Esekiɛl 8 - BII BILA

Piɔmnda sooloo o Cɛi-Hala-o nin

¹ O vɔsi ŋɔmpumndɔɔ nin, paangii ŋɔmpumndɔɛi va malɔ leŋuɛɛnu, i va icali o ya lo cɛinin, mí kaasoŋaa kɔlkalua Yuda va icali ya laci, mí ba Maalii-o toal-la coo, Mɛlɛka pɛɛn.

² Mɛɛ ya tofa, mí ca ɲɔɔ pum maa vanaciee, kandɔɔ o fonda va maa caŋaa ɲɛ kon-ndo, kɔlan tiiya háá lebɛngu, ɲɔɔ va biyɔɔ sɔngɔɲɔn maa leyin. Kandɔɔ vɛlɛ a fonda va maa caŋaa ndɔa-o háá lecoo, ɲɔɔ va diondɔɔ maa ciliŋii siaŋa.

³ Mí ɲɛ kon siɛndi ɲɔɔ maa ba vanaciee, mó bii ya yiinde o lebol. Mí kɔl Hala-o faŋa ya o lɛŋnden coo, mí va lɛŋnden a halataalaa tɛɛn. Mó kɔa a ya Yerusalɛm o vunduma yilɛnndan nin, mó kɔa a ya háá o dio luɛyaa co lenin-ndo ikɛi, a kpengii ba luaŋ-ndo, nɛɛ piɔm paŋalaa va-a, o kpeeŋiaa paŋala Mɛlɛka-o-o pɛɛn.

⁴ Mí biilu bɛndu Hala Israɛlla cɔmnun ya yáà ce ndu paandu o bóllo nin yɛ.

⁵ Mó dimul-la aa: «Po vanacieo sei, heelu vɔ hɔlla a ba luaŋ-ndo!» Mí heelu hɔlla, mí ca piɔm paŋalaa kon o dio co a ba fonda-loamaa-lasálàá a maluaŋ-ndo, o dio kon sondoo.

⁶ Mó ɲuna ya aa: «Po vanacieo sei, a ce ɲɛ nda co tosaa-o? A ce dɛnnda nɔɔlɛila lamààla bɛndula cuavaa Israɛlla co tosaa nanu, haliko mi piow cɛi-kola-toandaa diandaa nuu, mì kɔɛnnun polon-ndan nɛ? Kɛ, a canin vɛlɛ dɛnnda nɔɔlɛila hiow lan vɔwlen polon-ndan.»

⁷ O kon kɔɔli, mó kɔa a ya o dio bɛ́ɛ̀ Cɛi-Hala-o sondoo. Mɛɛ ya tofa, mí ca tɛɛngei o kpakio.

⁸ Mó dimul-la aa: «Po vanacieo, tow soondo o kpakio!» Mí toaw soondo o kpakio, mí buli tɛɛngei.

⁹ Mó dimul-la aa: «Luɛi mà mɛɛndan dɛnnda lamààla bɛndula nda co tosaa nanu-an!»

¹⁰ Mí luɛi, mí mɛɛndan, mí ca ɲaa sasun lɛŋ-nda a visia nɔɔlɛyaa vɔɔnda súúlan kpede, piɔmaa cuavaa Israɛlla va sooloo-a kpow a va a tuuliaa o kpakio balɔɔ pindo.

¹¹ N'van belaŋɔmmɛw o vanaa kɔlkalua Israɛlla tɛɛn a va isisi piɔmaa kan o hɔl, Yaasania po Safan-ndo va isisi nda tɛɛn. Vana-vana óò nɔ bonyii fuusɛi o ba, kumii bɛndu-bɛndui ansan va ŋɔu o bonyun mun nin-nde va helɔɔ coocoo tukpe-tukpe.

¹² Mó ɲuna ya aa: «Po vanacieo, a ce ɲɛ kaasoŋaa kɔlkalua Israɛlla co tosa o ɲumndan nin-ndo nɛ? Vana-vana nɔ piɔmndo o cɛi ndɔ máándo nin, kani a co dimio aa Mɛlɛka co naa cɔ le, o faŋal lɛŋnden hɔlla.»

¹³ Mó dimul-la aa: «A canin vɛlɛ dɛnnda nɔɔlɛila bɛndula celennda nda co tosaa lan.»

¹⁴ Mó kɔa a ya o dio Cɛi-Mɛlɛka-o sondoo a maluaŋ. I komal vanlaandua icali lon, a va caŋndo Tammus coo.

¹⁵ Mó ɲuna ya aa: «Po vanacieo, a ce vɛlɛ hee? A canin vɛlɛ dɛnnda nɔɔlɛila bɛndula celen, la hiow lan vɔwlen-ndan.»

¹⁶ Mó luɛi a ya o bɛ́ɛ̀ lenin Cɛi-Mɛlɛka-o nin, o Cɛi-Mɛlɛka-o sondoo, o tongo-sɛmtɔɔ a fonda-loamaa-lasálàá tɛɛn. Mí ca langbaa bidiin a à ŋuɛɛnu, a mulul Cɛi-Diandaa kɔɔ, má muli hɔlla a ba paalen le can-ndo, a va vula baŋaa a kpengii paalen le can-ndo le paalen sooloo.

¹⁷ Mó ɲuna ya aa: «Po vanacieo, a ce vɛlɛ hee le? Vɛ̀ɛ̀ polale Yuda len le hini vɔ kɔl a dɛnnda nɔɔlɛila nda co lan tosaa nanu lan te? A cii lɛŋnden pei ca a kɔlvesɛiyo, a co pɛngi ya kɔllo tuuloo le. Nda pila co lɛwve sɔɔnguuo o milinnda ndalan.

¹⁸ Lelan ya bɛɛ, i co nda dɛnndan tosal a kɔltuwvo. I tofanin nda mì ɲíí bii ya le, i keinin nda baa coo le. Hali a yondanin bɛɛ coocoo ya o lani, i yeŋnin nda lani le few.