Esekiɛl 9 - BII BILA

Hala tuisi Yerusalɛm sangaa coo

¹ O kon kɔɔli, mí tuɛi ndu deŋio kpélén aa: «Niaa bɛnda le kobio ho soŋɔ̀ɔ́-a, la hun niko! Vana-vana hun a ɲɛ ndɔ cɔw tɛɛmbua o ba!»

² Mí ca langbaa hunɔɔ nda ŋɔmpum, má kei a nɛi dio luɛyaa bɛndu muli hɔlla a ba luaŋ-ndo-o, vana-vana óò nɔ ɲɛ cɔw tɛɛmbua n'vanndacieo o ba. Vanndo pum va nda tɛɛn a kola keesoo lekɔɔ, kpɛkilen le va ndu lelandaa o yáwlen. Mí vanaa kan a hun sim o fonda-loamaa-lasálà cɔwnun a daɲan-ndo ikɛi.

³ O kon, mí biilu Hala Israɛlla can o mɛlɛkaa kanda ɲɛm Hala-on-nda coo nɛɛ o va-a, mó kɔa a kpengii kèédei dio Cɛi-Hala-o, mó veelu langbanɔ va a kola keesoo lekɔɔ mí kpɛkilen le va ndu lelandaa o yáwlen-ndo,

⁴ mí Mɛlɛka dimul ndu aa: «Balu kobio Yerusalɛm kpow, mà kei pondalen handɔɔ vanaa sɔɛi co palaa má va cɛɛŋɔnndo le dɛnnda nɔɔlɛila co lan tosanndo lan-nda o itendu.»

⁵ Mí tuɛi ndu vɛlɛ vanaa tɔ̀a dimullo aa: «La kɔ ndu kɔɔli o kobio nin, mì la kɔ diw vannda. La tosa iɲíí a nda le, la hɛli vana-vana le.

⁶ La diw nda háá mì la cii nda kpede, kandɔɔ a vanaa yuuvɛiya, felengia piaandua, a laandua, cuaambɔa pɔmbɔa, kɔ bii a vanlaandua. Kɛ vana-vana niaa ce pɛ pondalen o itendu, la pilan ndu le. La kandu a cɛi-kola-toandaa diandaa nuu.» O kon, má kɔ kandu a vanaa kɔlkalua va o Cɛi-Hala-o hɔl-ndɔ-a.

⁷ Mó dimul nda aa: «La nɔ́ɔ́liaa cɛiyo. La kɔ pei bɛ́ɛ̀la ndɔlan a vanvílɛ́iya malan niaa kɔa nɛɛ celen.» Má fula, má kɔ diw vannda o kobio nin.

⁸ Tuma nda va vannda diwvo mí lo ya pilɛ kpé-o, mí del lɛŋ o kuumbuan o kɔl coo, mí koŋul aa: «Éé Maalii, Mɛlɛka! Vɛ̀ɛ̀ má tuisi kɔltuw nɔmndo Yerusalɛm coo, má siow Israɛlaa tɔ̀a lo yoomu-a diw kpede?»

⁹ Mó mulul-la aa: «Hakila vannda Israɛl a la vannda Yuda tosa lan la co bɔɔ sɛ́lɛ́. A co vanndacieea diwvo nɛɛ-nɛɛ ka o lɛŋnden nden nin. Kobio pɛ cá a delɔɔcoo, kani nuaa nda co dimio ni aa: ‹Mɛlɛka faŋal lɛŋnde naalen hɔlla, o co naa cɔ le.›

¹⁰ Lelan ya bɛɛ, i tosanin iɲíí a nda le. I mɛinin vana-vana le, i tuisinin sangala dɛnnda nda tosa lan nda pila coo.»

¹¹ O kon, mí langbanɔ va a kola keesoo lekɔɔ mì kpɛkilen le va lelandaa ndu o yáwlen-ndo hun dɔawnun kona aa: «I cii vomɔɔ n vem ya-o tosa kpede.»