pɛ, o yii tɔŋ vana nɔla faŋa loo, mò sɛvan o sɛbɛ tɔŋ Pɛrsea a Mɛdea nin, maa Vasti bɛnda lɛ le hunɔɔ masaa Sɛrsɛs o hɔl te, mì nɔm masaa dimi vɛlɛ ndi vakpa maa vanalanɔ celen muungu o fonda Vasti-o, o co fisa a ndu Vasti-o.

²⁰ Te tɔŋ masaa yiinin kon-ndo sinan pɛ o masale ndɔlen nin kpow, vanlaandua kpow co piaandaa ndaa bɛɛlen ke, pɔnɔ kon va vana bɛndu o va vana pɔmbɔ.»

²¹ Mí sɔɛi ken hɛnan masaa a simlacia. Mó tosa mɛɛ Memukan dimi yɛ.

²² O kon, mí masaa yaa sɛbɛlan o kobila lebolta va o masale ndɔlen nin-ndan kpow nin, vanaa-mangalaa-isɔɔ oo vanaa-mangalaa-isɔɔ mɛɛ sɔɛi ndɛi mangalɛi va yɛ. Má dimi o sɛbɛla lan nin maa vanpiaandua kpow, vana-vana bɛnda mò va vana lebollo o yungule ndɔlen coo, mà soo o sɔɛi nda velu nda-e nin.