Esekiɛl 2 - BII BILA

Hala vem Esekiɛl o Israɛlla lo

¹ Mó dimul-la aa: «Nɔm Po vanacieo sei, cɔn mà sim o pelun nɔmndon coo, i co isɔɔ o nɔm ndo.»

² Mɛɛ o dimul-la dɔ́ɔ́ sɔɔn mun, mí kɔl Hala-o luɛi ya nin, mó simi ya o pelun nun coo. O kon, mí yaŋ ndu nilan.

³ Mó dimul-la aa: «Po vanacieo sei, ya co nɔm vomɔɔ o cuavaa Israɛlla lo ni, o vanaa-mangalaa-isɔɔa nila kalua lo ya co nɔm vomɔɔ ni, a simul-la kan nda pɛɛn. Nda a fuɲaa ndaa mamaa, vanaa nila kalua nda yɔŋnun a ya háá hau ni.

⁴ Cuavaa kan nɔ hɔlta veseilan a kɔlvesɛiyo taw. O nda lo ya co nɔm vomɔɔ ni, mà kɔ soo o nda lo, mà dimul nda aa: ‹Lende Maalii Hala dimi ni!›

⁵ I sinà maa vanaa nila kalua kposon nda co ni. Lelan, a yaŋ lani, a yaŋ lani le, a sinanin maa vana-tɛɛngaa-diom Hala-o co nda tɛɛn.

⁶ Nɔm Po vanacieo yɛ, yɔŋ isiòòn a nda le, siòòŋii bii nɔm le tombola nda bɛndoo le. Nɔm a vanin o yɔɔn a o siɛmbullon tɛɛn, a calnin o ngeemaa coo, kɛ siòòŋii biinin nɔm le tombola ndaa le. A ɲiiyanin le hɔlta ndalan te, kani vanaa nila kalua nda co ni.

⁷ Mɛɛ ma dimul nda sɔɔn nun, a yaŋ lani, a yaŋ lani le, kani vanaa nila kalua nda co ni.

⁸ Nɔm Po vanacieo yɛ, yaŋ nilan o diom ya co nɔm dimul-lo! Nɔm siŋnun vana nila kaloo maa yungu lanila kalu kon te! Lelan, kumbi sondoo mà de ɲɛ ya kenin nɔm-ndo!»

⁹ I va tofaa, mí ca ba vanacieo o siɛndiaa nɛɛ ya va icali-a, sɛbɛ simbulaa va o ba kon.

¹⁰ Mó timbi sɛbɛ simbulaa kon ya o hɔl, o va o sɛvaa lenin a lekɔɔli. Cɛɛŋɔnndan, ŋɔɔcianndan a somisominndan la va lasɛvaa lecoo ni.